သျှမ်းပြည် UWSA ထိန်းချုပ် ‘ဝ’ဒေသ ပန်ဆန်းမြို့တွင် သေနတ်ကျည်ဆံ ခိုးယူရောင်းချခဲ့သည့် ‘ဝ’တပ်သားနစ်ဦးကို သေဒဏ်နှင့် နှစ်ရှည်ထောင်ဒဏ် အသီးသီး ချမှတ်ခဲ့ကြောင်း စုံစမ်းသိရသည်။

ယမန်နေ့ (မေလ ၁၄ ရက်) နံနက် ၈ နာရီကျော်တွင် ‘ဝ’တပ်ဖွဲ့ UWSA ထိန်းချုပ် ပန်ဆန်းမြို့၌ သေနတ်ကျည်ဆံနှင့် လက်နက်ခဲယမ်းများ ခိုးယူရောင်းချခဲ့သည့် ‘ဝ’တပ်သားနှစ်ဦးကို အများပြည်သူရှေ့တွင် စီရင်ချက် ချမှတ်ခဲ့ရာ တစ်ဦးမှာ သေဒဏ်နှင့် အခြားတစ်ဦးကို နှစ်ရှည်ထောင်ဒဏ် အသီးသီး ချမှတ်ခဲ့ကြောင်း ဒေသခံများက ပြောသည်။

ပြစ်ဒဏ် စီရင်ချမှတ်ခံရသည့် ‘ဝ’တပ်သား ၂ ဦးသည် ပန်ဆန်းမြို့ရှိ UWSA ထောက်ပို့ရုံးမှဖြစ်ကြောင်း သိရပြီး ၂၀၂၄ ခုနှစ် မတ်လတွင် ကျည်ထောင့် ၈၀၀ ပါ လက်နက်သေတ္တာ ၄၀ ကို ခိုးယူခဲ့ပြီး အခြားသော တိုင်းရင်းသားလက်နက်ကိုင် တပ်ဖွဲ့များထံ ပြန်လည်ရောင်းချခဲ့သည်ဟု UWSA အရာရှိများက အမှုကြားနာစဉ် ပြောဆိုခဲ့သည်။

၎င်းတို့ခိုးယူခဲ့သည့် သေနတ်ကျည်ဆံများနှင့် လက်နက်ခဲယမ်းများကို TNLA တပ်ဖွဲ့ထံ ရောင်းချစဉ် ဖမ်းမိခဲ့ကြောင်း သတင်းထွက်ပေါ်လျက်ရှိရာ အတည်ပြုနိုင်ရန် ‘ဝ’ပြင်ပ ဆက်ဆံရေးတာဝန်ခံ ဦးညီရမ်းထံ သျှမ်းသံတော်ဆင့်မှ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

‘ဝ’တပ်သားနှစ်ဦးမှ ၎င်းတို့ခိုးယူခဲ့သည့် ကျည်တောင့် စုစုပေါင်း ၃၂၀၀၀ ထဲမှ ၁၀၀၀ ကို ကိုယ်တိုင်အသုံးပြုခဲ့ပြီး အခြားကျည်တောင့် ၃၁၀၀၀ ကို တစ်တောင့်လျှင် ၁၅ ယွမ်နှုန်းဖြင့် တိုင်းရင်းသားလက်နက်ကိုင် တပ်ဖွဲ့များထံ ရောင်းချခဲ့ခြင်းကြောင့် သေဒဏ်စီရင်ခံရခြင်းကြောင်း ဗွီဒီယိုမှတ်တမ်းများအရ သိရသည်။

UWSA ထိန်းချုပ် ပန်ဆန်းမြို့တွင် ပြုလုပ်ခဲ့သည့် ၎င်းတရားစီရင်ရေး အခမ်းအနားသို့ ကျောင်းသားကျောင်းသူများ၊ ဒေသခံပြည်သူများနှင့် ‘ဝ’တပ်ဖွဲ့ဝင်များကို လာရောက်ကြည့်ရှုရန် ‘ဝ’ပြည်သွေးစည်းညီညွတ်ရေးတပ်မတော် စစ်ဦးစီးချုပ်ရုံးက ညွှန်ကြားခဲ့ကြောင်း ဒေသခံများက ပြောသည်။

ပြီးခဲ့သည့် ဧပြီလ ၁၀ ရက်ကလည်း ကိုးကန့်တပ်ဖွဲ့ MNDAA သည် လားရှိုးမြို့ကို စစ်ကောင်စီထံ ပြန်မလွှဲအပ်မီ ၎င်းတို့ ဖမ်းဆီးရမိထားသည့် ရာဇဝတ်မှု ကျူးလွန်သူ (၈) ဦးကို အများပြည်သူရှေ့ သေဒဏ်နှင့် တစ်သက်တစ်ကျွန်းထောင်ဒဏ် စီရင်ချမှတ်ခဲ့သည်။

၎င်းရာဇဝတ်မှု ကျူးလွန်သူ (၈) ဦးထဲမှ မုဒိမ်းမှုကျူးလွန်သူ တစ်ဦးကို တစ်သက်တစ်ကျွန်း ထောင်ဒဏ် ချမှတ်ပြီး လူသတ်မှု၊ ခိုးမှုနှင့် လုယက်မှု ကျူးလွန်သူ အမျိုးသား (၇) ဦးတို့ကို သေဒဏ်ချမှတ်ခဲ့ပြီးနောက် လားရှိုးလေဆိပ်ဘက်တွင် MNDAA မှ ချက်ချင်းကွပ်မျက်ခဲ့ကြောင်း လားရှိုးဒေသခံများက ပြောသည်။

ပုံစာ – သေနတ်ကျည်ဆံ ခိုးရောင်းသည့် ‘ဝ’တပ်သားနှစ်ဦးကို UWSA မှ ပန်ဆန်းမြို့တွင် ပြစ်ဒဏ်စီရင်နေစဉ်