သျှမ်းပြည် တန့်ယန်းမြို့နယ် နားဟုတ်ကျေးရွာအုပ်စု ပိန်းမုံကျေးရွာတွင် ကျားဖြန့်လုပ်ငန်း လုပ်ကိုင်သူ တရုတ်နိုင်ငံသား (၁၆၅) ဦးကို စစ်ကောင်စီမှ ဝင်ရောက်ဖမ်းဆီးခဲ့ကြောင်း စုံစမ်းသိရသည်။
မတ်လ ၁၂ ရက်တွင် တန့်ယန်းမြို့နယ် နားဟုတ်ကျေးရွာအုပ်စု ပိန်းမုံ(ပဵင်းမူင်ႈ) ကျေးရွာတွင် ကျားဖြန့်လုပ်ငန်း လုပ်ကိုင်နေသူများကို စစ်ကောင်စီ လက်အောက်ခံ ရဲတပ်ဖွဲ့နှင့် မိုင်းဟပြည်သူ့စစ်တို့ ဝင်ရောက်ဖမ်းဆီးခဲ့ရာ တရုတ်နိုင်ငံသား (၁၆၅) ဦးနှင့် မြန်မာနိုင်ငံသား ၁ ဦး ဖမ်းဆီးခံလိုက်ရကြောင်း တန့်ယန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“၁၂ ရက်နေ့က စစ်ကောင်စီနဲ့ မိုင်းဟပြည်သူစစ်တွေ ပေါင်းပြီး ဝင်ဖမ်းကြတာ တရုတ်လူမျိုးတွေပဲ။ နားဟုတ်ကျေးရွာ အုပ်စုထဲမှာမှ ပိန်းမုံ(ပဵင်းမူင်ႈ)ကျေးရွာမှာ သွားဖမ်းကြတာ။ ကျားဖြန့်ဂိုဒေါင်တွေကိုလည်း စစ်တပ်က အကုန်ဖြိုလိုက်တယ်၊ စက်ပစ္စည်းတွေ ဖုန်းတွေ ကွန်ပျူတာတွေနဲ့ လူ (၁၆၅) ယောက်ကိုတော့ ၁၆ ဘီးကား နှစ်စီးနဲ့ တန့်ယန်းမြို့ကို သယ်သွားကြတယ်”ဟု ၎င်းဒေသခံ အမျိုးသားက ပြောသည်။
အဆိုပါ ဖမ်းဆီးရမိသည့် အွန်လိုင်းကျားဖြန့် လုပ်ကိုင်သူများကို တန့်ယန်းမြို့သို့ သယ်ဆောင်သွားပြီး ဥပဒေနှင့်အညီ တရားစွဲဆို ဆောင်ရွက်နိုင်ရန်နှင့် ပြည်ပနိုင်ငံသားများကို လူသားချင်း စာနာထောက်ထားမှုအရ သက်ဆိုင်ရာနိုင်ငံသို့ ပြန်လည်လွှဲပြောင်း ပေးမည်ဖြစ်ကြောင်း စစ်ကောင်စီဘက် ယမန်နေ့ (မတ်လ ၁၃ ရက်) တွင် သတင်းထုတ်ပြန်သည်။
တန့်ယန်းမြို့နယ်အတွင်း အွန်လိုင်းကျားဖြန့် လုပ်ကိုင်နေသူများကို ယမန်နှစ် ၂၀၂၄ နိုဝင်ဘာလအတွင်းက ‘ဝ’တပ်ဖွဲ့ UWSA မှ ပထမဆုံး ဖမ်းဆီးခဲ့ရာ လူ (၈၀၀) ကျော်ကို ၎င်းထိန်းချုပ် နယ်စပ်ဂိတ်မှတဆင့် တရုတ်ရဲတပ်ဖွဲ့ထံ လွှဲပြောင်းပေးခဲ့သည်။
အလားတူ ပြီးခဲ့သည့် ဖေဖော်ဝါရီလ (၅) ရက်မှ (၉) ရက်အတွင်း မိုင်းရယ်မြို့နယ် မိုင်းဟဒေသရှိ မုံးဟ-မုံးဟင်းပြည်သူ့စစ် နယ်မြေတွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီတပ်မှ ဝင်ရောက်ဖမ်းဆီးခဲ့ရာ ဗီယက်နမ်နှင့် တရုတ်နိုင်ငံသား အပါအဝင် (၁၀၀) ကျော် ဖမ်းဆီးရမိခဲ့ကြောင်း ဒေသခံများက ပြောသည်။
ဖေဖော်ဝါရီလ နောက်ဆုံးပတ်တွင် တန့်ယန်းမြို့နယ်အတွင်း ပြောင်းရွှေ့အခြေစိုက်ထားသည့် အရှေ့မြောက်တိုင်း စစ်ဌာနချုပ် (ရမခ) တိုင်းမှူး ဗိုလ်ချုပ် ကျော်မြင့်ထွန်း အပါအဝင် တန့်ယန်းနှင့် မိုင်းရယ်စစ်ဗျူဟာမှူး တို့ကို စစ်ကောင်စီက ကျားဖြန့်ကိစ္စနှင့် ဆက်စပ်၍ ဖမ်းဆီးပြီးနောက် နေပြည်တော်သို့ ခေါ်ယူစစ်ဆေးခဲ့ပြီး တိုင်းမှူးနှင့် ဗျူဟာမှူးတို့ကို အသစ်ခန့်အပ်လိုက်သည်။
သျှမ်းပြည်မြောက်ပိုင်းရှိ စစ်ကောင်စီ ထိန်းချုပ်ထားနိုင်သည့် တန့်ယန်းနှင့် မိုင်းရယ်မြို့နယ်တို့တွင် ‘ဝ’တပ်ဖွဲ့ UWSA ၊ သျှမ်းတပ် SSPP/SSA ၊ ကိုးကန့်တပ် MNDAA တို့လည်း တပ်စွဲထားပြီး ပြည်သူ့စစ်ထိန်းချုပ် နယ်မြေအတွင်း ရွှေ့ပြောင်းလုပ်ကိုင်နေသည့် ကျားဖြန့်ရုံ အများအပြား ကျန်ရှိနေသေးကြောင်း ဒေသခံများက ပြောသည်။
Leave a Comments