နိုဝင်ဘာလ ၁၁ ရက်မှ စတင်ခဲ့သည့် “၁၁.၁၁ စစ်ဆင်ရေး” အတွင်း မိုးဗြဲအခြေစိုက်ထားသည့် ခမရ ၅၁၈ အပါအဝင် ခြေကုပ်စခန်း ၉ ခုကို တိုက်ခိုက်သိမ်းပိုက်နိုင်ခဲ့ကြောင်း “၁၁.၁၁ စစ်ဆင်ရေး”မဟာမိတ် အင်အားစု များက နိုဝင်ဘာ ၁၆ ရက်တွင်ထုတ်ပြန်ခဲ့သည်။
စစ်ဆင်ရေး စတင်ခဲ့သည့်ရက်တွင် ဝါရီဆူဖလိုင်၊ဒုန်ဒူထန်၊ ပွဲကုန်း၃၊ ပွဲကုန်း၁၊ ညောင်ဝိုင်း၊ ပီကင်းကောခူ၊ ဆောင်ကန်း၊ စည်ကား၂ စသည့် ကျေးရွာ ရပ်ကွက်များတွင် စစ်ကောင်စီ တပ်စွဲထားသောခြေကုပ် စခန်း (၈) ခုကို တိုက်ခိုက် သိမ်းပိုက်နိုင် ခဲ့ကြောင်း သိရသည်။
တိုက်ပွဲဖြစ်သည့် ၅ ရက်အတွင်း စစ်ကောင်စီမှ လေကြောင်းဖြင့် တိုက်ခိုက်မှုမှာ အကြိမ် ၃၀ နီးပါးအသုံးပြုခဲ့ပြီး အခြေစိုက်တပ်ရင်းမှ လက်နက်ကြီးပစ်ခတ်မှု အကြိမ် ၅၀၀ ကျော်ပစ်ခတ် တိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြထားသည်။
တိုက်ပွဲအတွင်းတွင် လက်နက်ကြီးကြောင့် အရပ်သား ၄ ဦးသေဆုံးပြီး ၆ ဦးဒဏ်ရာရရှိခဲ့ကြောင်း ထုတ်ပြန်ထားသည်။
သျှမ်းပြည် မိုးဗြဲ ဖယ်ခုံဒေသများအတွင်း တော်လှန်ရေးအင်အားစုဖြစ်ကြသည့် အလယ်ပိုင်းတိုင်းစစ်ဒေသ၊ ရှမ်းတောင်ဗျူဟာ (၁) တပ်ရင်းများဖြစ်ကြသော (၁၀၀၁) တပ်ရင်း (MB-1) တပ်ရင်း PK-1၊ (၁၀၀၆) တပ်ရင်း PK-2၊ (၁၀၀၇) တပ်ရင်း MB2၊ (၁၀၀၄) PKS PDF၊ ရှမ်းတောင်ဗျူဟာ(၂) တပ်ရင်းများ ဖြစ်ကြသော (၁၀၀၃) တပ်ရင်း၊ (၁၀၀၅) တပ်ရင်း၊ (၁၀၀၈) တပ်ရင်း၊ (၁၀၀၉) တပ်ရင်း၂၊ (၁၀၁၁) တပ်ရင်း၊ KNDF ဗျူဟာ (၁) တပ်ရင်းများဖြစ်ကြသော KNDF BO-3၊ KNDF BO-11၊ KNDF BO-22 နှင့် မြို့ပြတော် လှန်ရေးတပ်ဦး (U.R.F) ခုခံတော်လှန်ရေးအင်အားစုများ ပါဝင်ကြသည်။
မိုးဗြဲ ၁၁.၁၁ (MB11.11) စစ်ဆင်ရေး ကို ၂၀၂၃ ခုနှစ် နိုဝင်ဘာလ (၁၁) ရက်တွင် စတင်ခဲ့ပြီး မိုးဗြဲ၊ ဖယ်ခုံဒေသများ အတွင်းရှိသည့် စစ်ကောင်စီ ခြေကုပ်ယူထားသော ကင်းစခန်းများ၊ ထောက်ပို့စခန်းများကို ထိုးစစ်ဆင်၍ တိုက်ခိုက်သိမ်းပိုက်နိုင်ခဲ့ကြောင်း ထုတ်ပြန်ထားသည်။
