သျှမ်းပြည် မိုးဗြဲမြို့ပေါ်တွင် ယနေ့ (ဇွန်လ ၁၁ )ရက် နံနက် ၇ နာရီဝန်းကျင်မှစပြီး စစ်ကောင်စီနှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့ အကြား တိုက်ပွဲဆက်လက်ပြင်းထန်နေကြောင်း စုံစမ်းသိရသည်။
ယနေ့ ဇွန်လ ၁၁ ရက် နံနက် ၇ နာရီဝန်းကျင်မှစပြီး မိုးဗြဲမြို့ မြို့ဦးရပ်ကွက်နှင့် စည်ကား ၂ ရပ်ကွင်း အတွင်း တိုက်ပွဲဆက်လက်ဖြစ်ပွားခဲ့ကြောင်း မိုးဗြဲပြည်သူ့ကာကွယ်ရေးနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
“ မနက်အစောပိုင်းကတည်း မြို့ဦးရပ်ကွက်နဲ့ စည်ကား ၂ ရပ်ကွက်မှာ တိုက်ပွဲဆက်ဖြစ်နေတယ်။ ၁၀ နာရီကျော်ကျော်မှာ ခဏငြိမ်းသွားတယ်။ ငြိမ်းပြီးခဏ အခုထိဆက်တိုက်ပဲ။ အရှိန်မြင့်ပြီး တိုက်ပွဲပြင်းထန်နေတယ် “ ဟု ၎င်းက ပြောသည်။
အဆိုပါ တိုက်ပွဲအတွင်း လက်နက်ကြီး၊ လက်နက်ငယ်ဖြင့် ပစ်ခတ်မှုရှိခဲ့ပြီး နှစ်ဖက်တပ်ဖွဲ့၏ ထိခိုက် သေဆုံးမှုကိုတော့ အသေးစိတ်မသိရသေးပေ။
ထို့အပြင် တိုက်ပွဲအတွင်း ထွက်မပြေးနိုင်သော ပြည်သူများကို စစ်ကောင်စီ ဦးတည် ပစ်ခတ်လာကြောင်း လူ့အခွင့်အရေးအမျိုးမျိုး ချိုးဖောက်လာနေကြောင်း သိရသည်။
“ တိုက်ပွဲကတော့ နေ့တိုင်းလိုပါပဲ။ ပြည်သူတွေ ပိတ်မိတာလည်းရှိတယ်။ တချို့က ပိတ်မိတာမဟုတ်ဘဲ မသွားကြတာလည်း ရှိတယ်။ အခု စစ်ကောင်စီက ပြည်သူဖက်ကို ဦးတည်လာပြီး တိုက်တယ်၊ ပစ်တယ်၊ သတ်တယ် အမျိုးမျိုးလူအခွင့်အရေး ကျူးလွန်လာနေတယ် “ ဟု ၎င်းကထပ်လောင်းပြောသည်။
ပြီးခဲ့သည့် ဇွန်လ ၇ ရက်တွင် တိုက်ပွဲကြောင့် ထွက်မပြေးနိုင်သော စည်ကားရပ်ကွက်မှ ညီအစ်ကို လူငယ်နှစ်ဦးကို စစ်ကောင်စီက ဦးခေါင်းကိုချိန်ပြီး သေနတ်ဖြင့်ပစ်သတ်သွားခဲ့ပြီး ဇွန်လ ၈ ရက်တွင်လည်း စည်ကား ၂ ရပ်ကွက်အတွင်း မိသားစုဝင် ၃ ဦးကို သေနတ်ဖြင့် ပစ်သတ်သွားခဲ့ကြောင်း သိရသည်။
Leave a Comments