ယခုရက်ပိုင်းအတွင်း ရေဘေးကူညီရန်အတွက် ငွေလွဲသည့် KBZ Pay အကောင့်များနှင့် ပြည်သူများ၏ အကောင့်များကို ငွေကြေးခဝါချမှုဆိုင်ရာတိုက်ဖျက်ရေးအဖွဲ့မှ သံသယရှိသည်ဟုဆိုသည့် အကြောင်းပြချက်ဖြင့် ပိတ်ခံရမှုများရှိနေကြောင်း စုံစမ်းသိရှိရသည်။

စက်တင်ဘာလ ပထမအပတ်မှစတင်၍ မြန်မာနိုင်ငံအနှံ့ဖြစ်ပွားနေသော ရေကြီးရေလျှံမှုများကြောင့် ရေဘေးရှောင်နေရသည့် ပြည်သူများအား ပြည်တွင်းပြည်ပမှ အလှူရှင်များက တတ်နိုင်သည့်ဖက်မှ ကူညီနေကြသော်လည်း အချို့နေရာများတွင် KBA Pay အကောင့်များကို အကြောင်းအရင်းမရှိ ပိတ်ခံနေရကြောင်း ကိုယ်တိုင်ကြုံတွေ့သည့် ပြည်သူတစ်ဦးက သျှမ်းသံတော်ဆင့်သို့ပြောသည်။

“၁၆ ရက်က ပိတ်ခံရတာ၊ အကြောင်းအရင်းမရှိပဲ ဒီတိုင်းပိတ်လိုက်တာ call center ကိုဆက်တော့လည်း ငွေကြေးခဝါချမှုတိုက်ဖျက်ရေးအဖွဲ့က သံသယရှိလို့ ဆိုပြီး ဘာမှလည်း မလုပ်ပေးဘူး” ဟု ၎င်းကပြောသည်။

အလားတူ ကရင်ပြည်နယ်တွင်နေထိုင်သည့် ပြည်သူတစ်ဦး လည်း အကောင့်အပိတ်ခံရပြီး တစ်ပတ်အကြာတွင် ဖုန်းဆင်းမ်ကဒ်ကိုပါ အပိတ်ခံရကြောင်း သိရသည်။

“Kpay အကောင့်ပိတ်ခံရပြီး တစ်ပတ်လောက်နေတော့ ဖုန်း ဆင်းမ်ကဒ်ကိုပါ ပိတ်ချလိုက်တာ၊ ရေဘေးတောင်မလှူရသေးဘူး၊ ၁၆ ရက်နေ့ ညကလည်း တော်တော်များများ အပိတ်ခံရတယ်လို့ပြောတယ် အကြောင်းမရှိ အကြောင်းရှာပြီးတော့ ပိတ်နေတာ” ဟု အကောင့်ပိတ်ခံရသည့်သူက ပြောသည်။​

ထိုသို့ အပိတ်ခံရမှုများအကြောင်းလိုင်းပေါ်တင်သည့် ပြည်သူများကို စစ်တပ်၏လော်ဘီဖြစ်သည့် ဟန်ငြိမ်းဦးမှ ၎င်း၏ တယ်လီဂရမ်ချန်နယ်တွင် ပြည်သူများ ရေဘေးအတွက် ငွေမလှူရဲအောင် မဟုတ်မမှန်သတင်းလွှင့်သည်ဟုဆိုကာ စွပ်စွဲပြောဆိုမှုများလည်းရှိကြောင်းသိရသည်။

ရေဘေးသင့်ပြည်သူများ ကယ်ဆယ်ရေးနှင့် ပြန်လည်ထူထောင်ရေးအတွက် ကမ္ဘောဇဘဏ် ငွေကျပ် (၁၀) ဘီလျံအား မတည်လှူဒါန်းထားသည်ဟု ကြေညာထားပြီး မြေပြင်၌ တပိုင်တနိုင်ပါဝင်ကူညီနေသည့် ပြည်သူများ၏ အကောင့်များကိုတော့ စစ်ကောင်စီ၏ ပြည်ထဲရေးဝန်ကြီးဌာနမှ ဖွဲ့စည်းထားသည့် ငွေကြေးဆိုင်ရာစုံစမ်းထောက်လှမ်းရေးအဖွဲ့မှ အကြောင်းအရင်းအမျိုးအမျိုးဖြင့် လိုက်လံပိတ်ပင်နေခြင်းဖြစ်သည်။

အလုပ်သင် သတင်းထောက် ယူဂျင်း ရေးသားသည်။