သျှမ်းပြည် မိုင်းရှူးမြို့နယ်တွင် တရုတ်က အလိုရှိနေသည့် “ဝ”တပ်ဖွဲ့ UWSAမှ ကျားဖြန့်ဂိုဏ်းခေါင်းဆောင် အရာရှိ ၂ ဦးကို တရုတ်ရဲဝတ်စုံ ဝတ်ဆင်ထားသည့် လက်နက်ကိုင်တပ်ဖွဲ့မှ လာရောက်ရှာဖွေခဲ့ကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလ ၅ ရက်နေ့က မိုင်းရှူးမြို့နယ်တွင် တရုတ်ရဲဝတ်စုံ ဝတ်ဆင်ထားသည့် လက်နက်ကိုင်တပ်ဖွဲ့နှင့် ဒေသခံ လက်နက်ကိုင် ပူးပေါင်းအဖွဲ့တို့က ကား ၅ စီးဖြင့် တရုတ်အလိုရှိနေသည့် “ဝ”တပ်ဖွဲ့ UWSA ၏ ဆောက်လုပ်ရေးဌာနမှ ပေါက်အိုက်ပန်း (Chen Yanban) နှင့် မိုင်းလင်းခရိုင်မှူး အိုက်ဟော့ (Sheng Yankui) တို့ကို လာရောက်ရှာဖွေခဲ့ကြောင်း မိုင်းရှူးဒေသခံများက ပြောသည်။

“တရုတ်စစ်သားလား၊ ‘ဝ’စစ်သားလား သေချာမသိရဘူး။ ကား ၅ စီးလောက်နဲ့ လာပြီး ကျားဖြန့်ဂိုဏ်းခေါင်းဆောင် ၂ ယောက်ကို လာရှာတယ်လို့ပြောတယ်။ သူတို့ လာရှာတာ ဟိုင်းပါရေတံခွန်ဘက်အထိ ရောက်တယ်၊ ဖမ်းမိလား မဖမ်းမိလားတော့ မသိဘူး”ဟု မိုင်းရှူးမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

မိုင်းရှူးမြို့နယ်အထိ လာရောက်ရှာဖွေခံရသည့် “ဝ”တပ်ဖွဲ့ UWSAမှ ကျားဖြန့်ဂိုဏ်းခေါင်းဆောင် အရာရှိ ၂ ဦးကို တရုတ်နိုင်ငံမှ ၂၀၂၃ အောက်တိုဘာလ ၁၂ ရက်ကတည်းက ဖမ်းဝရမ်းထုတ်ခဲ့ပြီး ဖမ်းမိပါက တရုတ်ယွမ် တစ်သိန်းမှ ငါးသိန်း အထိ ဆုကြေးပေးမည်ဟုလည်း ကြေညာထားသည်။

“ဝ”တပ်ဖွဲ့ UWSA ကလည်း တရုတ်နိုင်ငံက ဖမ်းဝရမ်းထုတ်ထားသည့် ၎င်းတို့၏ အရာရှိ ၂ ဦးကို အောက်တိုဘာလ ၁၆ ရက်နေ့တွင် ရာထူးက ထုတ်ပယ်လိုက်ကြောင်း ကြေညာခဲ့ပြီး စစ်ကောင်စီဘက်မှလည်း ၎င်းတို့နှစ်ဦးကို အောက်တိုဘာ ၁၈ရက် တွင် ထပ်မံဖမ်းဝရမ်းထုတ်ခဲ့သည်။

စစ်ကောင်စီက ကိုးကန့်ဒေသမှ ကျားဖြန့်ဂိုဏ်းခေါင်းဆောင် (၁၀) ဦးကို တရုတ်နိုင်ငံသို့ ဇန်နဝါရီလ ၃၁ ရက်က လွှဲပြောင်းပေးခဲ့ပြီးနောက် “ဝ”တပ်ဖွဲ့ကလည်း ၎င်းတို့၏ အရာရှိဟောင်း ၂ ဦးကို ဖမ်းဝရမ်း ကြေညာကာ မြန်မာ-တရုတ် နယ်စပ်တလျှောက်တွင် ကြော်ငြာကပ်ထားကြောင်း ဒေသခံများက ပြောသည်။

သျှမ်းတပ် (၂)တပ်ဖြစ်သည့် ရှမ်းပြည်တိုးတက်ရေးပါတီ/ ရှမ်းပြည်တပ်မ‌တော် (SSPP/SSA) နှင့် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) တို့ကလည်း နှစ်ချုပ်အစည်းအဝေး ကျင်းပပြီးနောက် အွန်လိုင်းငွေလိမ်သည့် ကျားဖြန့်လုပ်ငန်းများကို နှိမ်နှင်းသွားမည်ဖြစ်ကြောင်း ဇန်နဝါရီလ ၂၉ ရက်နေ့က အသီးသီး ထုတ်ပြန်ကြေညာခဲ့သည်။