သျှမ်းပြည်တောင်ပိုင်း ညောင်ရွှေမြို့နယ် တောင်ပို့ကွဲကျေးရွာရှိ ဘုန်းကြီးကျောင်းကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။

ယနေ့ မေလ ၁၃ ရက် နံနက် ၆ နာရီဝန်းကျင်တွင် ညောင်ရွှေမြို့နယ် တောင်ပို့ကွဲကျေးရွာရှိ ဘုန်းကြီးကျောင်းကို စစ်ကောင်စီ လေကြောင်းဖြင့် ဗုံးကြဲတိုက်ခိုက်ခဲ့ပြီး လူထိခိုက် သေဆုံးမှုမရှိကြောင်း ဖယ်ခုံမြို့ဒေသခံ လူငယ်တစ်ဦးက သျှမ်းသံတော်ဆင့်ကို ပြောသည်။

“လူထိခိုက်မှုတော့ မရှိဘူး၊ ရွာသားတွေ စစ်ဘေးရှောင်ထားလို့ပါ။ ဘုန်းကြီးကျောင်းတော့ အပျက်အစီးများပါတယ်။ သူတို့က လေယာဉ်နဲ့ တစ်ညလုံးပတ်နေတာ၊ ဦးတည်ရာမရှိ ရမ်းသမ်းပစ်ချတာ” ဟု ၎င်းကပြောသည်။

တောင်ပို့ကွဲကျေးရွာသည် ညောင်ရွှေမြို့နယ်ထဲတွင် ပါဝင်သော်လည်း ဖယ်ခုံမြို့ အရှေ့ဘက်ကမ်းနှင့် ထိစပ်နေသည်။

လက်ရှိ စစ်ကောင်စီတပ်နှင့် ကရင်နီတော်လှန်ရေး အင်အားစုတို့ကြား တိုက်ပွဲသည် ညောင်ရွှေမြို့နယ် စွန့်စွဲ၊ နားကုန်း၊ ရေပူ၊ တောင်ပို့ကွဲနှင့် ဖယ်ခုံမြို့နယ် လွယ်ပေါရွာ အနီးတဝိုက်တွင် ဖြစ်ပွားနေကြောင်း ဖယ်ခုံမြို့ ဒေသခံ လူငယ်တစ်ဦးက ပြောသည်။

“အခုတိုက်ပွဲက စွန့်စွဲ၊ နားကုန်းရှမ်းရွာဖက်က တစ်ကြောင်းရယ်။ ရေပူ၊ တောင်ပို့ကွဲ၊ လွယ်ပေါ စစ်ကြောင်းရယ်။ ဖယ်ခုံ၊ မိုးဗြဲ စစ်ကြောင်းရယ် ဖြစ်နေတာ။ အခုထွက်ပြေးနေတာ ကျေးရွာ ၁၅ ရွာလောက်ရှိတယ်။ လူဦးရေကတော့ ထောင်ချီတယ်” ဟု ဖယ်ခုံမြို့ဒေသခံ လူငယ်တစ်ဦးက ထပ်လောင်းပြောသည်။

တောင်ပို့ကွဲဘုန်းကြီးကျောင်းကို စစ်ကောင်စီ လေကြောင်းဖြင့် ဗုံးမကြဲခင် ရှေးလကတည်းက ဘုန်းကျောင်းကြီးတွင် စစ်ဘေးရှောင်းများ စုပေါင်းခိုလှုံနေကြပြီး ဧပြီလမှစ၍ ထွက်ပြေးတိမ်းရှောင်ခဲ့ရကြောင်း သိရသည်။ လက်ရှိ တောင်ပို့ကွဲဘုန်းကြီးကျောင်းတွင် ကျေးရွာစောင့် ဒေသခံတချို့သာ ရှိသည်ဟု သိရသည်။