သျှမ်းပြည် တန့်ယန်းမြို့နယ်တွင် ‘ဝ’ပြည်သွေးစည်းညီညွတ်ရေးတပ်မတော် UWSA မှ ရပ်ရွာလုံခြုံရေးအတွက် ပြည်သူ့စစ်ခေါ်ယူပြီး နှစ်လခန့် စစ်သင်တန်းပေးကြောင်း ပြောဆိုလိုက်သည်။

မေလဆန်းပိုင်းမှ စတင်၍ တန့်ယန်းမြို့နယ်ရှိ ရပ်ကွက်နှင့် ကျေးရွာအုပ်စု အားလုံးမှ အုပ်ချုပ်ရေး တာဝန်ရှိသူများကို ‘ဝ’တပ်ဖွဲ့ UWSA ၏ (၁၇၁) စစ်ဒေသအောက် အသစ်ဖွဲ့စည်းထားသည့် တပ်မဟာ (၇၁၃) အတွက် တပ်သားသစ်အဖြစ် မေလ (၂၀) ရက် နောက်ဆုံးထား၍ စစ်မှုထမ်း စုဆောင်းပေးရန် ပြောဆိုထားကြောင်း ဒေသခံများက ပြောဆိုသည်။

သို့သော် UWSA ဘက်မှ တပ်သားသစ် စုဆောင်းခြင်း မဟုတ်ဘဲ ရပ်ရွာလုံခြုံရေးအတွက် ပြည်သူ့စစ် ခေါ်ယူခြင်းဖြစ်ပြီး လုံခြုံရေးအစီအမံ လုပ်ဆောင်ပေးခြင်းဖြစ်ကြောင်း ‘ဝ’ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို ပြန်လည်ဖြေကြားသည်။

“ကျနော်တို့ စစ်သားသစ် စုဆောင်းကောက်ယူတဲ့ သဘောမျိုး မဟုတ်ဘဲနဲ့ ရပ်ရွာလုံခြုံရေးအတွက် ပြည်သူ့စစ် တစ်ယောက်နှစ်ယောက် အဲ့လိုမျိုး ကောက်ယူပြီးမှ လုံခြုံရေး လုပ်ခိုင်းတဲ့ သဘောပဲနော်။ မိမိတို့ ရပ်ရွာတွေမှာ လုံခြုံရေးတွေလုပ်ဖို့အတွက် ကျနော်တို့ အစီအမံ လုပ်ပေးတဲ့ သဘောမျိုးပါပဲ၊ သိတဲ့အတိုင်းပဲလေ အခုခေတ်မှာက ဒုစရိုက်မှုတွေလည်း များလာတယ်ဆိုတော့”ဟု ဦးညီရမ်းက သျှမ်းသံတော်ဆင့်ကို ပြောသည်။

‘ဝ’တပ်ဖွဲ့ UWSA မှ ရပ်ရွာလုံခြုံရေး အကြောင်းပြကာ တန့်ယန်းမြို့နယ်ရှိ ကျေးရွာများမှ ဒေသခံများကို ပြည်သူ့စစ်အဖြစ် ခေါ်ယူနေခြင်းသည် လူမျိုးဘာသာ၊ အသက်အပိုင်းအခြား မသိရသော်လည်း ၎င်းတို့ကို နှစ်လဝန်းကျင်ခန့် စစ်သင်တန်းပေးကြောင်း ဆိုသည်။

“ဟုတ်တယ်၊ ပြည်သူ့စစ်တွေကို ကျနော်တို့ တစ်ရွာကို တစ်ယောက်၊ နှစ်ယောက်လောက် ခေါ်ပြီးမှ နှစ်လ ဝန်းကျင်လောက် ကျနော်တို့ စစ်သင်တန်းပေးတယ်”ဟု ‘ဝ’ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို ဆက်ပြောသည်။

တန့်ယန်းမြို့နယ်အတွင်း UWSA မှ စစ်မှုထမ်းတပ်သားသစ် စုဆောင်းခြင်း မပြုလုပ်ရန်နှင့် ဆက်ကြေး(အခွန်) မဆောင်ခိုင်းရန် ပြည်သူများ၏ အခက်အခဲကို ကူညီဖြေရှင်းပေးရန် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ထံ ဒေသခံများမှ မေလဆန်းပိုင်းတွင် စာပေးပို့ကာ အကူအညီ တောင်းဆိုထားကြောင်း သိရသည်။

၂၀၂၅ မေလဆန်းပိုင်းမှ စတင်၍ UWSA အခြေချတပ်စွဲထားသည့် ယခင် မန်ပန်ပြည်သူ့စစ် ထိန်းချုပ်နယ်မြေများမှ ကျေးရွာအုပ်စုများ၊ တန့်ယန်း – လားရှိုး ဆက်သွယ်ထားသည့် ကားလမ်းမနှင့် တန့်ယန်း-ပန်ဆန်း ကားလမ်းမ မြောက်ဘက်ရှိ ကျေးရွာအုပ်စုများတွင် ပြည်သူ့စစ်အဖြစ် စစ်သင်တန်းတက်ရောက်ရန် အမိန့်ပေးညွှန်ကြားခဲ့ကြောင်း ဒေသခံများထံမှ သိရသည်။

ယခင်က ဗိုလ်မွန်း ဦးဆောင်ခဲ့သည့် မန်ပန်ဌာနေ ပြည်သူ့စစ်အဖွဲ့သည် တန့်ယန်း၊ မိုင်းရယ်နှင့် လားရှိုးမြို့နယ်အတွင်း သံလွင်မြစ်ကမ်းအနီး တာ့ပန်ယုတ် (တႃႈပၢင်ယူၵ်ႇ)၊ တာ့ဆိုင်းလျန် (တႃႈသၢႆးလႅင်) မှ မန်ပန်အုပ်စု၊ မိုင်းယော်အုပ်စုအထိ ကျေးရွာအုပ်စုပေါင်း (၅၀) နီးပါး နယ်မြေစိုးမိုးမှု ရှိထားသည်။

ပြီးခဲ့သည့် ၂၀၂၄ စက်တင်ဘာလ အတွင်းကလည်း တန့်ယန်းမြို့နယ်တွင် ‘ဝ’တပ်ဖွဲ့ UWSA မှ မြို့ပေါ်နှင့် ကျေးရွာများရှိ ‘ဝ’လူမျိုး မိသားစုများကို အိမ်ထောင်စုစာရင်း ကောက်ခံခဲ့ပြီး စစ်မှုထမ်းရန် တပ်သားသစ် စုဆောင်းခဲ့ကြောင်း တန့်ယန်းဒေသခံများက ပြောသည်