သျှမ်းပြည်မြောက်ပိုင်း နမ္မတူမြို့နယ်အတွင်း ဖြစ်ပွားသော စစ်ရေးပဋိပက္ခကြောင့် ဒေသခံ ၅ ဦး ဖမ်းဆီးခံရကာ ၁၀၀ ကျော် သီပေါမြို့သို့ စစ်ဘေးရှောင်နေကြရသည်ဟု ဒေသခံများက ပြောသည်။

ဩဂုတ်လ ၈ ရက်နေ့ နံနက် ၈ နာရီအချိန် နားကေးရွာသား စိုင်းသိန်း အသက် ၅၀ အား လက်နက်ကိုင်အဖွဲ့တခုက ဖမ်းဆီးသွားကြောင်း၊ ထို့အတူ ဇူလိုင်လ ၃၁ ရက်နေ့က ပစ်ခတ် တိုက်ခိုက်မှုအပြီး ပန်ကွတ် ရွာသား ၄ ယောက် အား ဖမ်းဆီးသွားကြောင်း ဒေသခံများကဆိုသည်။

ပန်ကွတ်ရွာသား ၄ ဦးပျောက်ဆုံးသည့် ရွာအပြန်လမ်းတွင် RCSS  /SSA  စစ်ကြောင်း အခြေချလှုပ်ရှားနေကြောင်း RFA သတင်းဌာနက ထုတ်ပြန်ထားသည်။ ထို့အတူ ဩဂုတ်လ ၂ ရက်နေ့ က အဖမ်းခံရပြီး ပျောက်ဆုံးနေသော ရွာသားစိုင်းသိန်းအားလည်း RCSS/SSA မှ ဖမ်းဆီးသွားသည်ဟု မြောက်ပိုင်းမဟာမိတ် တပ်ဖွဲ့ဝင်များက စွပ်စွဲပြောဆိုထားသည်။

RCSS/SSA အနေဖြင့် လူထုအားဖမ်းဆီးသည့်ပေါ်လစီမရှိကြောင်း ၊သျှမ်းပြည်မြောက်ပိုင်း စစ်ရေးပြသနာနှင့်ပတ်သက်၍  လက်တွေ့ဖြေရှင်းနိုင်ရေးအတွက် ဌာနချုပ်လွယ်တိုင်း လျန်းတွင် ကျင်းပ နေသည့် ၆ လပတ်အစည်းအဝေးတွင် ဆွေးနွေး ဖို့ရှိကြောင်း အမည်မဖေါ်လိုသည့် အရာရှိတဦး ကပြောပါသည်။

၂၀၁၈ ဇူလိုင်လ ၃၁ ရက်နေ့က နမ္မတူမြို့အနောက်တောင်ဘက်ဒေသတဝှမ်း ပန်ကွတ်ရွာ၊ ပန်ဆော့ရွာ အနီးအနားသို့ လက်နက်ကြီးများဖြင့်ပစ်ခတ်သောကြောင့် ဒေသခံ ၁၀၀ ကျော် သီပေါမြို့သို့ ထွက်ပြေးရောက်ရှိနေသည်။ အဆိုပါဒေသဘက်တွင် တအာင်း(ပလောင်) အမျိုးသား လွတ်မြောက်ရေး တပ်မတော် PSLF/TNLA  ၊ သျှမ်းပြည်တပ်မတော် SSPP/SSA  ၊ အစိုးရတပ်မတော် နှင့် သျှမ်းပြည်တပ်မတော် RCSS/SSA  တို့ နယ်မြေစိုးမိုးရေး အားပြိုင်မှုကြောင့် ဒေသအတွင်း စစ်ရေးတင်းမာနေလျက်ရှိသည်။