ကရင်နီတော်လှန်ရေးတပ်များ ထိန်းချုပ်ထားသည့် သျှမ်းပြည်တောင်ပိုင်း မိုးဗြဲမြို့ကို စစ်ကောင်စီတပ်က ၆ လကြာအောင် ထိုးစစ်ဆင်ပြီးနောက် တစ်မြို့လုံးကို ပြန်လည်တိုက်ခိုက်သိမ်းပိုက်ရရှိပြီ ဖြစ်ကြောင်း စစ်ကောင်စီက ယနေ့ (ဇူလိုင်၇)ရက်တွင် သတင်းထုတ်ပြန်သည်။

ကရင်နီတော်လှန်ရေးတပ်များက ၂၀၂၃ နိုဝင်ဘာလအတွင်း ခြေမြန်တပ်ရင်း (ခမရ ၄၂၂) မှအပ မိုးဗြဲမြို့နှင့် မြို့ထဲရှိ စစ်တပ်စခန်းများကို သိမ်းပိုက်ထိန်းချုပ်နိုင်ခဲ့ခြင်း ဖြစ်သည်။

အကြမ်းဖက်ချေမှုန်းရေးစစ်ဆင်ရေး (Counter – Terrorism Operation) ဟုအမည်ပေးကော စစ်ကောင်စီတပ်က ယခုနှစ် ၂၀၂၅ နှစ်ပိုင်းမှစ၍ မိုးဗြဲမြို့ကို ပြန်လည်ထိန်းချုပ်နိုင်ရေး ကြိုးပမ်းခဲ့ပြီး ယမန်နေ့ (ဇူလိုင် ၆ ရက်) တမြို့လုံးကို ပြန်လည်သိမ်းပိုင်နိုင်ခဲ့ခြင်း ဖြစ်ကြောင်း ထုတ်ပြန်ချက်၌ ဖော်ပြသည်။

စစ်ကောင်စီတပ်သည် ဖယ်ခုံ၊ မိုးဗြဲအနောက်ဘက်ခြမ်းနှင့် မိုးဗြဲမြို့၏ အရှေ့ဘက်ခြမ်းတို့ကို စစ်ကြောင်းထိုးပြီး ထိန်းချုပ်ကာ သစ်ရာကုန်းရပ်ကွက်နှင့် စည်ကား (၂) ရပ်ကွက်တို့ကို လက်နက်ကြီးနှင့် လေကြောင်းဖြင့်ပစ်ကူပြီး သိမ်းပိုက်ခဲ့ကြောင်း ဆိုသည်။

မြို့ပေါ် ရပ်ကွက် (၁၄) ခုတွင် မြေပေါ်မြေအောက် ဘန်ကားများဖြင့် အခိုင်အမာခံစစ်ပြုလုပ်ထားသော ကရင်နီတော်လှန်ရေးတပ်များကို စစ်ကောင်စီတပ်က တိုက်ခိုက်ခဲ့ရာ ၆ လအတွင်း တိုက်ပွဲကြီးပေါင်း (၂၁၅) ကြိမ်၊ ထိတွေ့မှုပေါင်း (၄၀၀) ကြိမ် ဖြစ်ပွားခဲ့ကြောင်း စစ်ကောင်စီက ဆိုထားသည်။

လက်ရှိ မိုးဗြဲမြို့ တိုက်ပွဲအခြေအနေနှင့် ပတ်သက်၍ ကရင်နီအမျိုးသားများကာကွယ်ရေးတပ် (KNDF) ၏ ဗဟိုပြန်ကြားရေး တာဝန်ခံ တာအယ်စိုးက “ မိုးဗြဲမြို့ပေါ် ရပ်ကွက်တွေမှာ စစ်ကောင်စီတပ်က ဝင်ရောက်တပ်စွဲထားပါပြီ၊ ပြီးတော့ မြို့ထဲမှာ ရှိတဲ့ နေအိမ် (၂၀) ကျော်ကို စစ်ကောင်စီကနေ မီးရှို့နေပါတယ်” ဟု သျှမ်းသံတော်ဆင့်ကို ပြောသည်။

ထို့ပြင် မိုးဗြဲမြို့အနီးရှိ မိုးဗြဲ-လွိုင်ကော် လမ်းမကြီးပေါ်၌ ကရင်နီတော်လှန်ရေးတပ်ဖွဲ့များနှင့် စစ်ကောင်စီတပ်တို့ အကြား တိုက်ပွဲဖြစ်ပွားနေကြောင်း ၎င်းကဆိုသည်။

သျှမ်း-ကရင်နီ (ကယား) ပြည်နယ်စပ် စစ်ကောင်စီ ထိုးစစ်ကို ကရင်နီအမျိုးသားများကာကွယ်ရေးတပ် (KNDF)၊ မိုးဗြဲမြို့ပြည်သူ့ကာကွယ်ရေးတပ် (Mobye PDF)၊ ဒီမော့ဆိုပြည်သူ့ကာကွယ်ရေးတပ် (DMO-PDF)၊ မြို့ပြတော်လှန်ရေးတပ်ဦး (URF) စသည့် မဟာမိတ်များက ပူးပေါင်းပါဝင်တိုက်ခိုက်နေကြသည်။

မိုးဗြဲတိုက်ပွဲအပြင် ဖယ်ခုံ- မိုးဗြဲတကြော တိုက်ပွဲများတွင် စစ်ကောင်စီတပ်နှင့်အတူ ပအိုဝ်းပြည်သူ့စစ် PNO လည်း ပူးပေါင်းပါဝင်ပြီး တိုက်ခိုက်နေလျက်ရှိသည်။

စစ်ကောင်စီ အားကိုးအားထားပြုနေသော ပအိုဝ်းပြည်သူ့စစ် PNO သည် ရုရှားနည်းပြများဖြင့် ၅ လကြာ အထူးကွန်မန်ဒို သင်တန်းဆင်းပွဲကို ယခုနှစ်မေလက ပြုလုပ်ခဲ့ပြီးနောက် ဖယ်ခုံနှင့် ထိစပ်နေသော ညောင်ရွှေမြို့နယ်နှင့် ပင်လောင်းမြို့နယ်တို့၌ လှုပ်ရှားခဲ့ပြီး ဖယ်ခုံမြို့နယ်အရှေ့ခြမ်းထိ စစ်ကောင်စီတပ်နှင့် ပူးပေါင်း၍ စစ်ကြောင်းထိုးနေသည်။

မိုးဗြဲမြို့ကို ပြန်လည်သိမ်းပိုက်ရရှိထားသော စစ်ကောင်စီတပ်သည် မိုးဗြဲမြို့နှင့် လွိုင်ကော်မြို့အကြားရှိ ကရင်နီတော်လှန်ရေးတပ်ဖွဲ့များကို ဆက်လက်တိုက်ခိုက်နေပြီး လွိုင်ကော်-မိုးဗြဲ-ဖယ်ခုံ-ပင်လောင်း ဆက်သွယ်ရေး လမ်းမကြီးကို မကြာမီအချိန်တွင် ပြန်လည်ဖွင့်လှန်နိုင်ရန် စီမံဆောင်ရွက်နေကြောင်း စစ်ကောင်စီက ဆိုထားသည်။