မြေနီနီပေါ်မှာ ဝါးလုံးကို ယာယီထောင်ထားပြီး တာလပတ် မိုးကာ အစိမ်းရောင်တွေနဲ့ ယာယီ တည်ဆောက်ထားတဲ့ တဲတွေကတော့ ကွင်းပြင်ထဲမှာ အများအပြားပါပဲ။
အဲ့ စစ်ရှောင်တွေဟာ ဆီဆိုင်မြို့ကနေ မိနစ် ၃၀ ခန့် ဆိုင်ကယ် နဲ့ သွားမှသာ ရောက်ရှိတဲ့ နေရာဖြစ်ပြီး စစ်ရှောင်တွေဟာ စစ်ကောင်စီတပ်နဲ့ ပြည်သူ့ကာကွယ်ရေးတပ် PDF တို့ တိုက်ပွဲကြောင့် နိုဝင်ဘာ ၁၈ ရက်နေ့ က စတင်ထွက်ပြေးလာကြသူတွေဖြစ်ပါတယ်။
လွိုင်လင်လေးမြို့ ပိန်းချစ်ကျေးရွာအုပ်စုအတွင်း နေထိုင်တဲ့ ဒေသခံတွေရဲ့ နေအိမ်တွေကို မကြာခဏ လက်နက်ကြီးကျည် ကျရောက်ပေါက်ကွဲတာကြောင့် ထွက်ပြေးလာခဲ့ရတယ်လို့ ကုန်းဆွတ်ရွာသူကြီးက ပြောပါတယ်။
“ လက်နက်ကြီးတွေ နဲ့ ရွာထဲပစ်ချင်သလို ပစ်နေတဲ့ အနေထားမှာ ဖြစ်နေတဲ့အတွက် ကျနော်နေတဲ့ရွာက ပစ်ကွင်းပုံစံလိုမျိုး ကျရောက်နေတယ်။ မကြာခဏ မထင်သလို မဆင်မချင် အမြောက်တွေ ကျကျလာတော့ နေရပ်ပြန်ဖို့အတွက် ခက်ခဲတယ်။ ဒီတစ်ကြိမ်နဲ့ဆို ကျနော်တို့ ၂ ကြိမ်မြောက် ပြေးလာခဲ့ရတာပါ “ ဟု ၎င်း ရွာသူကြီးက ပြောပါတယ်။
လက်ရှိ စစ်ဘေးရှောင် စခန်းတစ်ခုတွင် အမျိုးသမီး (၁၅၀) ဦး၊ အမျိုးသား (၁၀၀) ဦး၊ ကလေးငယ် (၅၀) ဝန်းကျင်၊ ကိုယ်ဝန်သည် ၂ ဦး နဲ့ သက်ကြီးရွယ်အိုတွေ ရှိနေပါတယ်။
အဝတ်တစ်ထည် ကိုယ်တစ်လုံး နဲ့ ထွက်ပြေးလာခဲ့တဲ့ စစ်ဘေးရှောင်တွေဟာ လက်ရှိ ဆောင်းရာသီကာလ အချိန်မှာ အနွေးထည်၊ အိပ်ယာခင်း၊ မိုးကာ နဲ့ ဆောင်တွေ အရေးပေါ်လိုအပ်နေတယ်လို့ စစ်ဘေးရှောင် ကူညီနေတဲ့ အမျိုးသားတစ်ဦးက ဆိုပါတယ်။
“ အရင်တစ်ခေါက်က အလှူရှင် မိုးကာအထည် ၅၀ လောက် လာပေးတယ်။ စစ်ဘေးရှောင်အသစ်တွေ ထပ်ရောက် လာတော့ မလောက်ဘူးဗျ။ တချို့က တတ်နိုင်တဲ့သူက အခင်းဝယ်နိုင်တယ်။ မတတ်နိုင်တဲ့ သူက ရှိတဲ့မိုးကာနဲ့ဘဲ ခင်းအိပ်ရတယ်။ အခုဆောင်းရာသီ ရောက်လာတော့ မိုးကာနဲ့ခင်းအိပ်ရင် အရမ်းအေးတယ် “ လို့ ၎င်း အမျိုးသားက ပြောပါတယ်။
စစ်ရှောင်တွေ အတွက် အိမ်သာတစ်လုံးထဲသာ ရှိတာကြောင့် တခါတလေ အပေါ့အပါး သွားချင်ပါက ချုံကြားထဲမှာ သွားရပါတယ်။ ဒါ့ကြောင့် အမျိုးသမီးတွေအတွက် စိတ်လုံခြုံမှု မရှိကြောင်း စစ်ဘေးရှောင် အမျိုးသမီး အသက် ၂၁ နှစ်အရွယ် နန်းချယ်ရီက သူရဲ့ အခက်ခဲကို ပြောပြလာပါတယ်။
“ အပေါ့အပါး သွားဖို့အတွက် ခက်ခဲတယ်ရှင့်။ ဒီမှာ အိမ်သာတစ်လုံးထဲရှိတယ်ဆိုတော့ လူအများနဲ့ အဆင်မပြေဘူးရှင့်။ မနက်ပိုင်း အိပ်ယာက ထလာပြီး အပေါ့အပါး သွားမယ်ဆိုရင် လူအများနဲ့ တန်းစီပြီး စောင့်ရတယ်။ အချို့က မစောင့်နိုင်တော့ အပြင်က ချုံကြားတိုးရတယ်။ ချုံကြားထဲသွားရတယ်ဆို စိတ်မလုံခြုံဘူး “ လို့ နန်းချယ်ရီက ပြောပါတယ်။
လတ်တလော စစ်ဘေးရှောင် တွေရဲ့ စားဝတ်နေရေးကိုတော့ အလှူရှင်တွေပေးတဲ့ ဆန်၊ ဆီ၊ ဆားနဲ့ ကုလားပဲ၊ ကြာဇံတို့ကို ချက်ပြုတ်ပြီး တစ်နေ့ကို ပုံမှန် ထမင်း ၂ နှပ် စားရတယ်လို့ သိရပါတယ်။
ဒါ့အပြင် စစ်ဘေးရှောင် အမျိုးသမီးတွေအတွက် လစဉ်သုံးမှာ ဝယ်ယူရန် ခက်ခဲတဲ့အတွက် လက်ရှိမှာ အခက်ခဲ ကြုံတွေ့နေရသည်ဟု နန်းချယ်ရီက ဆက်ပြောပါတယ်။
“ အမျိုးသမီး လစဉ်သုံးက အခက်ခဲရှိတယ်ဗျ။ ဝယ်ပေးမယ့် လူလည်းမရှိ၊ ဝယ်လာလည်း မပေးတော့ အခု အဲ့ပြသာနာတော့ ရှိနေတယ်ရှင့်။ ရာသီလာရင် အဆင်ပြေသလိုဘဲ လုပ်ရတယ် “ လို့ နန်းချယ်ရီက ထပ်လောင်းပြောပါတယ်။
ကရင်နီ (ကယားပြည်) မှ ထွက်ပြေးလာပြီး စစ်ဘေးရှောင်စခန်းတွင် ၁ လကျော်ကြာ နေထိုင်တဲ့ စစ်ဘေးရှောင်တွေဟာ တောင်ပေါ်ဒေသက ချောင်းရေကို ကြိုချက်ပြီး သောက်သုံးနေရတဲ့အတွက် သောက်သုံးရေမှာလည်း လိုအပ်နေတယ်လို့ စစ်ဘေးရှောင်များက ဆိုပါတယ်။
Leave a Comments