သျှမ်း – ကရင်နီ နယ်စပ် မိုးဗြဲမြို့ရှိ ဆည်မြောင်းထဲတွင် အကြောင်းရင်း မသိဘဲ ငါးများ အစုအပြုံလိုက် သေဆုံးခြင်းကြောင့် ရေမသန့်ရှင်းမှု ဖြစ်သဖြင့်  ပြည်သူများအတွက် သောက်သုံးရေ အခက်အခဲ ကြုံနေကြောင်း စုံစမ်းသိရသည်။

တိုက်ပွဲပြင်းထန်နေသည့် မိုးဗြဲမြို့ရှိ ဆည်မြောင်းထဲတွင် မေလဆန်းပိုင်းမှ စတင်၍ ငါးများ အစုလိုက်အပြုံလိုက် အကြောင်းရင်းမသိရဘဲ သေဆုံးခဲ့ပြီး စစ်ကောင်စီတပ်၏ အဆိပ်ငွေ့ဗုံးကြောင့် ဖြစ်နိုင်ကြောင်း မိုးဗြဲမြို့ ဒေသခံများက ပြောသည်။

ထိုကဲ့သို့ ဆည်မြောင်းအတွင်း ငါးများ အစုလိုက်အပြုံလိုက် သေဆုံးနေသည့်အပြင် စစ်ကောင်စီမှ ပစ်ခတ်သော အဆိပ်ငွေ့ဗုံးများ ဆည်မြောင်းထဲ ကျရောက်ပေါက်ကွဲကာ ရေမသန့်ရှင်းမှု ဖြစ်ပွားစေပြီး ပြည်သူများအတွက် သောက်သုံးရေ အခက်အခဲ ကြုံတွေ့စေကြောင်း သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။ 

“ချောင်မြောင်းတဝိုက်နေတဲ့ ဒေသခံက အဲ့မြောင်း‌ရေတွေကို မှီခိုပြီး သောက်ရေ၊ သုံးရေအဖြစ် သုံးနေတာ ရှိတယ်။ အဲ့လိုကြောင့် လူတွေ ရာနဲ့ချီ အခက်အခဲ ကြုံနေရတာတွေ့တယ်။ ရေထဲ အဆိပ်ခတ်တာလား မခတ်တာလား ဆိုတာထက် ငါးကတော့ အများကြီး သေနေတာ။ သူတို့ အဆိပ်ဗုံးတွေ ကြဲလို့ မြောင်းတွေထဲ ကျနေတာလည်း ကိုယ်တိုင်မြင်နေတာလေ”ဟု ၎င်းသတရင်းမြစ်တစ်ဦးက ပြောသည်။

ထိုဆည်မြောင်းအတွင်း သေဆုံးနေသည့် ငါးများကို စားသုံးမိသူများသည် လည်ချောင်းယားခြင်း၊ ခေါင်းမူးခြင်းနှင့် အော့အန်ခြင်းတို့ ဖြစ်ပြီး၊ သေဆုံးနေသည့် ငါးများကို ဖမ်း၍ စားသုံးခြင်း၊ ရောင်းချခြင်း မလုပ်ဘဲ သတိထားရန် လိုအပ်ကြောင်း ၎င်းက ဆက်ပြောသည်။ 

မိုးဗြဲမြို့ကို တော်လှန်ရေးတပ်ဖွဲ့မှ ထိန်းချုပ်နိုင်သော်လည်း မိုးဗြဲမြို့အခြေစိုက် ခမရ (၄၂၂) တပ်နှင့် မိုးဗြဲဆည်ကို လက်ရှိအချိန်ထိ ထိန်းချုပ်နိုင်ခြင်းမရှိကြောင်း သိရသည်။

သျှမ်း – ကရင်နီ နယ်စပ် မိုးဗြဲမြို့တွင် စစ်ကောင်စီတပ်နှင့် တော်လှန်ရေး တပ်‌ပေါင်းစုတို့အကြား ၂၀၂၅ နှစ်ဆန်းပိုင်းမှ စ၍ လက်ရှိအချိန်ထိ လေးလကျော်ကြာ နေ့စဉ်နီးပါး တိုက်ပွဲပြင်းထန်နေပြီး လေကြောင်းတိုက်ခိုက်မှုအပြင် လက်နက်ကြီး၊ ဒရုန်း၊ အဆိပ်ငွေ့ဗုံးနှင့် မီးလောင်ဗုံးများကို စစ်ကောင်စီဘက်မှ အသုံးပြုတိုက်ခိုက်ပြီး နှစ်ဘက်ထိခိုက်ကျဆုံးမှု များနေ‌ကြောင်း သိရသည်။