သျှမ်းပြည် မိုးဗြဲမြို့တွင် တိုက်ပွဲဆက်လက် ပြင်းထန်စွာဖြစ်ပွားခဲ့ရာ ပြည်သူ့ကာကွယ်ရေး PDF ပူးပေါင်းတပ်ဖွဲ့ဘက်မှ ရဲဘော် ၄ ဦး သေဆုံးပြီး စစ်ကောင်စီဘက်မှ ၂၀ ကျော်ထက်မနည်း သေဆုံးခဲ့ကြောင်း စုံစမ်းသိရသည်။
ယမန်နေ့ (ဇွန်လ ၁၁) ရက် နံနက် ၇ နာရီဝန်းကျင်မှစပြီး မိုးဗြဲမြို့ကို စစ်ကြောင်းထိုးလာသော စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲဆက်လက်ဖြစ်ပွားခဲ့ရာ လက်နက်ကြီး၊ လက်နက်ငယ်ဖြင့် အပြန်အလှန် ပစ်ခတ်တိုက်ခိုက်ခဲ့သောကြောင့် ပြင်းထန်စွာ တိုက်ပွဲဖြစ်ပွားခဲ့သည်။
စစ်ကောင်စီဘက်မှ အဝေးပစ် လက်နက်ကြီးကို အသုံးပြုပြီး အလုံး (၁၀၀) ကျော် ပစ်ခတ်တိုက်ခိုက်ခဲ့သောကြောင့် တိုက်ပွဲကြား ပူးပေါင်းတပ်ဖွဲ့ PDF ဘက်မှ ရဲဘော် ၄ ဦး သေဆုံးခဲ့ကာ စစ်ကောင်စီဘက်မှ ၂၀ ကျော်ထက်မနည်း သေဆုံးခဲ့ကြောင်း MBPDF မှ ယမန်နေ့ ဇွန် (၁၁) ရက်တွင် ထုတ်ပြန်ထားသည်။
“ ဒီရက်ပိုင်းမှာ တိုက်ပွဲက တော်တော်လေး ပြင်းထန်တယ်။ လက်နက်ကြီးတွေထုတာ မြေတွေတောင်တုန်တယ်။ နှလုံးရောဂါသမား နဲ့ သက်ကြီးရွယ်အိုတွေ အခန့်မသင့်ရင် သေမှာ။ လက်နက်ကြီးရဲ့ ပြင်းကန်အားက တအားကို ပြင်းတယ် “ ဟု မိုးဗြဲမြို့အတွင်း ရောက်ရှိနေသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပြင်းထန်စွာ တိုက်ပွဲဆက်လက်ဖြစ်ပွားခဲ့သောကြောင့် တိုက်ပွဲကြား မိုးဗြဲပြည်သူ့ကာကွယ်ရေးတပ် MBPDF မှ ရဲဘော် ၁ ဦး၊ ကရင်နီအမျိုးသားများကာကွယ်ရေးတပ် KNDF B-03 မှ ရဲဘော် ၂ ဦး နှင့် မြို့ပြတော်လှန်ရေးတပ်ဦး URF မှ ရဲဘော် ၁ ဦး စုစုပေါင်း ရဲဘော် ၄ ဦး သေဆုံးသွားခဲ့ကြောင်း သိရသည်။
လက်ရှိ မိုးဗြဲမြို့တွင် စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား စစ်ရေးတင်းမာနေလျက်ရှိပြီး တိုက်ပွဲဖြစ်ပွားသည့် အနီးတဝိုက် နှင့် မိုးဗြဲ – ပီကင်းလမ်းပေါ် ဖြတ်သန်းသွားလာခြင်း မပြုလုပ်ရန် MBPDF မှ ထုတ်ပြန်ချက်၌ သတိပေးထားသည်။
အလားတူ ဇွန်လ ၁၀ ရက်တွင်လည်း ဖယ်ခုံမြို့နယ် ခေါင်းအိကျေးရွာတွင် စစ်ကြောင်းထိုးလာသော စစ်ကောင်စီ နှင့် ဒေသခံတော်လှန်ရေး အင်အားစုတို့ တိုက်ပွဲပြင်းထန်စွာ ဖြစ်ပွားခဲ့ရာ စနိုက်ပါ လက်ဖြောင့် ရဲဘော် နာတားလက် နှင့် ကျောင်းသားရဲဘော် မောင်ဂျော်နိုင်တို့သည် စစ်ကောင်စီမှ ပစ်ခတ်လိုက်သော လက်နက်ကြီး ထိမှန်ကာ သေဆုံးသွားခဲ့ကြောင်း MOBYE PDF 2 မှ ထုတ်ပြန်ထားသည်။
