သျှမ်းပြည်အရှေ့ပိုင်း တာချီလိတ်မြို့တွင် ယာဉ်အချင်းချင်းတိုက်မိကြရာ တစ်ဖက်မှ သေနတ်ကိုင်ဆောင်ပြီး ခြိမ်းခြောက်မှုပြုလုပ်နေကြောင်း စုံစမ်းသိရှိရသည်။
ယမန်နေ့ (အောက်တိုဘာလ ၃) ရက် ည ၉ နာရီဝန်းကျင်တွင် တာချီလိတ် ဝိန်းကျောက်ရပ်ကွက် စိန်ပန်းနီနီ စားသောက်ဆိုင်ရှေ့ ကားလမ်းမကြီးပေါ်တွင် ကား နှင့် ဆိုင်ကယ် ယာဉ်ချင်းတိုက်မိကြရာ တစ်ဖက်မှ သေနတ်ကိုင်ဆောင်ပြီး ခြိမ်းခြောက်သွားကြောင်း တာချီလိတ်မြို့ ဒေသခံ အသက် ၃၀ ကျော် အမျိုးသားတစ်ဦး က ပြောသည်။
“ မနေ့ညက ဝိန်းကျောက် ရပ်ကွက်မှာ ကား နဲ့ ဆိုင်ကယ် တိုက်မိတယ်။ ကားပေါ်က မြန်မာစကား မပြောတတ်တဲ့ တရုတ်နိုင်ငံသား ၂ ယောက် ပါတယ်လို့ ပြောတယ်။ အဲ့ချိန်မှာ တရုတ်နိုင်ငံသားက နောက်လူကို ဖုန်းဆက်ပြီး လှန်းခေါ်လိုက်တာ။ နောက်တစ်ယောက် ကား နဲ့ ရောက်လာပြီး သေနတ်ပါကိုင်လာတယ်။ ဆိုင်ကယ်မှောက်ပြီး လှဲနေတဲ့သူက ရဲကို တိုင်မယ်ဆိုပြီး ပြောတော့ သေနတ်ကိုင်လာတဲ့သူက သူ့ကို ချိန်ပြီး ခြိမ်းခြောက်သွားတယ်“ ဟု ၎င်းဒေသခံ တစ်ဦးက ပြောသည်။
တာချီလိတ်မြို့တွင် တရားမဝင် နိုင်ငံခြားသားများ နှင့် အထောက်အထားမဲ့ တရုတ်နိုင်ငံသားများ ရှိနေပြီး ကာစီနို အွန်လိုင်းဂိမ်းများကို လာရောက်ဖွင့်လှစ်သည့် စီးပွားရေးလုပ်ငန်းရှင်များကို အာဏာရှင်များ နှင့် ပူးတွဲလုပ်ဆောင်နေကြောင်း တာချီလိတ်မြို့ ဒေသခံ အမျိုးသားတစ်ဦး ကပြောသည်။
“ဝိန်းကျောက် ရပ်ကွက်မှာတော့ တရုတ်နိုင်ငံသားတွေ အများကြီးရှိနေတယ်။ ဝမ်ကောင်းရွာ ဘက်တွေမှာကော တရုတ်နိုင်ငံသားတွေက အွန်လိုင်းဂိမ်း၊ ကာစီနိုတွေ လာလုပ်တယ်။ တာချီလိတ်က အာဏာရှင်တချို့ နဲ့ ပူးပေါင်းပြီး စီးပွားရေး လာလုပ်ကြတယ်။ စီးပွားရေး တချို့ကလည်း လက်နက်ကိုင် တပ်ဖွဲ့ထဲကို ဝင်ထားတာ ရှိတယ်။ အခု တာချီလိတ်မြို့မှာ တရုတ်တွေက ဉပဒေမဲ့ လက်နက်ကိုင်လာ နိုင်တော့ စိုးရိမ်ရတယ် “ ဟု ၎င်းက ပြောသည်။
ထို့အပြင် တာချီလိတ်မြို့ မကာဟိုခမ်း၊ ဆိုင်းခေါင်၊ မိုင်းဖုန်း၊ မန်ယန်း စသည့် ရပ်ကွက်တွင် နယ်ထိန်း ပြည်သူ့စစ်များ နှင့် လက်နက်ကိုင် အဖွဲ့အစည်းများရှိနေကြောင်း သိရသည်။
စစ်အာဏာသိမ်းပြီး ၂ နှစ်ကာလအတွင်း တာချီလိတ်တွင် ဥပဒေမဲ့ လက်နက်ကိုင်ခြင်း အဖွဲ့အစည်း ပေါများလာသော်လည်း စစ်တပ် နှင့် ရဲတပ်ဖွဲ့များက ဖမ်းဆီးအရေးယူ ဆောင်ရွက်ခြင်းမရှိပဲ လုပ်ငန်းများကို ပူးတွဲ ဆောင်ရွက်နေကြကြောင်း ဒေသခံများကဆိုသည်။
