သျှမ်းပြည်မြောက်ပိုင်းတွင် လက်ရှိဖြစ်ပွားနေသည့် စစ်ကောင်စီတပ်နှင့် ညီနောင်မဟာမိတ်(၃)ဖွဲ့တို့၏ စစ်ရေးပဋိပက္ခ တိုက်ပွဲများနှင့် ပတ်သက်ပြီး တရုတ်နိုင်ငံက ဆန့်ကျင်ကြောင်း တရုတ်နိုင်ငံခြားရေးဝန်ကြီး ဝမ်ယိက ပြောဆိုခဲ့သည်ဟု စစ်ကောင်စီဘက်က ထုတ်ပြန်သည်။
ယမန်နေ့ (ဩဂုတ်လ ၁၄ ရက်) တွင် တရုတ်နိုင်ငံခြားရေးဝန်ကြီး ဝမ်ယိနှင့် စစ်ခေါင်းဆောင် မင်းအောင်လှိုင်တို့ နေပြည်တော်၌ တွေ့ဆုံစဉ် ယင်းကဲ့သို့ ပြောကြားခဲ့ခြင်းဖြစ်ကြောင်း စစ်ကောင်စီ၏ မြန်မာ့အလင်း သတင်းစာတွင် ဖော်ပြသည်။
“တစ်ဘက်က ဆန့်ကျင်ကြောင်း ပြောတယ်။ အခြားတဘက်က လက်နက်နဲ့ လိုအပ်တဲ့ စစ်အင်အားတွေကို တိုးဖြည့်ပေးနေတာပေါ့။ အဲ့တော့ သျှမ်းမြောက်စစ်ရေး ပဋိပက္ခကို ဆန့်ကျင်တယ်လို့ သူက ပြောပြီးတော့ မင်းအောင်လှိုင်ကြိုက်အောင် လုပ်တာပေါ့။ ဒါပေမယ့် သျှမ်းမြောက်က စစ်ရေးလှုပ်ရှားမှုတွေကို တရုတ်က မျက်ကွယ်ပြု ကျောခိုင်းထားတာ မဟုတ်ဘူး၊ သူ့ရဲ့ နှစ်ဘက်ခွ ပေါ်လစီပါပဲ”ဟု တရုတ်နိုင်ငံ၏ ရပ်တည်ချက်ကို နိုင်ငံရေးလေ့လာသုံးသပ်သူ ဦးသန်းစိုးနိုင်က သုံးသပ်ပြောကြားသည်။
တရုတ်နိုင်ငံခြားရေးဝန်ကြီး ဝမ်ယိ ၏ ယခု နေပြည်တော် ခရီးစဉ်သည် ညီနောင်မဟာမိတ် (၃) ဖွဲ့က စစ်ကောင်စီတပ်၏ လေကြောင်းပစ်ခတ် တိုက်ခိုက်နေခြင်းကို တရုတ်နိုင်ငံမှ တားဆီးဟန့်တားပေးရန် ဩဂုတ်လ (၆) ရက်တွင် တောင်းဆိုခဲ့ပြီးနောက် မဲခေါင်-လန်ချန်း အစည်းအဝေး တက်ရောက်ရန် ထိုင်းနိုင်ငံသို့ မသွားရောက်မီ မြန်မာနိုင်ငံသို့ ရောက်ရှိလာခြင်း ဖြစ်သည်။
အလားတူ လားရှိုးမြို့အခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA က ဩဂုတ်လ (၃) ရက်နေ့တွင် တိုက်ခိုက်သိမ်းပိုက်ပြီးနောက် တရုတ်အထူးကိုယ်စားလှယ် တိန့်ရှီကျွင်း လည်း မြန်မာနိုင်ငံသို့ ရောက်ရှိလာပြီး စစ်ခေါင်းဆောင် မင်းအောင်လှိုင်နှင့် တွေ့ဆုံခဲ့သေးသည်။
တရုတ်နိုင်ငံခြားရေးဝန်ကြီးက စစ်ကောင်စီခေါင်းဆောင် မင်းအောင်လှိုင်ကို လာရောက်တွေ့ဆုံခဲ့သော်လည်း သျှမ်းပြည်မြောက်ပိုင်းတွင် တိုက်ပွဲများ ဆက်လက်ဖြစ်နေမည်ဟု ယူဆကြောင်း ဦးသန်းစိုးနိုင်က ဆိုသည်။
“အခုက ဗိုလ်ချုပ်မှူးကြီး မင်းအောင်လှိုင်က ခေါင်းမာမာနဲ့ စိတ်ကောက်ပြနေတဲ့ အချိန်ဖြစ်ပါတယ်။ ဒါကြောင့် ဝမ်ယိက အမျက်တော်ဖြေ လာရောက်ပြီး ဖျောင်းဖျတဲ့ပုံစံ ဖြစ်ပါတယ်။ အဲ့တော့ ဟိုင်ဂင် အစည်းအဝေး ပြန်ဖြစ်ဖို့နဲ့ စစ်ကောင်စီဘက်က တက်ဖို့ဆိုတာ သိပ်ပြီးတော့ အလားအလာ နည်းပါတယ်။ ဘာဖြစ်လို့လည်းဆိုတော့ တရုတ်က အဲ့လိုပြောပေမယ့် လက်တွေ့က TNLA နဲ့ MNDAA က စစ်ပွဲကို ဆက်တိုက်နေတယ်”ဟု နိုင်ငံရေး လေ့လာသုံးသပ်သူ ဦးသန်းစိုးနိုင်က သျှမ်းသံတော်ဆင့်ကို ပြောသည်။
စစ်ကောင်စီနှင့် ညီနောင်မဟာမိတ်(၃)ဖွဲ့အကြား တရုတ်က ကြားဝင်စေ့စပ် ညှိနှိုင်းပေးနေသည့် ဟိုင်ဂင် ဆွေးနွေးပွဲကို ဩဂုတ်လဆန်းပိုင်းတွင် (၆) ကြိမ်မြောက် တွေ့ဆုံဆွေးနွေးရန် စီစဉ်ထားခဲ့သော်လည်း စစ်ကောင်စီဘက်မှ မတက်ရောက်ခဲ့ခြင်းကြောင့် လောလောဆယ် ပြောင်းလဲရန် အနေအထား မရောက်သေးကြောင်းလည်း ၎င်းက ဆက်ပြောသည်။
တရုတ်နိုင်ငံအနေဖြင့် မြန်မာနိုင်ငံ၏ နိုင်ငံတစ်သားတည်း ဖြစ်တည်မှုနှင့် နယ်မြေပိုင်နက် ပြည့်စုံမှုကို ကာကွယ်ထိန်းသိမ်းခြင်းအပေါ် ထောက်ခံပြီး ပြည်တွင်းရေး ဝင်ရောက်မစွက်ဖက်ခြင်းမူကို လက်ကိုင်ထားကြောင်း ဝမ်ယိက ပြောဆိုခဲ့သည်ဟု ဆင်ဟွာသတင်းဌာနတွင် ဖော်ပြထားသည်။
စစ်ဖြစ်ပြီး မတည်မငြိမ်ဖြစ်နေသည့် မြန်မာပြည်တွင်းရေးအပေါ် ပြည်ပအင်အားစု ဝင်ရောက်စွက်ဖက်ခြင်းကို ဆန့်ကျင်ပြီး တရုတ်-မြန်မာ ဆက်ဆံရေး သွေးကွဲအောင် လုပ်ဆောင်နေမှုနှင့် တရုတ်နိုင်ငံအား အိုးမဲသုတ် အပုပ်ချနေသည့် ပြောဆိုလုပ်ဆောင်မှု မှန်သမျှကို ဆန့်ကျင်ကြောင်း ဝမ်ယိ၏ ပြောကြားချက်ကို ဆင်ဟွာသတင်းတွင် ရေးသားထားသည်။
“အမေရိကန်နဲ့ အနောက်ဥရောပက မြန်မာပြည်အရေးကို ဝင်ရောက်စွက်ဖက်တာ၊ အားပေးတာ အဲ့တာတွေ မလုပ်ဖို့ သတိပေးလိုက်တာပါ။ တချိန်တည်းမှာ သူ(တရုတ်)ကတော့ ဝင်ရောက်စွက်ဖက်မှုမျိုးစုံ ကျူးလွန်နေပါတယ်။ ဒါဟာ သူ့ရဲ့ နှစ်ဘက်ခွ ပေါ်လစီရဲ့ ဖော်ပြချက် ဖြစ်ပါတယ်”ဟု ဦးသန်းစိုးနိုင်က သုံးသပ်ပြောဆိုသည်။
ထို့အပြင် မြန်မာနိုင်ငံအတွင်းရှိ တရုတ်၏ စီမံကိန်းများကို အကောင်အထည်ဖော်ရာတွင် အရှိန်မြှင့်တင်ရန်၊ တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်းကို ကောင်းမွန်စွာ လည်ပတ်နိုင်ရန် စစ်ကောင်စီကို တွန်းအားပေးခဲ့ကြောင်း ဆိုထားသော်လည်း ၎င်းစီမံကိန်း အများစုမှာ တော်လှန်ရေးအင်အားစုများ၏ ထိန်းချုပ်မှုအောက်သို့ ရောက်ရှိနေပြီ ဖြစ်သည်။
လက်ရှိတွင် ညီနောင်မဟာမိတ်တပ်များသည် တရုတ်-မြန်မာ နယ်စပ်ရှိ မူဆယ်မြို့မှလွဲ၍ သျှမ်းပြည်မြောက်ပိုင်းရှိ မြို့များအားလုံးနီးပါးကို ထိန်းချုပ်ထားနိုင်သည့်အပြင် သျှမ်း-မန္တလေးနယ်စပ်ရှိ မိုးကုတ်၊ မတ္တရာနှင့် သပိတ်ကျင်းမြို့နယ်များအထိ ပြည်သူ့ကာကွယ်ရေးတပ် PDF များက တိုက်ခိုက်ထိန်းချုပ်ထားနိုင်သည်။
တရုတ်နိုင်ငံခြားရေးဝန်ကြီး ဝမ်ယိ ၏ မြန်မာနိုင်ငံ ခရီးစဉ်အတွင်း စစ်အာဏာရှင်ဟောင်း ဦးသန်းရွှေနှင့်လည်း တွေ့ဆုံခဲ့ပြီး တစ်နိုင်ငံလုံး ရွေးကောက်ပွဲ အဆင်ပြေအောင် ကျင်းပနိုင်ရန်နှင့် ဒီမိုကရေစီ အသွင်ကူးပြောင်းရေးကို ပြန်လည်စတင်ရန် ပြောဆိုခဲ့ကြောင်း သိရသည်။
“သန်းရွှေနဲ့ သွားတွေ့တာကတော့ စစ်အဆောက်အအုံ တစ်ခုလုံးကို သူတို့က အလေးထားပါတယ်လို့ ပြချင်တာ ဖြစ်တဲ့အပြင် မင်းအောင်လှိုင်ကို ထိန်းကွပ်ပေးမယ့် လူတစ်ယောက်အနေနဲ့ မြင်တာလည်း ဖြစ်နိုင်ပါတယ်”ဟု သျှမ်းနိုင်ငံရေး သုတေသီ စိုင်းဝမ်းစိုင်းက သျှမ်းသံတော်ဆင့်ကို ပြောသည်။
Leave a Comments