သျှမ်းပြည် ပန်ဆန်း(ပန်ခမ်း)မြို့နှင့် ဟိုပန်မြို့တို့တွင် “ဝ” ငြိမ်းချမ်းရေးတည်ဆောက်မှု ၃၅ နှစ်ပြည့် အခမ်းအနားကို ကျင်းပပြုလုပ်ခဲ့ကြောင်း စုံစမ်းသိရသည်။

ဧပြီလ ၁၇ ရက်တွင် ကျရောက်သည့် သျှမ်းပြည်အထူးဒေသ(၂) “ဝ” ငြိမ်းချမ်းရေး တည်ဆောက်မှု ၃၅ နှစ်ပြည့် အခမ်းအနားကို ပန်ဆန်း(ပန်ခမ်း)မြို့တွင် ကျင်းပပြုလုပ်ခဲ့သည်။

ပန်ဆန်း(ပန်ခမ်းမြို့)တွင် ကျင်းပသည့် အခမ်းအနားသို့ ‘ဝ’တပ်ဖွဲ့ UWSA ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC)တွင် ပါဝင်သော မဟာမိတ်တပ်ဖွဲ့ဝင်များ တက်ရောက်ကြပြီး အမျိုးသားညီညွတ်ရေးအစိုးရ (NUG) နှင့် ညီနောင်မဟာမိတ် ၃ ဖွဲ့တို့က သဝဏ်လွှာ ပေးပို့ခဲ့ကြသည်။

“ကျနော်တို့ ညီနောင်မဟာမိတ်တချို့ တက်ရောက်တာ ရှိတယ်ပေါ့နော်။ ဒီလိုတော်လှန်ရေးနေ့က ပုံမှန်ကျင်းပနေကျပါ၊ တခြားထူးခြားမှုတော့ မရှိပါဘူး”ဟု ‘ဝ’တပ်ဖွဲ့ UWSA ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို ပြောသည်။

၎င်းအခမ်းအနားတွင် အမျိုးသားညီညွတ်ရေးအစိုးရ (NUG) မှ ပေးပို့သည့် သဝဏ်လွှာကို ဖတ်ကြားခဲ့ကြောင်း ဦးညီရမ်းက သျှမ်းသံတော်ဆင့်ကို အတည်ပြုသည်။

စစ်ကောင်စီဘက်မှ ပန်ဆန်းမြို့ရှိ နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေးဦးစီးဌာန (နတလ) ကိုယ်စားလှယ်သာ တက်ရောက်ခဲ့ကြောင်း သိရသည်။

အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလမှ ပေးပို့သည့် သဝဏ်လွှာတွင် ‘ဝ’ပြည်သွေးစည်းညီညွတ်ရေးပါတီ စတင်တည်ထောင်ချိန်မှစ၍ ယနေ့အထိ မြန်မာနိုင်ငံအတွင်း ဖက်ဒရယ်ပြည်ထောင်စုစနစ် ပေါ်ထွန်းလာရေးအတွက် တိုင်းရင်းသားတော်လှန်ရေး အဖွဲ့အစည်းများကို ဦးဆောင်ဦးရွက်ပြုကာ ကူညီပံ့ပိုးခဲ့သည်ကို ဂုဏ်ယူကြောင်း ဖော်ပြထားသည်။

ထို့အပြင် NUG အနေဖြင့် စစ်အာဏာရှင် အမြစ်ပြတ် ဖြုတ်ချရေး၊ စစ်မှန်သည့် ဖက်ဒရယ်ပြည်ထောင်စု တည်ဆောက်ရေးတို့အတွက် ‘ဝ’တပ်ဖွဲ့ UWSA နှင့် လက်တွဲဆောင်ရွက်မည် ဖြစ်ကြောင်းလည်း ဆိုထားသည်။

အလားတူ “၁၀၂၇ စစ်ဆင်ရေး”အတွင်းက ညီနောင်မဟာမိတ်တပ်များ တိုက်ခိုက်သိမ်းပိုက်ခဲ့ပြီး ‘ဝ’တပ်ဖွဲ့ UWSA ထံ လွှဲပြောင်းပေးခဲ့သည့် ဟိုပန်မြို့တို့တွင်လည်း ၃၅ နှစ်မြောက် ငြိမ်းချမ်းရေး တည်ဆောက်ခြင်း အခမ်းအနားကို ကျင်းပခဲ့သည်။

ညီနောင်မဟာမိတ် ၃ ဖွဲ့က ၎င်းအခမ်းအနားသို့ ပေးပို့သည့် သဝဏ်လွှာတွင် ‘ဝ’ဒေသ၏ ကိုယ်ပိုင်အုပ်ချုပ်သည့် ပုံစံသည် အခြားသော တိုင်းရင်းသားတော်လှန်ရေး အဖွဲ့အစည်းများအတွက် စံနမူနာ တစ်ခုဖြစ်ပြီး ပြည်တွင်းစစ်တွင် အမြဲတမ်း ကြားနေခဲ့သည့်အတွက် ဒေသအတွင်း ငြိမ်းချမ်းရေးနှင့်အတူ ဖွံ့ဖြိုးတိုးတက်နေကြောင်း ဖော်ပြထားသည်။

ပြီးခဲ့သည့် မတ်လတွင် လားရှိုးမြို့နယ်ရှိ ညီနောင်မဟာမိတ် ၃ ဖွဲ့ သိမ်းပိုက်ထိန်းချုပ်ထားသည့် မိုင်းကျက်ကျေးရွာအုပ်စုတွင် ပြန်လည်ထူထောင်ရေးလုပ်ငန်းများ စတင်လုပ်ဆောင်ရန် သံလွင်မြစ်မှ မိုင်းကျက်ကျေးရွာအထိ ၁၀ မိုင်ကျော် အကွာအဝေးရှိသည့် လမ်းကို ‘ဝ’တပ်ဖွဲ့ UWSA က ဖောက်လုပ်လာပြီး သံလွင်မြစ် အနောက်ခြမ်းတွင် ခြေကုပ်ရယူရန် ဖြစ်နိုင်ကြောင်း ဒေသခံများက သုံးသပ်ပြောဆိုသည်။