သျှမ်းပြည်တောင်ပိုင်း မိုးဗြဲ PDF တပ်ဖွဲ့ဝင်တစ်ဦး တိုက်ပွဲတွင် ဒဏ်ရာပြင်းထန်မှုကြောင့် ယမန်နေ့ (စက်တင်ဘာ ၂၀)ရက် ညပိုင်း၌ သေဆုံးသွားကြောင်း စုံစမ်းသိရှိရသည်။
ယမန်နေ့ မွန်းလွဲပိုင်း ၃ နာရီမှ ၅ နာရီအထိ စစ်ကောင်စီ နှင့် မိုးဗြဲ PDF တို့လည်း တိုက်ပွဲဖြစ်ပွားခဲ့ပြီး PDF ဘက်မှ ၂ ဦး ဒဏ်ရာရရှိခဲ့ပြီး ထိုထဲမှ ရဲဘော် တစ်ဦးသည် ဒဏ်ရာပြင်းထန်မှုကြောင့် ယမန်နေ့ ညပိုင်းတွင် သေဆုံးသွားကြောင်း မိုးဗြဲ PDF မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
“ တစ်ဦးကျဆုံးတယ်ဆိုတာက ဟိုအရင်တစ်ပတ်ကတိုက်ပွဲကြောင့် ဒဏ်ရာပြင်းထန်ပြီး ခွဲစိတ်မကုသနိုင်လို့ ဆုံးသွားတာပါ။ မနေ့ကလည်း တိုက်ပွဲဖြစ်သေးတယ်။ ကျနော်တို့ဘက်တော့ ၂ ဦးဒဏ်ရာရရှိခဲ့တယ်” ဟု မိုးဗြဲ PDFတပ်ဖွဲ့ဝင်တစ်ဦးက သျှမ်းသံတော်ဆင့် ကို ပြောသည်။
မိုးဗြဲမြို့အတွင်း တိုက်ပွဲပိုပြင်းထန်လာနိုင်ပြီး စစ်ကောင်စီဘက်ကလည်း လက်နက်ကြီးကို ပိုပြီး အသုံးပြုလာသဖြင့် ပြည်သူနေအိမ် အများအပြားပျက်စီးဆုံးရှုံးနေကြောင်း သိရသည်။
“ တိုက်ပွဲကတော့ ပိုပြင်းထန်လာနိုင်တယ်။ စစ်ကောင်စီဘက်ကလည်း လက်နက်ကြီးတွေကို ပိုပြီးသုံးလာတယ်။ အရပ်သားနေအိမ်တွေလည်း အများကြီး ပျက်ဆီးသွားတယ်။ မိုးဗြဲမြို့ ပြာကျတဲ့အထိ တိုက်ပွဲဖြစ်လာနိုင်တယ်” ဟု အထက်ပါ PDF တပ်ဖွဲ့ဝင်တစ်ဦးကပြောသည်။
မိုးဗြဲမြို့တွင် စက်တင်ဘာ ၈ ရက်မှစပြီးဖြစ်လာသည့် တိုက်ပွဲကြောင့် မိုးဗြဲ PDF တပ်ဖွဲ့ဘက်မှရဲဘော် ၃ ဦးကျဆုံးသွားပြီး ဖြစ်ပြီး PDF ရဲဘော် ၃၀ နီးပါး ဒဏ်ရာရရှိခဲ့ကြောင်း သိရသည်။
Leave a Comments