စစ်ကောင်စီ၏ အကျိုးစီးပွားဖြစ်စေသည့် လုပ်ငန်းယန္တရားများကို အရှိန်မြင့် တိုက်ဖျက်သွားမည် ဖြစ်သောကြောင့် ပြည်သူများ ပူးပေါင်းပါဝင်ပေးရန် တော်လှန်းရေးပူးပေါင်းတပ်ဖွဲ့များမှ တိုက်တွန်းလိုက်ကြောင်း MBPDF (1001)မှ သြဂုတ် ၅ ရက်တွင် ထုတ်ပြန်ထားသည်။
စစ်တပ်အာဏာသိမ်းပြီး ၂ နှစ်ကျော်ကာလအတွင်း စစ်ကောင်စီ၏ ထောက်တိုင်ယန္တရားများကို ပြိုပျက်နိုင်ရန် အတွက် ပြည်တွင်းပြည်ပရှိ ပြည်သူလူထုများနှင့် ပူးပေါင်းဆောင်ရွက်နေလျက်ရှိပြီး လက်ရှိတွင် လုပ်ငန်းစဉ် ၄ ရပ်ဖြင့် အရှိန်မြင့် တိုက်ဖျက်ဖို့ ထုတ်ပြန်ကြေညာလိုက်ခြင်း ဖြစ်သည်။
ထို လုပ်ငန်းစဉ် ၄ ရပ်ထဲ ၌ စစ်ကောင်စီအတွက် အကျိုးစီးပွားဖြစ်စေသည့် ထုတ်လုပ်ပစ္စည်းများနှင့် ပတ်သက်ပြီး ရောင်းဝယ် ဖောက်ကားခြင်း၊ ကုန်သွယ်ခြင်းအပါအဝင် မူးယစ်ဆေးဝါး သုံးစွဲရောင်းဝယ်ခြင်း၊ စစ်ကောင်စီကို သတင်းရယူပေးခြင်းနှင့် စစ်ရေးအရ အကျိုးတူ ပူးပေါင်းဆောင်ရွက်မှုများ မည်သည့် လူပုဂ္ဂိုလ်၊ အဖွဲ့အစည်းကို မဆို ထိရောက်စွာ အရေးယူဆောင်ရွက်သွားမည်ဖြစ်ကြောင်း ဆိုသည်။
အဆိုပါ ထုတ်ပြန်ချက်နှင့် ပတ်သက်ပြီး မိုးဗြဲပြည်သူ့ကာကွယ်ရေးတပ် MBPDF (1001) ကို ဆက်သွယ်မေးမြန်းဖို့ ကြိုးစားခဲ့သော်လည်း မြေပြင်ဖုန်းလိုင်းအခက်ခဲကြောင့် ဆက်သွယ်၍ မရပေ။
“ စစ်ကောင်စီနဲ့ ပတ်သက်တဲ့ ယန္တရားတွေကို ပြိုပျက်ဖို့အတွက် ပြည်တွင်းပြည်ပကရှိတဲ့ ပြည်သူတွေအပါအဝင် ပြည်သူတစ်ရပ်လုံး ပူးပေါင်းဆောင်ရွက်ပေးဖို့တောင်းဆိုချင်တယ်။ ပြည်သူလူထုတွေ ခိုင်ခိုင်မာမာလက်တွဲပြီး စစ်ကောင်စီအတွက် အင်အားဖြစ်စေမယ့်လုပ်ငန်းများ၊ ထောက်ပံ့မှုများတွေကို ဖြိုဖျက်နိုင်မှာဖြစ်တယ်။ ဒါမှ တော်လှန်ရေးအောင်မြင်မှုခရီး အမြန်ပြီးမြောက်နိုင်မည် “ ဟု ထုတ်ပြန်ချက်တွင် ရေးသားဖော်ပြထားသည်။
ယင်းကဲ့သို့ စစ်ကောင်စီနှင့် ပူးပေါင်းပြီး သတင်းရယူပေးခြင်း၊ ထောက်လှမ်းပေးခြင်း စသည့် မည်သည့် ပုဂ္ဂိုလ် အဖွဲ့အစည်းကိုမဆို စစ်ရေးဉပဒေအရ ထိရောက်စွာအရေးယူဆောင်ရွက်သွားမည် ဖြစ်ကြောင်း ထပ်လောင်း ထားသည်။
