သျှမ်းပြည် လားရှိုးမြို့ရှိ CB ဘဏ်မှ ပိုက်ဆံထုတ်ပြီး ပြန်လာသည့် အမျိုးသား ၂ ဦးကို အမည်မသိ လက်နက်ကိုင်အဖွဲ့က ဓားပြတိုက်ယူဆောင်သွားခဲ့ကြောင်း သတင်းရရှိသည်။
ယခု အောက်တိုဘာ ပထမပတ်အတွင်း လားရှိုးမြို့ ရပ်ကွက်(၇)တွင်နေထိုင်သည့် အမျိုးသား ၂ဦးသည် CB ဘဏ်မှ ငွေသွားထုတ်ပြီး အိမ်အပြန်လမ်းတွင် အမည်မသိ လက်နက်ကိုင် အဖွဲ့က ဓားပြတိုက်ခဲ့ပြီး၊ ဘဏ်မှ ထုတ်လာသည့် ကျပ်သိန်း ၈၀၀ကျော် ပါသွားကြောင်း ဓားပြတိုက်ခံရသူနှင့်နီးစပ်သူ အမျိုးသားတစ်ဦး က သျှမ်းသံတော်ဆင့်ကို ပြောသည်။
“ ဘဏ်ကနေ ငွေထုတ်ပြီး အိမ်ခြံတံခါးအရောက်မှာ ဓားပြ (၃)ယောက် က ကားပေါ်ကနေ ဆင်းပြီး သေနတ်နဲ့ ခြိမ်းခြောက်တယ်။ ပြီးတော့ ထုတ်လာတဲ့ ငွေအိတ်တွေ၊ ရွှေတွေ ယူသွားတယ်။ တန်းဖိုးကတော့ စုစုပေါင်း ကျပ်သိန်း ၈၀၀ ကျော် ပါသွားတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ ဓားပြတိုက်တစ်စုသည် အမျိုးသား ၃ ဦးဖြစ်ပြီး မျက်နှာဖုံးစွပ်ထားကာ သေနတ်ကိုင်ဆောင်ထားကြောင်း သိရသည်။
စစ်အာဏာသိမ်းပြီးနောက်ပိုင်း လားရှိုးမြို့ပေါ်တွင် သေနတ်ကိုင်ဆောင်ပြီး ဓားပြတိုက်သည့်သူများပြားလာကြောင်း၊ လားရှိုးဒေသခံများ၏ လုံခြုံရေးသည် တနေ့ထက် တနေ့ ပိုမိုးဆိုးရွားလာနေကြောင်းလည်း လားရှိုးမြို့နေ အသက် ၄၀ကျော် အရွယ်ရှိ အမျိုးသားက သျှမ်းသံတော်ဆင့်ကို ပြောသည်။
“ လားရှိုးမှာတော့ လုံခြုံရေးမရှိဘူး။ အာဏာသိမ်းပြီးနောက်ပိုင်း လုံခြုံရေးက ပိုဆိုးလာတယ်။ သေနတ်တွေလည်း နေရာတိုင်းမှာ ဝယ်လို့ရနေတယ်။ စီးပွားရေးသမားတွေက ပိုက်ဆံရဖို့အတွက် ကြည့်ပြီး သေနတ်ကို ရောင်းပေးနေတာပဲသိတယ်။ အဲ့သေနတ်ကြောင့် လူတွေဘယ်လောက်သေမယ်ဆိုတာ မစဉ်းစားပေးဘူး “ဟု ၎င်းက ပြောသည်။
ထို့အပြင် ရဲတပ်ဖွဲ့များသည်လည်း ပြည်သူများ၏ လုံခြုံရေးကို အရေးမနိုင်တော့သလို ပြီးခဲ့သည့် ၂၂ ရက်တွင် လားရှိုးမြို့ အမှတ် (၄) ရပ်ကွက်ရှိ မီးပွိုင့်မှ ယာဉ်ထိန်းရဲတစ်ဦးသည် ကားတစ်စီးကို ပိုက်ဆံလိုက်တောင်းခံရာမှ သေနတ်ဖြင့် ပစ်ခတ်ခံရပြီး သေဆုံးသွားခဲ့ကြောင်း ဒေသခံများက ပြောဆိုနေကြသည်။
Leave a Comments