သျှမ်းပြည် မြောက်ပိုင်း၊ လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ် တိုင်းမှူးနှင့် ဒုတိုင်းမှူး တို့၏ မိသားစုများ ယမန်နေ့ (ဇူလိုင်လ ၄ ရက်) က လားရှိုးမှ နေပြည်တော်သို့ ထွက်ပြေးသွားသည်ဟု တပ်တွင်းသတင်းရင်းမြစ်က အတည်ပြုသည်။

လားရှိုးမြို့ အခြေစိုက် (ရမခ) တိုင်းမှူး ဗိုလ်ချုပ်စိုးတင့်၊ ဒုတိုင်းမှူးနှင့် သျှမ်းပြည်နယ် ဝန်ကြီး တစ်ဦး၏ မိသားစုဝင်များ ရဟတ်ယာဥ်ဖြင့် နေပြည်တော်သို့ ထွက်ပြေးခြင်း ဖြစ်သည်ဟု တပ်တွင်းသတင်းရင်းမြစ်က ယနေ့ (ဇူလိုင်လ ၅ ရက်) တွင် ပြောဆိုသည်။

“တိုင်းမှူးနဲ့ ဒုတိုင်းမှူး မိသားစုတွေ၊ လားရှိုးမှာ နေထိုင်နေတဲ့ သျှမ်းပြည်နယ် ဝန်ကြီးတစ်ဦးရဲ့ မိသားစုဝင်တွေ နေပြည်တော် ရွှေ့ထားပါတယ်။ ရမခ လည်း ဒရုန်းကော ရှော့တိုက်ဒုံးနဲ့ကော တိုက်ခိုက်ခံနေရတော့ မလုံခြုံတော့ပါဘူး။ မနေ့က ရှော့တိုက်ဒုံး တစ်လုံးကျတာ အထိအခိုက်ရှိတယ်လို့ သိရပါတယ်” ဟု တပ်တွင်းသတင်းရင်းမြစ်က ရှင်းပြသည်။

ဒုတိယ တပ်မတော် စစ်ဆေးရေး အရာရှိချုပ် ဖြစ်ခဲ့သူ ဗိုလ်ချုပ်စိုးတင့် (တေဇ-၁၆) သည် ပြီးခဲ့သည့် “၁၀၂၇” စစ်ဆေးရေး ပထမပိုင်း စစ်ရပ်စဲသည့် ဇန်နဝါရီလ အတွင်းက ရမခ တိုင်းမှူး အဖြစ် ခန့်အပ်ခံခဲ့ရသူ ဖြစ်ပြီး မင်းအောင်လှိုင် အားကိုးသူ တစ်ဦး ဖြစ်သည်။

ယမန်နေ့က လားရှိုးမြို့တွင်းမှ စစ်ကောင်စီတပ် လက်နက်ကြီးဖြင့် အဆက်မပြတ် ပစ်ခတ်ခဲ့သကဲ့သို့ ညီနောင်မဟာမိတ်တပ်များက ဒရုန်းများ၊ ရှော့တိုက်ဒုံးများဖြင့် တန်ပြန်တိုက်ခိုက်ရာ မြို့နေ ပြည်သူများ ထိခိုက် သေဆုံးမှုများစွာ ရှိခဲ့သည်။

ယင်းနောက် ယမန်နေ့ ညပိုင်းက တိုက်ပွဲသံများ ငြိမ်သက်ခဲ့ရာ ယနေ့ မနက်ပိုင်းအထိ ငြိမ်သက်နေသည်ဟု မြို့ခံများက ပြောသည်။

လက်ရှိ မြို့ခံ အများအပြား လားရှိုးမြို့မှ ထွက်ခွာရန် ကြိုးစားနေကြပြီး စစ်ကောင်စီတပ်နှင့် ညီနောင်မဟာမိတ်တပ်များ အနေဖြင့် ပြည်သူများကို လမ်းဖွင့်ပေးရန်၊ လမ်းခရီးနှင့် ပတ်သက်၍ သတင်းအမျိုးမျိုး ထွက်ပေါ်နေသဖြင့် တိကျ သေချာသည့် လမ်းကြောင်း သတင်းများ ဖော်ပြပေးရန် လိုလားကြောင်း မြို့ခံများက ပြောသည်။