သျှမ်းပြည် ကျောက်မဲမြို့နယ်တွင် တအာင်း(ပလောင်)အမျိုးသားလွတ်မြောက်ရေးတပ်မတော် (TNLA)သည် အမျိုးသမီးအပါအဝင် အရပ်သား ၁၆ဉီးကို ကျွန်းပင်ခုတ်သည့်သူများကို ဖမ်းဆီးခေါ်ဆောင်သွားကြောင်း သတင်းရရှိသည်။
ဖြစ်စဉ်မှာ ယမန်နေ့ (ဇန်နဝါရီ ၂၁)ရက် မှ ယနေ့ (ဇန်နဝါရီ ၂၃)ရက်အထိ TNLA တပ်သားများသည် ကျောက်မဲမြို့နယ် ပန်ပေါင်း၊ လုံကြိမ်၊ ကျောင်းကုန်၊ မန်ကျောင်း၊ နောင်ပိတ် စသည် အရပ်သားများကို ကျွန်းပင်ခုတ်သည်ဟု စွပ်စွဲကာ လိုက်လံဖမ်းဆီးမှုများပြုလုပ်နေကြောင်း ကျောက်မဲဒေသခံ အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
“ ကျွန်းပင်ခုတ်လို့ဆိုပြီး လိုက်ဖမ်းနေတာ။ အသက်ကြီးသူရော ငယ်သူရော အမျိုးသမီးရော အကုန်လုံးကိုဖမ်းနေတာ။ တချို့ကျတော့ ပြေးတယ်။ တချို့ကျတော့ ဖမ်းခံရတယ်။ အခုဆိုရင် ရွာမှာ အမျိုးသားတွေ မရှိသလောက်ပါပဲ။ ရုတ်တရက်ဝင်ဖမ်းတယ်။ ရွာလူကြီးလည်း ဖမ်းသွားတယ်” ဟု ၎င်းအမျိုးသမီးက ဆိုသည်။
ယနေ့ထိ TNLA ဖမ်းဆီးခေါ်ဆောင်သွားခံရသည့် စာရင်းများတွင် ကလေး တစ်ဉီး အမျိုးသား (၁၂)ဉီး နှင့် အမျိုးသမီး ၄ဉီး ပါဝင်ကြောင်း၊ ထိုဖမ်းဆီးခံရသူများကို TNLA က နောင်ချိုမြို့ ရဲစခန်းတွင် ခေါ်ဆောင်သွားပြီး ထိန်းသိမ်းထားကြောင်း သိရသည်။
“လုံကြိမ်ကျွေရွာ အုပ်ချုပ်ရေးမှုးကိုလည်း TNLA က လက်ထိပ်ခက်ပြီးတော့ တအိမ်တက် တအိမ်ဆင်း လိုက်ပိုခိုင်းပြီး ဖမ်းနေတယ်။ လုံကြိမ်ရွာသွားတွေကတော့ ထွက်ပြေးကြပြီ မနေရဲကြဘူး။ အခုက TNLA ကရွာထဲ ဝင်မွှေနေတော့ စာရင်းယူဖို့ကခက်တယ်။ ဖမ်းခံထားရတဲ့လူတွေက ဒီထက်များတယ် ”ဟု နောင်ချို ဒေသခံအမျိုးသားတစ်ဦးပြောသည်။
ကျောက်မဲမြို့နယ်အတွင်းစစ်ကောင်စီလေကြောင်းဖြင့် ဗုံးကြဲတိုက်ခိုက်ခြင်း၊ လက်နက်ကြီးဖြင့် ရမ်းသမ်းပစ်ခတ်ခြင်းတို့ကြောင်း နေအိမ်အမြောက်အများပျက်စီးခဲ့သည်။ ထို့ကြောင့် ကျောက်မဲဒေသခံများသည် နေအိမ်ကို ပြင်ဆင်ရန် အတွက် သစ်ပင်သွားရောက်ခုတ်ယူခြင်းဖြစ်သည်။
ထိုကျွန်ပင်များသည် ယခင်အစိုးရလက်ထက်တွင် စီမံချက်ဖြင့် မဖြစ်မနေ အိမ်တိုင်းစိုက်ခဲ့သည့် အပင်များဖြစ်ပြီး၊ ယခင်တွင်လည်း အိမ်ဆောက်လုပ်ခြင်း၊ ဒေသခံများ လိုအပ်ပါက သက်ဆိုင်ရာမှ အသုံးပြုခိုင်းကြောင်း၊ ကျွန်းပင်ကို ခုတ်မရောင်းဘဲ မိမိနေထိုင်သည့်နေအိမ်အတွက် အသုံးလိုအပ်လျှင် ခုတ်ယူနိုင်ကြောင်းလည်း ခေတ်အဆက်ဆက်က သတ်မှတ်ခဲ့သည်။
“ ဒီကျွန်းပင်တွေက ဒေသခံတွေစိုက်ခဲ့တာပဲ။ ရောင်းစားတာမဟုတ်ရင် ခုတ်ပြီးသုံးလို့ရတယ်။ နောက်ပြီး အဝေးကို သွားမခုတ်တာကလည်း မြေမြုပ်မိုင်းကြောက်လို့လေ။ အခုက ဒေသခံတွေခုတ်တယ်ဆိုတာကလည်း အိမ်အတွက်ခုတ်ကြတာပါ” ဟု ကျောက်မဲဒေသခံအမျိုးသမီးက ထပ်လောင်းပြောသည်။
လက်ရှိ ကျွန်းခုတ်သည့်သူများကို ဖမ်းဆီးမှုများနှင့် ပတ်သက်၍ တအာင်း(ပလောင်) အမျိုးသားလွတ် မြောက်ရေးတပ်မတော် TNLA တို့၏ သက်ဆိုင်ရာ ဝာာဝန်ရှိသူများကို ဆက်သွယ်မေးမြန်းထားပါသော်လည်း ပြန်လည်းဖြေကြားခြင်းမရှိသေးပေ။
၁၀၂၇ စစ်ဆင်ရေး ဒုတိယလှိုင်းအတွင်း TNLA မှ ကျောက်မဲမြို့ကို ပြီးခဲ့သည့် ၂၀၂၄ ခုနစ် ဩဂုတ်လ (၆) ရက်တွင် သိမ်းပိုက်နိုင်ခဲ့သည်။
Leave a Comments