ထိုင်း-မြန်မာနယ်စပ် တာချီလိတ်မြို့ နယ်စပ်ဂိတ်ပေါက်တွင် ထိုင်းနိုင်ငံသို့ PV (Passport Visit) နိုင်ငံကူးလက်မှတ် ကိုင်ဆောင်ထားသူများကို လက်ရှိ ယာယီပိတ်ထားကြောင်း စုံစမ်းသိရသည်။
နိုဝင်ဘာလ ၂၃ ရက်မှ စတင်ပြီး ထိုင်း-မြန်မာနယ်စပ်ရှိ တာချီလိတ်မြို့ နယ်စပ်ဂိတ်ပေါက်တွင် PV ပက်စပို့စ် နိုင်ငံကူးလက်မှတ်ဖြင့် ထိုင်းနိုင်ငံသို့ သွားရောက်မည့်သူများကို စတင်ပိတ်ပင်လိုက်ပြီး အလည်အပတ် ဗီဇာကိုလည်း စစ်ဆေးမှု တင်းကြပ်နေကြောင်း မြို့နယ်ဒေသခံ ဖြစ်စဉ်သိရှိသူတစ်ဦးက သျှမ်းသံတော်ဆင့်ကို ပြောသည်။
“ဒီလ ၂၃ ရက်က စပိတ်လိုက်တာ PV ကိုင်ဆောင်ထားတဲ့ သူတွေပေါ့။ အရင်ကတော့ ပိုက်ဆံထိုးပေးရင် ရတယ်လေ။ ပိုက်ဆံထိုးပေးပြီး သွားတဲ့သူတွေ အများကြီးပဲ၊ အခုက အထက်လူကြီးကြောင့် ယာယီပိတ်ထားတယ် ပြောတယ်။ အလည်အပတ် ဗီဇာကိုလည်း ဆေးရုံထောက်ခံစာ အပြည့်အစုံ ပါ မပါ စစ်ဆေးမှုတွေ တင်းကြပ်လာတယ်”ဟု ၎င်းဒေသခံ အမျိုးသားက ပြောသည်။
အလားတူ ပြီးခဲ့သည့် ဩဂုတ်လမှ စတင်ပြီး ရန်ကုန် အပြည်ပြည်ဆိုင်ရာ လေဆိပ်တွင် စစ်ကောင်စီက PV နိုင်ငံကူးလက်မှတ်ဖြင့် ပြည်ပထွက်ခွာသူများကို တင်းကြပ်စစ်ဆေးခဲ့ပြီး ပြည်ပထွက်ခွင့် မပြုမှု များပြားလာခြင်းကြောင့် ထိုင်း-မြန်မာနယ်စပ် တာချီလိတ်မြို့ နယ်စပ်ဂိတ်မှတဆင့် ထိုင်းဘက်ဝင်ရောက်မှု ပိုမိုတိုးများလာကြောင်း ဒေသခံတစ်ဦးက ပြောသည်။
“ဩဂုတ်လ ကတည်းက စစ်တပ်က လေဆိပ်ကနေ ပြင်ပကို ပေးမထွက်တာလေ။ အဲ့ကနေပဲ ဒီတာချီလိတ်ဘက်ကနေ ဝင်ကြတယ်၊ တော်တော်များတယ် ဝင်တဲ့သူတွေ။ အခုက ဒီလို ယာယီပိတ်လိုက်တာက အရင်လ ချင်းရိုင်းလမ်းမပေါ်မှာ ရန်ဖြစ်ကြပြီး ရဲတွေစစ်တော့ ယာယီဗီဇာနဲ့ လာသူတွေ တွေ့လို့ ပိုတင်းကြပ်တာပေါ့”ဟု ၎င်းဖြစ်စဉ်သိရှိသူက သျှမ်းသံတော်ဆင့်ကို ပြောသည်။
တာချီလိတ်မြို့သည် ထိုင်း-မြန်မာနယ်စပ် ကုန်သွယ်ရေးမြို့ဖြစ်ပြီး မြန်မာနိုင်ငံတဝှမ်း စစ်အာဏာသိမ်းပြီးနောက် နေရာအနှံ့ တိုက်ပွဲဖြစ်ပွားနေသော်လည်း တာချီလိတ်မြို့တွင် တိုက်ပွဲမဖြစ်ပွားသေးဘဲ ကူးသန်းရောင်းဝယ်ရေး စည်ကားသည့် နေရာဒေသဖြစ်သည်။
ထို့အပြင် တာချီလိတ်မြို့တွင် တည်ရှိသည့် ရှဲန်လိုင်အပန်းဖြေနေရာနှင့် ရွှေပန်းအောင်ဟိုတယ်တို့တွင် ကျားဖြန့် ခေါ် အွန်လိုင်းငွေလိမ်ဂိုဏ်းများ တကျော့ပြန် လှုပ်ရှားနေသည်ကို မြင်တွေ့နေရကြောင်း ဒေသခံများက ပြောဆိုသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments