တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တပ်ဖွဲ့မှ တပ်သားများ ရိုက်နှက်မှုကြောင့် ဒဏ်ရာ ရသွားသည့် သိန္နီမြို့နယ် ကျေးရွာသူကြီးသည် လျော်ကြေးငွေဖြင့် ကြေအေးပေးခဲ့ရကြောင်း စုံစမ်းသိရသည်။
ပြီးခဲ့သည့် ဇွန်လ ၁၆ ရက်တွင် သျှမ်းပြည် လားရှိုးခရိုင် ၊ သိန္နီမြို့နယ်ရှိ မိန်းပါးကျေးရွာအုပ်စုမှ ဝမ်မိုင် နမ့်ဟူးပွက် (ဝၢၼ်ႈမႂ်ႇၼမ့်ႁူးပွတ်း) ကျေးရွာမှ ရွာသူကြီးကို TNLA တပ်သားများ ရိုက်နှက်ခြင်း ဖြစ်ပြီး လျော်ကြေးငွေဖြင့် ကြေအေးပေး စေခဲ့ကြောင်း သိရသည်။
“TNLA ဘက်က ရွာသူကြီးကို လာမေးတယ်၊ ဘယ်လိုဖြစ်ချင်လဲပေါ့၊ ရွာလူကြီးကလည်း ဆရာတို့ တရားမျှတမှု ရှိသလို ဆုံးဖြတ်ကြပါဆိုလို့ TNLA ဘက်က သူ့ကို လျော်ကြေးငွေ ပေးလိုက်တယ်၊ ပြီးတော့ ရိုက်နှက်မှုတွေ ဖြစ်တဲ့ နေရာကလည်း ရွာထဲမှာဆိုတော့ ရွာကိုလည်း လျော်ကြေးပေးရတယ်၊ ဘယ်လောက်လဲဆိုတာတော့ အတိအကျ မသိရဘူး” ဟု ဒေသအတွင်းက လုံခြုံရေးအရ အမည်မဖော်လိုသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျေးရွာအတွင်း ရိုက်နှက်မှု ဖြစ်ပွားသည့် အတွက် ဒေသခံ အများ၏ ဆန္ဒအရ TNLA တပ်ဖွဲ့မှ ကျေးရွာ ဖွံ့ဖြိုးရေး အတွက် ရန်ပုံငွေကို ပေးဆောင်ရကြောင်းလည်း သိရသည်။
ပြီးခဲ့သည့် ဇွန်လ ၁၆ ရက် တွင် သိန္နီမြို့နယ်၊ မိန်းပါးကျေးရွာအုပ်စု ၊ ဝမ်မိုင် နမ့်ဟူးပွက် (ဝၢၼ်ႈမႂ်ႇ ၼမ့်ႁူးပွတ်း) ကျေးရွာသို့ TNLA တပ်သား ၃ ဦး ဝင်ရောက်လာပြီး တောထွက်လည်ရန် အတွက် လမ်းပြ ရွာသား (၅) ဦးကို တောင်းရာမှစပြီး ရွာသူကြီးကို ရိုက်နှက်ခြင်း ဖြစ်သည်။
ယင်းကဲ့သို့ ရိုက်နှက်ခံထားရသည့် ဒဏ်ရာများကြောင့် ရွာသူကြီး လုံးဖုန်းသည် ညာဘက်မျက်လုံး ဖွင့်မရ၊ ခေါင်းကွဲဒဏ်ရာ၊ ရင်ဘတ်ညိုမဲဒဏ်ရာ နှင့် အောင့်နေခြင်းနှင့် ခြေလက် နှစ်ဖက်လည်း ထိခိုက်ဒဏ်ရာများ ရသွားကြောင်းသိရသည်။
“လက်ရှိမှာတော့ ဒဏ်ရာတွေက နည်းနည်းခြောက်လာပြီ၊ ဒါပေမဲ့ အတွင်းဒဏ်ရာက ရင်ဘတ်အောင့်တာတွေက ဖြစ်နေသေးတယ်၊ လျော်ကြေးက ဘယ်လောက်ရလိုက်လဲဆိုတာ မသိရဘူး၊ သူတို့ (TNLA) က ပေးမပြောတာ လား မပြောချင်တာလား ဆိုတာတော့ မသိဘူး” ဟု ရွာလူကြီး နှင့် နီးစပ်သူ အမျိုးသား တစ်ဦးက သျှမ်းသံတော်ဆင့် ကို ပြောသည်။
ရိုက်နှက်ခံရသည့် ရွာသူကြီးသည် လုံးဖုန်း ဟု အမည်ရှိပြီး အသက် ၄၃ နှစ် ဝန်းကျင်ဖြစ်ကြောင်းလည်း သိရသည်။
ယင်းကဲ့သို့ ကိစ္စဖြစ်စဥ်နှင့် ပတ်သက်ပြီး မေးမြန်း သိရှိနိုင်ရန် အတွက် တအာင်း (ပလောင်) အမျိုးသား လွတ်မြောက် ရေး တပ်မတော် TNLA ၏ ပြန်ကြားရေး ဆက်ဆံရေးရုံးမှ ပြောရေးဆိုခွင့်ထံသို့ ဖုန်းဆက်သွယ် သော်လည်း ဖုန်းလက်ခံ ဖြေကြားခြင်းမရှိပေ။
Leave a Comments