သျှမ်းပြည်တောင်ပိုင်း မိုးဗြဲမြို့ အာဏာသိမ်းစစ်ကောင်စီတို့၏ တစ်ဖက်သက် ရမ်းသမ်းပစ်ခတ်မှုကြောင့် အမျိုးသမီး တစ်ဦးသေဆုံးပြီး ကလေးငယ်နှစ်ဦးအပါအဝင် ပြည်သူ ၆ ဦးထိခိုက်ဒဏ်ရာ ရကြောင်း စုံစမ်းသိရှိရသည်။
ယနေ့ (အောက်တိုဘာ ၂၄) ရက် မနက်ပိုင်းတွင် ကယားပြည်(ကရင်နီပြည်)နှင့် နယ်နိမိတ်ချင်းထိစပ်နေသည့် သျှမ်းပြည်တောင်ပိုင်း မိုးဗြဲမြို့အတွင်း စစ်ကောင်စီမှ သေနတ်ဖြင့် ရမ်းသမ်း ပစ်ခတ်မှုကြောင့် စည်ကား အမှတ် ၁ ရပ်ကွက်မှ အရပ်သား တစ်ဦးသေဆုံးပြီး အမှတ် ၃ ရပ်ကွက်ဘက်မှ ၄ နှစ်အရွယ် နှင့် ၁ နှစ်အရွယ် ကလေးငယ်နှစ်ဦး လက်နက်ကြီးကျည်ထိမှန်ခဲ့ကြောင်း ဒေသခံပြောကြားချက်အရ သိရသည်။
“စစ်ကောင်စီတွေက ရမ်းပြီးပစ်တာ၊ လူတွေရှိတဲ့ဘက် မြို့ထဲကိုရမ်းပစ်တော့ လူရော အဆောက်အအုံတွေရော ထိတယ်၊ အမျိုသမီး တစ်ဦးသေဆုံးတယ်၊ ပြီးတော့ ကလေး ၂ ယောက်လည်း ဒဏ်ရာရသွားတယ်၊ စုစုပေါင်း ၆ ဦးဒဏ်ရာတယ်၊ စိုးရိမ်ရတယ်ပြောရမယ်” ဟု မိုးဗြဲမြို့မှ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ထိခိုက်ဒဏ်ရာရသူများကို ဌာနေပြည်သူ့ကာကွယ်ရေး တပ်ပေါင်းစုနှင့် ပြည်သူ့ကျန်းမာရေး အဖွဲ့မှ ကုသစောင့်ရှောက်မှုများပေးနေပြီး အရေးပေါ် ဆေးဝါးနှင့် အသုံးပစ္စည်းများ အပြင် တချို့သော သွေးအမျိုးအစားများလည်း အကူအညီလိုအပ်နေကြောင်း သိရသည်။
စစ်ကောင်စီတို့သည် ယနေ့ နံနက် ၈ နာရီဝန်းကျင်မှ စတင်ပြီး မွန်းလွဲပိုင်း ၁၂ နာရီဝန်းကျင်အထိ မိုးဗြဲမြို့တွင်းသို့ ရမ်းသမ်းပစ်ခတ်မှုများ အဆက်မပြတ်ရှိနေသည့်အတွက် ဒေသခံ ပြည်သူများသည် နေအိမ်များကို စွန့်ခွာပြီး ဘေးကင်းရာသို့ ပြောင်းရွှေ့နေလျက် ရှိကြောင်း သိရသည်။
လက်ရှိမှာ အာဏာသိမ်း စစ်ကောင်စီတပ်ဘက်မှ အင်အားဖြည့် စစ်ကြောင်းချီတက်လာနေမှုကို တိုးတက်သော ကရင်နီပြည်သူ့အင်အားစု(PKPF)နှင့် ဌာနေပြည်သူ့ကာကွယ်ရေး ပူးပေါင်းတပ်ဖွဲ့တို့မှ တန်ပြန် တိုက်ခိုက်နေလျက်ရှိပြီး လက်ရှိပစ်ခတ်မှုများအပြင် မိုးဗြဲပြည်သူ့ကာကွယ်ရေးတပ်ဘက်မှလည်း ခုခံဖို့ရှိနေလို့ မြို့ခံများအနေဖြင့် မြို့တွင်းမှ ဘေးလွတ်ရာသို့တိမ်းရှောင်ကြရန်လည်း မိုးဗြဲပြည်သူ့ကာကွယ်ရေး တပ်ဖွဲ့က ထုတ်ပြန်ထားသည်။
Leave a Comments