မြန်မာ-ထိုင်းနယ်စပ် တာချီလိတ်မြို့တွင် ရေကြီးရေလျှံ ဖြစ်ပွားပြီးနောက် လမ်းပေါ် တင်ကျန်နေသေးသော ရွှံ့နွံများကြောင့် ဆိုင်ကယ်များ လမ်းချော်တိမ်းမှောက်ပြီး နောက်မှအရှိန်ဖြင့် မောင်းလာသည့် ကားမှ ထပ်ဆင့်ဝင်တိုက်ကာ အမျိုးသမီးတစ်ဉီး သေဆုံးခဲ့ရကြောင်း သတင်းရရှိသည်။
ယနေ့ (အောက်တိုဘာလ ၁၄ ရက်) နံနက်ပိုင်းတွင် တာချီလိတ်မြို့ လွယ်စတုံးသွားသည့် လမ်းပေါ်တွင် အမျိုးသမီးနှစ်ဦး ဆိုင်ကယ်ဘီးချော်၍ တိမ်းမှောက်မှုဖြစ်ကာ နောက်တွင် အရှိန်ဖြင့် လိုက်ပါမောင်းလာသည့် ကားကြိတ်မိ၍ အမျိုးသမီးတစ်ဦး သေဆုံးခဲ့ကြောင်း တာချီလိတ်ဒေသခံများက ပြောသည်။
“ဒီနေ့ဖြစ်သွားတာက အမျိုးသမီးနှစ်ယောက် ဆိုင်ကယ်မောင်းလာတာ၊ ဆိုင်ကယ်မှောက်ပြီးတော့ နောက်ကားက ခေါင်းကို တက်ကြိတ်သွားတာ။ တော်တော်လေးကို ကြောက်ဖို့ကောင်းတယ်။ အမျိုးသမီး တစ်ယောက် သေပြီး တစ်ယောက်တော့ လွတ်သွားတယ်”ဟု တာချီလိတ်မြို့ ဒေသခံ အသက် (၃၀)နှစ် ဝန်းကျင် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ ပြီးခဲ့သည့် အောက်တိုဘာလ (၁၁) ရက်တွင်လည်း တာချီလိတ်မြို့နေ ကျောင်းဆရာ ဦးတင်နိုင်ထွဋ် သည် လမ်းပေါ်ရှိ ရွှံ့နွံများကြောင့် ဆိုင်ကယ်တိမ်းမှောက်ကား ကားတိုက်မှုကြောင့် သေဆုံးသွားခဲ့ရကြောင်း ဒေသခံများထံမှ သိရသည်။
တာချီလိတ်မြို့ တွင် ရေကြီးရေလျှံ ဖြစ်ပွားပြီးနောက် လမ်းမကြီးပေါ်တွင် တင်ကျန်နေသော ရွှံ့နွံနှင့် နုန်းမြေများကို သက်ဆိုင်ရာ တာဝန်ရှိသူများမှ ယနေ့အချိန်ထိ သေချာစွာ တာဝန်ယူ ဖြေရှင်းပေးခြင်းမရှိကြောင်း တာချီလိတ်မြို့ ဒေသခံ အသက် (၃၀)နှစ် ဝန်းကျင် ၎င်းဒေသခံအမျိုးသမီးက သျှမ်းသံတော်ဆင့်ကို ပြောသည်။
“စစ်ကောင်စီတွေ ရှင်းပေးတာလဲ မတွေ့ဘူး။ စည်ပင်တွေလည်း ဟန်ပြလောက်ပဲ လုပ်ပြတာလေ၊ သေချာလုပ်တာမှ မဟုတ်တာ။ လမ်းပေါ်မှာက နဂါးနှစ်ကောင်ကနေ ဆန်ဆိုင်းအထိ ရေတွေ ရှိနေတုန်း။ မြောင်းတွေလည်း ပြည့်လို့ ရွှံ့နွံတွေက။ ဆိုင်ကယ်စီးတဲ့ လူတွေလည်း နေ့တိုင်းမှောက်တယ်”ဟု တာချီလိတ်မြို့မှ ဒေသခံအမျိုးသမီးက ဆက်ပြောသည်။
မြို့တွင်း သန့်ရှင်းရေးလုပ်၍ စွန့်ပစ်မည့် ရွှံ့နွံများကို မြို့ပြင်နေရာ အသီးသီးသို့ ကားဖြင့် သယ်ဆောင်ပြီး စွန့်ပစ်လျက်ရှိရာ လမ်းတလျှောက်တွင် စည်းကမ်းမဲ့စွာ သယ်ဆောင်လာသည့် ယာဉ်များကြောင့် ကားလမ်းပေါ် ရွှံ့နွံအများအပြား ဖိတ်စင်ခဲ့ကာ လမ်းချော်မှုများ မကြာခဏဖြစ်ပွားပြီး ဆိုင်ကယ်တိမ်းမှောက်၍ နေ့စဉ် အသေးအမွှား ဒဏ်ရာများအပြင် ခြေလက်ကျိုးသည်အထိ ဖြစ်ပွားခဲ့ပြီး လူသေဆုံးသည့် အဆင့်အထိ ရှိလာကြောင်း သိရသည်။
သျှမ်းပြည်တစ်ဝိုက်တွင် သစ်ထုတ်လုပ်မှု၊ ရွှေတူးဖော်ရေးလုပ်ငန်း၊ ကျောက်မီးသွေး တူးဖော်ရေး လုပ်ငန်းများကို လုပ်ကိုင်တူးဖော်ချိန်တွင် သစ်ပင်များကိုသာ အဓိကထားပြီး ခုတ်ပစ်ခြင်းကြောင့် ယခုကဲ့သို့ ရေကြီးရေလျှံမှုများ မထိန်းနိုင်သည့်အတွက် ရေစီးဆင်းမှုနှုန်းကို ပိုမိုလျင်မြန်စေကြောင်း သိရသည်။
ယခုနောက်ပိုင်း သျှမ်းပြည်အရှေ့ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တု တူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝပတ်ဝန်းကျင် ယခင်ကထက် ပိုမိုပျက်စီးကာ မိုးရာသီတွင် ရေကြီးရေလျှံမှု ဖြစ်ပြီး၊ နွေရာသီတွင် ရေခမ်းခြောက်မှုကို ပြည်သူများ ကြုံတွေ့လာရသည်။
Leave a Comments