တရုတ်နိုင်ငံမှ ဖမ်းဝရမ်းထုတ်ထားသည့် အွန်လိုင်းငွေလိမ်းဂိုဏ်းနှင့်ပတ်သက်ဆက်နွယ်သည့် “ဝ” ပြည် စည်းလုံးညီညွတ်ရေး တပ်မတော် ( UWSA ) တပ်ဖွဲ့ ခေါင်းဆောင် (၂)ဦး ကို ရာထူးက ထုတ်ပယ်လိုက်ကြောင်း သတင်းရရှိသည်။
အဆိုပါ ၂ဦးသည် တရုတ်နိုင်ငံ၏ ဥပဒေကို ချိုးဖောက်ခဲ့ပြီး “ ဝ”ဒေသ နှင့် အိမ်နီးချင်း နိုင်ငံ၊ နိုင်ငံတကာ ဆက်ဆံရေး ကို ထိခိုက်စေသည့်အတွက် UWSA တပ်ဖွဲ့ က အောက်တိုဘာ ၁၆ရက်တွင် ထုတ်ပယ်လိုက်ကြောင်း တရားဝင် စာထုတ်လိုက်သည်။
“ ဒီသတင်းက မှန်ပါတယ်။ ကျနော်တို့ ထုတ်ပြန်ထားတဲ့အတိုင်းပါပဲ” ဟု လားရှိုး UWSA ၏ ဆက်ဆံရေးရုံတာဝန်ခံ ဦးညီရမ်းက သျှမ်းသံတော်ဆင့်ကိုပြောသည်။
ထိုသူ ၂ဦးသည် “ဝ”ပြည် နှင့် အိမ်နီးချင်းနိုင်ငံများ၏ နိုင်ငံရေး အပြန်အလှန် ယုံကြည်မှုနှင့် ဆက်ဆံရေးကို ထိခိုက်စေသဖြင့် ရာထူးမှု ထုတ်ပယ်ခြင်းဖြစ်ကြောင်း ထုတ်ပြန်ချက်တွင်ရေးသားထားသည်။
အွန်လိုင်း ငွေလိမ်ဂိုဏ်များနှင့် ပတ်သက်ဆက်နွယ်သည်ဟု ယူဆသည့် UWSA ၏ ဆောက်လုပ်ရေးဌာနကြီးမှူး ပေါက်အိုက်ပန်း နှင့် မိုင်းလင်းခရိုင်မှူး အိုက်ဟော့တို့ ဖြစ်ပြီး၊ ထိုသူ ၂ဦးကို ဖမ်းမိပါက တရုတ်ယွမ် တစ်သိန်းမှ ငါးသိန်း အထိ ဆုကြေးပေးမည်ဟုလည်း တရုတ်နိုင်ငံဘက်မှ ယခုလ (အောက်တိုဘာ ၁၂)ရက်တွင် ဖမ်းဝရမ်းထုတ်ခဲ့သည်။
ယခုလပိုင်းအတွင်း မြန်မာ-တရုတ်နယ်စပ်တလျှောက် ကိုးကန့် ဒေသ၊ “ဝ” ဒေသ နှင့် မူဆယ်မြို့ နယ်အတွင်း အွန်လိုင်း ငွေလိမ်ဂိုဏ်း များကို တရုတ်-မြန်မာ- ထိုင်း (၃)နိုင်ငံပူးပေါင်းပြီးဖမ်းဆီးမှု ပြုလုပ်နေကြောင်း သိရသည်။
ယခုလ (အောက်တိုဘာ) ၁၆ရက်တွင်လည်း မြန်မာနယ်စပ်တလျှောက်တွင် အွန်လိုင်း ငွေလိမ်ဂိုဏ် နှင့် ဆက်စပ်သည့် သံသယရှိသူ ၄၆၀၀ ကျော်ဖမ်းဆီးရမိကြောင်း တရုတ်နိုင်ငံပြည်သူ့လုံခြုံရေး ဌာန ထုတ်ပြန်ချက်အရသိရသည်။
