သျှမ်းပြည် အရှေ့ပိုင်း မိုင်းတုံမြို့နယ်တွင် ‘ဝ’ပြည်သွေးစည်းညီညွတ်ရေးတပ်မတော် UWSA မှ အသက် (၁၅) နှစ်အထက် ကျား၊မ အားလုံးကို လူသစ်စုဆောင်းပြီး စစ်သင်တန်းပေးနေကြောင်း စုံစမ်းသိရသည်။
ဩဂုတ်လဆန်းပိုင်းမှ စတင်ပြီး မိုင်းတုံမြို့နယ်အတွင်းရှိ မုံးထော်-မုံးထ၊ ဟွေအော်၊ ဟိုပန်၊ ဟိုရွက်၊ မိုင်းကျွတ်နှင့် ခိုင်းလုံကျေးရွာအုပ်စုများတွင် ‘ဝ’တပ်ဖွဲ့ UWSA မှ အသက် (၁၅) နှစ်အထက် ကျား/မ အားလုံးကို စစ်မှုထမ်းရန် လူသစ်စုဆောင်းနေကြောင်း မိုင်းတုံဒေသခံများက ပြောသည်။
“အခုစစ်သားကောက်တာ ပိုဆိုးလာပြီ။ စာရင်းထဲပါတဲ့ ဝ လူမျိုးတွေကို ကောက်နေတာ။ သူတို့နယ်မြေထဲ မဟုတ်ရင်တော့ တခြားလူမျိုးဆို မခေါ်သေးဘူး။ တခြားလူမျိုးနဲ့ အိမ်ထောင်ကျပြီး မွေးလာတဲ့ ဝ ကလေးတွေလည်း ယူတယ်။ အသက် (၁၅) နှစ်က စပြီး ယောကျ်ားလေး၊ မိန်းကလေး အကုန်သွားရမယ်ဆိုပြီး ပြောတာ”ဟု မိုင်းတုံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ဩဂုတ်လ (၁၅) ရက်က ကျိုင်းတုံမြို့တွင် စစ်ကောင်စီတပ်နှင့် ‘ဝ’တပ်ဖွဲ့ UWSA တို့ တွေ့ဆုံဆွေးနွေးခဲ့ကြောင်း သတင်းထွက်ပေါ်ပြီးနောက် ထိုင်းနယ်စပ်ရှိ မိုင်းတုံ၊ ပုံပါကျင်နှင့် မုံးထမြို့များဘက်တွင် ‘ဝ’တပ်ဖွဲ့မှ တပ်သားစုဆောင်းမှု ပိုမိုလုပ်ဆောင်လာကြောင်း ဒေသခံများထံမှ သိရသည်။
“အခု နှစ်ရက် သုံးရက်အတွင်းကို စာရင်းကောက်ထားတာ မြန်မြန်လုပ်နေတယ်။ စစ်ရေးလေ့ကျင့်ဖို့ သွားတာဆိုရင် အကုန်လုံး လူငယ်တွေပဲ။ မိုင်းကျွတ်ဘက်ကို သွားနေတာ။ တချို့လည်း ကျောင်းနားပြီးတော့ စစ်သင်တန်းသွားတက်ကြတာ ရှိတယ်။ ဟိုပန်၊ ဟိုရွက်ဘက်မှာ ‘ဝ’ရဲ့ ၄၆ တပ်က ခေါ်တယ်လို့ ပြောတယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
မိုင်းတုံမြို့နယ်အတွင်း ‘ဝ’တပ်ဖွဲ့ UWSA မှ လူသစ်စုဆောင်းခြင်းသည် ပထမဆုံးအကြိမ်ဖြစ်ကြောင်း သိရပြီး ယခုကဲ့သို့ တပ်သားသစ် စုဆောင်းခြင်းနှင့် ပတ်သက်၍ ‘ဝ’ပြင်ပဆက်ဆံရေး တာဝန်ခံ ဦးညီရမ်းထံသို့ သျှမ်းသံတော်ဆင့်မှ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။
အလားတူ သျှမ်းပြည်အရှေ့ပိုင်း ထိုင်းနယ်စပ်ရှိ အမှတ်(၁၇၁) ‘ဝ’တောင်ပိုင်းတပ်မှ ဝ တပ်သားများလည်း တိုက်ပွဲပြင်းထန်နေသည့် သျှမ်းပြည်မြောက်ပိုင်း စစ်မြေပြင်သို့ သွားရောက်နေရကြောင်း ဒေသခံများက ဆိုသည်။
“ဒီဘက်လည်း စစ်သားကောက်တယ် ဆိုတော့ အခြေအနေက ရှုပ်လာမယ်လို့ထင်တယ်။ တောင်ပိုင်းက စစ်သားတွေကို အပေါ်ဘက် ခေါ်သွားတယ်။ ပုံမှန်တွေ့နေကျ ဝ စစ်သားတွေလည်း မတွေ့တော့ဘူး၊ အကုန်လုံး မြောက်ပိုင်းရောက်ကုန်ပြီ။ စစ်သင်တန်းပေးပြီးရင် အပေါ်ဘက် ပို့မလား၊ ဒီဘက်မှာပဲ အင်အားဖြည့်မလား မပြောတတ်သေးဘူး”ဟု မိုင်းတုံဒေသခံ အမျိုးသားက ဆက်ပြောသည်။
သျှမ်းပြည်အရှေ့ပိုင်း မိုင်းဆတ်ခရိုင်အတွင်း တည်ရှိပြီး ထိုင်းနိုင်ငံနှင့် ထိစပ်နေသည့် ‘ဝ’တပ်ဖွဲ့ တောင်ပိုင်းစစ်ဒေသ (၁၇၁) တွင် တပ်မဟာ (၅) ခု၊ တပ်ရင်း (၂၅) ခုဖြင့် ဖွဲ့စည်းထားပြီး ‘ဝ’လူဦးရေ တစ်သိန်းခန့် နေထိုင်ကြောင်း သိရသည်။
ပြီးခဲ့သည့် ဇူလိုင်လ ၂၇ ရက် ညပိုင်းမှ စတင်ပြီး အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ရှိ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ ‘ဝ’တပ်ဖွဲ့ UWSA ၏ မိုင်းမောမြို့ဘက်မှလာသည့် တပ်မ (၃၁၈) လုံခြုံရေးတပ်ဖွဲ့ဝင်များသည် လားရှိုးမြို့နယ် မိုင်းကျက်၊ မိုင်းယော်ဘက်မှတဆင့် မြို့ပေါ်သို့ ပထမဆုံး ဝင်ရောက်တပ်စွဲခဲ့သည်။
၎င်းမတိုင်မီ ဇူလိုင်လ ၁၀ ရက်တွင် တန့်ယန်းမြို့နယ်ထဲသို့ ‘ဝ’တပ်ဖွဲ့ UWSA မှ တပ်အင်အား ၂၀၀၀ ကျော်ဖြင့် သံလွင်မြစ်အနောက်ဘက်သို့ ကမ်းကူး၍ အင်အားဖြည့်တင်းလာခဲ့ပြီး အချို့မှာ တိုက်ပွဲပြင်းထန်နေသည့် လားရှိုးမြို့သို့ ဆက်လက်ချီတက်သွားကြောင်း ဒေသခံများထံမှ သိရသည်။
Leave a Comments