မြန်မာနိုင်ငံရှိ လူငယ်များသည် ပဋိက္ခ၊ စီးပွားရေးပြိုလဲမှုနှင့် စစ်မှုထမ်း ကိစ္စရပ်များကြောင့် နိုင်ငံအတွင်းမှ ထွက်ခွာလိုကြောင်း ကုလသမဂ္ဂဖွံ့ဖြိုးတိုးတက်ရေးအစီအစဉ် (UNDP) ၏ အစီရင်ခံစာအရ သိရသည်။
သြဂုတ် ၁၂ ရက်က ကျရောက်သည့် အပြည်ပြည်ဆိုင်ရာလူငယ်များနေ့အတွက် ကုလသမဂ္ဂဖွံ့ဖြိုးတိုး တက်ရေးအစီအစဉ် (UNDP) မှ ဖော်ပြသော “ဌာနေဝေးမျိုးဆက်သစ်၊ လူငယ့်သဘောထားနှင့် ရွှေ့ပြောင်းအခြေအနေထိုင်ခြင်း” အစီရင်ခံစာတွင် ယင်းကဲ့သို့ ဖော်ပြထားခြင်း ဖြစ်သည်။
နိုင်ငံတစ်ဝှမ်းရှိ လူငယ် ၇,၀၀၀ ကျော်၏ အမြင်များကို မေးမြန်းရာတွင် လူငယ် ၁၀ ယောက်တွင် ၄ ယောက်သည် ပဋိက္ခ၊ စီးပွားရေးပြိုလဲမှုနှင့် စစ်မှုထမ်း ကိစ္စရပ်များကြောင့် မြန်မာနိုင်ငံမှ ထွက်ခွာလိုကြကြောင်း အစီရင်ခံစာ၌ ဖော်ပြသည်။
“နိုင်ငံရေးကြောင့် အစစအရာရာ ကြပ်တည်းလာတာကြောင့် လူငယ်တွေရဲ့ ပိုကောင်းတဲ့ အနာဂတ်အတွက် ပြည်ပထွက်တာက အဖြေတစ်ခုလို ဖြစ်နေတာ။ အမှန်တိုင်း ပြောရရင် မြန်မာနိုင်ငံမှာနေရတာ ကိုယ့်ရဲ့တိုးတက်မှုကို ပိုပြီးကြန့်ကြာစေတယ်” ဟု တောင်ကြီးမြို့ အသက် ၂၀ ကျော်အရွယ် လူငယ်တစ်ဦးက ပြောသည်။
ထို့ပြင် ပညာရေး သော်လည်းကောင်း၊ အလုပ်အကိုင်များ သော်လည်းကောင်း အခွင့်အလမ်း နည်းပါးလာသောကြောင့် လူငယ်များမှာ မြန်မာနိုင်ငံမှ ထွက်ခွာရခြင်းဖြစ်ကြောင်း ၎င်းက ပြောသည်။
မြန်မာနိုင်ငံ လူငယ်အများစုသည် အသွားချင်ဆုံး နိုင်ငံမှာ ဂျပန်နိုင်ငံဖြစ်ပြီး လက်တွေ့မှာတော့ ထိုင်းနိုင်ငံကိုသာ သွားရောက်မှု အများဆုံးနိုင်ငံဖြစ်နေကြောင်း အစီရင်ခံစာ၌ ဖော်ပြထားသည်။
သို့သော်လည်း လူငယ် အများစုသည် နောင် ၅ နှစ်အတွင်း ပိုကောင်းလာမည်ဟု ယုံကြည်ကြပြီး လူငယ် ၉၀ ရာခိုင်နှုန်း နီးပါးမှာ နိုင်ငံရေးနှင့် စီးပွားရေး အခြေအနေများ ကောင်းမွန်လာပါက ပြန်လာမည်ဟု ဆိုကြကြောင်း သိရသည်။
လက်ရှိတွင် လူငယ် ၄၇ ရာခိုင်းနှုန်းမှာ ခရီးသွားစာရွက်စာတမ်းများ မရှိသဖြင့် လုံခြုံရေး အာမခံချက်မရှိသော လမ်းကြောင်းများမှတစ်ဆင့် သွားလာနေကြကြောင်း အစီရင်ခံစာ၌ ဖော်ပြထားသည်။
လူငယ်များသည် အနာဂတ်သာမက ယနေ့ခေတ် အပြောင်းအလဲ၏ မောင်းနှင်အားဖြစ်ပြီး မြန်မာနိုင်ငံတွင်း နေထိုင်နေသည်ဖြစ်စေ၊ နိုင်ငံအတွင်းမှ ထွက်ခွာသွားသည်ဖြစ်စေ လူငယ်များကို ပြုစုပျိုးထောင်ရာတွင် ရင်းနီးမြုပ်နှံကြရန် (UNDP) ၏ မြန်မာနိုင်ငံဆိုင်ရာ ဌာနေကိုယ်စားလှယ် Titon Mitra က တိုက်တွန်းထားသည်။
Leave a Comments