မန္တလေး-ပြင်ဦးလွင်လမ်းပိုင်းတွင် ခရီးသည်တင် အန်စာတုံးအမျိုးအစားယာဉ်တစ်စီးသည် ယနေ့ (အောက်တိုဘာ ၂၂)ရက် နံနက် အစောပိုင်းတွင် ချောက်ထဲထိုးကျမှု ဖြစ်ပွားခဲ့ကြောင်း စုံစမ်းသိရသည်။

ယနေ့ (အောက်တိုဘာလ ၂၂) ရက် နံနက်အစောပိုင်း ၂နာရီဝန်းကျင် တွင် မန္တလေး-ပြင်ဦးလွင်လမ်းပေါ် မိုင်တိုင်အမှတ်(၁၈/၁) အနီး၌ ပခုက္ကူ-မန္တလေး-ပြင်ဦးလွင် ပြေးဆွဲ‌နေသည့် ခရီးသည်တင်ယာဉ် အန်စာတုံးအမျိုးအစား ယာဉ်တစ်စီးသည် ဘရိတ်ပေါက်ကာ ပေ၅၀ခန့်အနက်ရှိသည့် ချောက်ထဲသို့ တိမ်းမှောက်ထိုးကျသွားခဲ့ပြီး ခရီးသည် ၉ဦး ထိခိုက်ဒဏ်ရာရရှိခဲ့ကြောင်း စေတနာမွန်လူမှုကူညီရေးအသင်းထံမှ သိရသည်။

“ကားမှောက်တဲ့အချိန်က လူခြေတိတ်ချိန်ကြီးဖြစ်တာ၊ ကျနော်တို့ အဖွဲ့ထံ ဖုန်းဝင်လာတာနဲ့ ချက်ချင်းလာခဲ့လိုက်တာပါဘဲ အရှိန်နဲ့ ကျတာဆိုတော့ ထိခိုက်ဒဏ််ရာရသူ‌ များတယ် ကလေးတစ်ဦးလည်းပါတယ်”လို့ ပရဟိတအသင်းသားတစ်ဦးက ဆိုသည်။

အဆိုပါ ခရီးသည်တင်ယာဉ် တိမ်းမှောက် ချောက်ထဲထိုးကျခဲ့မှုကြောင့် ကလေးငယ်တစ်ဦးအပါအဝင် အမျိုးသား ၂ဦးနဲ့ အမျိုးသမီး ၇ဦး စုစုပေါင်း၉ဦးထိခိုက်ဒဏ်ရာရရှိခဲ့သည်။

ချောက်ထဲမှ အပေါ်သို့ ပြန်လည်ကယ်ဆယ်ကြရာတွင် မြန်မာနိုင်ငံလူမှုကယ်ဆယ်ရေးအဖွဲ့(မန္တလေးတိုင်း)၊ ချမ်းမြသာစည်၊ ချမ်းအေးသာဇံ မြို့နယ်တို့ရှိ ကယ်ဆယ်ရေးအဖွဲ့များမှ သွားရောက်ကူညီခဲ့ကြပြီး ထိခိုက်ဒဏ်ရာရသူများကို လူနာတင်ယာဉ် ၄စီးဖြင့် မန္တလေးဆေးရုံကြီးသို့ ပို့ဆောင်ပေးခဲ့ကြောင်း သိရသည်။