သျှမ်းပြည် တောင်ကြီးခရိုင် တောင်ကြီးမြို့နယ် ညောင်ရွှေမြို့ရှိ တောင်လေးလုံး အကျဥ်းထောင်မှ အကျဥ်းသား ၁၃ ဦး ထောင်ဖောက်ထွက်ပြေးရန် ကြိုးစားခဲ့ပြီး ၁၀ ဦး လွတ်မြောက်သွားပြီး၊ သေဆုံးသူ တစ်ဦးနှင့် ဒဏ်ရာရသူ ၂ ဦးကို ပြန်လည်ဖမ်းခံမိကြောင်း စုံစမ်း သိရသည်။

ယနေ့ (မတ်လ ၁၄) ရက် နံနက်ပိုင်းတွင် ညောင်ရွှေအကျဥ်းထောင် အိပ်ဆောင် (၂)မှ အကျဥ်းသား များသည် အိပ်ဆောင်လှေကားရှိ သစ်သားလက်ရန်းတန်းများကို ချိုးဖျက်ပြီး အိပ်ဆောင်တာဝန်ကျ အကျဉ်းထောင်ဝန်ထမ်း ၂ ဦးအား တိုက်ခိုက်ကာ အုတ်ရိုးကျော်တက်၍ ထွက်ပြေးရန် ကြံစည် ကြိုးစားခဲ့ကြခြင်းဖြစ်ကြောင်း သိရသည်။

အကျဥ်းသားများ အုတ်ရိုးကျော်တက်ရန် ကြိုးစားနေစဥ်တွင်ထောင်ဝန်ထမ်းအင်အားများ ထပ်မံရောက်ရှိလာပြီး သေနတ်ဖြင့် ပစ်ခတ်မှုကြောင့် တစ်ဦး သေဆုံးကာ ဒဏ်ရာရရှိသည့် ၂ ဦး ကို ပြန်ဖမ်းမိခဲ့ပြီး ကျန်သူများက ထွက်ပြေးလွတ်မြောက်သွားကြောင်း သိရသည်။

သေဆုံးသွားရသူ နှင့် ပြန်လည်ဖမ်းမိသူများသည် စစ်အာဏာရှင် ဆန့်ကျင်ရေး နိုင်ငံရေး ပြစ်မှုများနှင့် ဖမ်းဆီးထိန်းသိမ်း ခံထားရသူများ ဖြစ်ကြောင်းလည်း သိရသည်။

လက်ရှိတွင် ထောင်ဖောက် လွတ်မြောက်သွားသည့် အကျဉ်းသား ၁၀ ဦးကို စစ်ကောင်စီ နှင့် ၎င်း၏ လက်အောက်ခံ တပ်ဖွဲ့များမှ အသည်းအသန် လိုက်လံရှာဖွေနေကြောင်း ဒေသခံများက ပြောဆိုနေကြသည်။