ကရင်နီ (ကယား) ပြည်နယ် ဒီးမော့ဆို အရှေ့ဘက်ကမ်းရှိ စစ်ဘေးရှောင် ကလေးငယ်များ ရေအခက်ခဲမှုကြောင့် အရေပြားရောဂါခံစားနေရကြောင်း စုံစမ်းသိရှိရသည်။

ဒီးမော့ဆိုမြို့နယ် ဒေါတမကြီးအုပ်စု ထဲတွင် ရှိနေသည့် စစ်ဘေးရှောင်များသည် ရေအခက်ခဲမှုရှိနေပြီး တောထဲနေရသည့်အတွက်ကြောင့် အရေပြားရောဂါ ၊ ယားနာမှုများ ခံစားနေရကြောင်း Job for Kayah က တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ ဘာရောဂါ ဖြစ်တာလဲတော့ အတိကျတော့ မပြောနိုင်သေးဘူး။ ဆေးစစ်ပြီးမှ အတည်ပြုလို့ရမှာပါ။ ယားနာရောဂါ တစ်မျိုးပါပဲ။ ကျောက်အရေပြား ရောဂါလို့ ယူဆရတယ်။ စစ်ဘေးရှောင်တွေက စစ်စရှောင်တုန်းကနေ အခုထိ ရေမချိုးရဘူး။ သူတို့တွေ ရေမချိုးရတာက ၆ ရက်လောက်တော့ ရှိနေပြီ” ဟု ၎င်းက ပြောသည်။

ကလေးတွေ အပြင် လူကြီးများလည်း ယားနာ ရောဂါများကို ခံစားနေရကြောင်း သိရသည်။

အဆိုပါ ဒီးမော့ဆို အရှေ့ဘက်ခြမ်းတွင် မတ်လ မှစ တိုက်ပွဲဖြစ်ပွားခဲ့ပြီး ဒေသခံ ပြည်သူများက တောထဲကို ထွက်ပြေးတိမ်းရှောင်လာရပြီး တစ်ကိုယ်ရည် သန့်ရှင်းရေးအတွက် ရေအခက်ခဲမှု များရှိသည်။

ထိုအပြင် လက်ရှိ စစ်ဘေးရှောင်များသည် လွိုင်ကော်မြို့နယ် နှင့် ဒီးမော့ဆိုမြို့နယ်အတွင်းတို့ ထွက်ပြေးတိမ်းရှောင်လာကြပြီး တစ်ချို့က ဆွေမျိုးရှိရာ အရပ်သို့ ထွက်ပြေးသွားခဲ့ကြောင်း Job For Kayah က တာဝန်ရှိသူ ကဆိုသည်။

“ စစ်ဘေးရှောင် တစ်ချို့ကတော့ လွိုင်ကော်ဘက်ကို စစ်ဘေးရှောင် သွားတာရှိတယ်။ တစ်ချို့ကတော့ နီးစပ်ရာ ဆွေမျိုးတွေရှိတဲ့ ကျေးရွာတွေမှာ ရှောင်နေကြတယ်။ အများစုကတော့ ဒီးမော့ဆို တောထဲမှာပဲ စစ်ဘေးရှောင်ကြတယ်။ တောထဲမှာနေတော့ စားစရာတွေကော၊ ရေတွေလည်း ရှားပါးတယ်” ဟု ၎င်းက ပြောသည်။

ယခု မတ်လမှ စပြီး ကရင်နီပြည်နယ်အပြင် သျှမ်းပြည် ဖယ်ခုံမြို့နယ် နှင့် ပင်လောင်းမြို့နယ်အတွင်းလည်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့က တိုက်ပွဲ ဖြစ်ပွားခဲ့သည်။

အဆိုပါ တိုက်ပွဲကြောင့် ပင်လောင်းမြို့နယ်အတွင်းတွင် သံဃာတော် ၃ပါး နှင့် အရပ်သား ဒေသခံ ၂၈ ဦးတို့ သေဆုံးသွားခဲ့သည်။

ထိုသေဆုံးမှုကြောင့် ယမန်နေ့ မတ်လ ၁၅ ရက်တွင် တောင်ကြီးမြို့ ကန်ကြီးရပ်ကွက် တပေါင်းကွင်းထဲတွင် စစ်ကောင်စီ လက်အောက်ခံ PNO/PNA တို့က ဦးဆောင်ပြီး KNDF နှင့် PDF အလိုမရှိကြောင်း ဆန္ဒပြခဲ့သည်။