သျှမ်းပြည် မိုးဗြဲမြို့တွင် စစ်ကောင်စီ၏ ဒရုန်းဗုံးများတွင် အဆိပ်ငွေ့ပြားများကို ထည့်ပြီဂ အသုံးပြုတိုက်ခိုက်နေကြောင်း ကရင်နီအမျိုးသား ကားကွယ်ရေးတပ် (KNDF) မှ ယနေ့ (ဒီဇင်ဘာလ ၁၃ ရက်)တွင်ထုတ်ပြန်ခဲ့သည်။

သျှမ်းပြည် မိုးဗြဲမြို့တွင် အခြေစိုက် ထားသည့် စစ်ကောင်စီတပ် ခြေမြန်တပ်ရင်း- ခမရ (၄၂၂) တပ်သည် ပြီးခဲ့သည့် (ဒီဇင်ဘာလ ၇)၊နှင့် (ဒီဇင်ဘာ ၈ ) ရက်တွင် မိုးဗြဲမြို့နှင့်ပတ်ဝန်းကျင် အနီးတစ်ဝိုက်ကို ဒရုန်းဖြင့် ဗုံးကြဲတိုက်ခိုက်ရာတွင် S – PHOS (အက်စ်ဖော့စ်) တံဆိပ်ပါ ၅၆၀ အဆိပ်ငွေ့ပြားများကို ထည့်သွင်းအသုံးပြုခဲ့ကြောင်း စစ်ရေးနှင့် နီးစပ်သူအမျိုးသားတစ်ဦးက သျှမ်းသံတော်ဆင့်ကိုပြောသည်။

“ဟုတ်ပါတယ်သူတို့က ဒရုန်းတွေမှာတပ်ပြီး သုံးတာပါ။ စစ်ကောင်စီတွေက သူတို့ စစ်ရှုံးလာတာနဲ့ အမျှ ဒီလို အဆိပ်ငွေ့တွေကို သုံးမယ်ဆိုတာကို ကျနော်တို့က အစကတည်းကထင်ထား ပြီးသားပါ။သူတို့က မိုးဗြဲနဲ့အနီးတစ်ဝိုက်တွေမှာ သုံးနေတာပေါ့ အတိအကျတော့မပြောတော့ပါဘူး။”ဟု စစ်ရေးနှင့် နီးစပ်သူအမျိုးသားတစ်ဦးက ပြောသည်။

ထိုအဆိပ်ငွေ့ပြားများကို ဗုံးသီးများနှင့်အတူ ထည့်သွင်းအသုံးပြုတိုက်ခိုက်ပြီး ထွက်လာသောမီးခိုးများမှ ရှူရှိက်မိသော ရဲဘော်အချို့သည် မူးဝေခြင်း၊ အော့အန်ချင်စိတ်ဖြစ်ခြင်း ၊ အိပ်ချင်လာခြင်း နှင့် အားပျက်ခြင်း စသည့်ဝေဒနာများကို ခံစားရသည်။

ထို့ကြောင့် ထိုနေရာများကို သွားရောက်စစ်ဆေးခဲ့ရာ စစ်ကောင်စီက အဆိပ်ငွေ့သုံးတိုက်ခိုက်သည့် သက်သေများရရှိလာကြောင်းသိရသည်။

စစ်ကောင်စီမှ အဆိပ်ငွေ့ပြားများကိုထည့်သွင်းအသုံးပြုခြင်းကြောင့် အရပ်သားဒေသခံများကို သတိကြီးစွာထား၍ မိမိတို့၏ပတ်ဝန်းကျင်တွင် ဒရုန်းများပျံဝဲနေခြင်း၊တိုက်ခိုက်ခံရသည့် နေရာများတွင် သွားရောက် စူးစမ်းခြင်းမျိုးမလုပ်ဘဲ လုံခြုံနေရာတွင် သတိပြုနေထိုင်ကြရန် (KNDF) မှတိုက်တွန်းထားသည်။

စစ်ကောင်စီတပ်မှ ဖယ်ခုံ၊ လွိုင်ကော်နှင့် မိုးဗြဲဘက်သို့ စစ်အင်အား အလုံးအရင်းဖြင့် တိုးချဲ့အင်အားဖြည့်တင်းပြီးနောက် ကရင်နီတော်လှန်ရေးတပ်ပေါင်းစုတို့နှင့် တင်မာမှုများရှိနေကြောင်း သိရသည်။

အလားတူ ပြီးခဲ့သည့် ဒီဇင်ဘာလ (၇)ရက် ရပ်စောက်မြို့နယ် ကျောက်ဂူဒေသတွင်လည်း စစ်ကောင်စီက ဓာတုအဆိပ်ငွေ့ ဗုံးများကိုအသုံးပြုတိုက်ခိုက်ခဲ့သည့်အတွက် စစ်ဘေးရှောင်များအပြင် ဓနုပြည်သူ့ လွတ်မြောက်ရေးတပ်တော် (DPLA) တပ်သားများလည်း အဆိပ်သင့်ပြီး မူးဝေ အော့အန်ခြင်းများ ဖြစ်ခဲ့ကြောင်း သိရသည်။