သျှမ်းမြောက် ကျောက်မဲမြို့အတွင်း စည်းကမ်းမဲ့ အမှိုက်စွန့်ပစ်မှုကြောင့် ရေကြီးရေလျှံမှု ပိုဖြစ်လာပြီး၊ လူနေအိမ် (၄၀၀) ရေဝင်ရောက်မှုဖြစ်ကာ ပျက်စီးဆုံးရှုံးခဲ့ကြောင်း သတင်းရရှိသည်။
ကျောက်မဲမြို့တွင် ယမန်နေ့ (စက်တင်ဘာ ၂၀)ရက် နမ့်စောင်းငေါင်းချောင်းရေလျှံတက်ပြီး လူနေအိမ် (၄၀၀)ဝန်းကျင် ရေဝင်ရောက်မှုဖြစ်ပေါ်ခဲ့ကြောင်း၊ ထိုရေကြီးရေလျှံမှုသည် အမှိုက်များကို စနစ်တကျစွန့်ပစ်မှု၊ သိမ်းယူမှု အားနည်းခြင်းကြောင့် ဖြစ်ကြောင်း ဒေသခံများထံမှ သိရသည်။
“ အဓိက က အမှိုက်တွေကို စနစ်တကျ စွန့်ပစ်မှုအားနည်းတာ၊ နောက်ပြီး စည်ပင်ကလည်း အမှိုက်သိမ်းယူမှု အားနည်းတာပေါ့၊ အခုက အမှိုက်တွေ၊ ပလပ်စတစ်တွေကို ချောင်းထဲမှာပဲ အလွယ်တကူ သွားပြီးစွန့်ပစ်နေကြတယ်၊ အဲ့တော ချောင်းတွေ ပိတ်ပြီး ရေကြီးတာတွေ ပိုဆိုးလာတယ်” ဟု ကျောက်မဲ ရပ်ကွက်(၈)အတွင်းနေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယမန်နေ့ ရေကြီးရေလျှံမှုကြောင့် နမ့်စောင်းငေါင်း ချောင်းဘေးတစ်လျှောက် နေအိမ်အများစုနှင့် ရပ်ကွက်(၆)ရှိနေအိမ်များ ရေဝင်ရောက်မှုဖြစ်ပေါ်ခဲ့ပြီး ချောင်းအောက်ပိုင်းဖြစ်သည့် ရပ်ကွက်(၈)အတွင်းရှိ မြေနိမ့်ပိုင်းနေအိမ်များတွင် ရေဝင်ရောက်မှု ပိုမိုဆိုးရွားခဲ့ကြောင်း သိရသည်။
ရေကြီးရေလျှံမှု လျော့ကျရန် တာဝန်ရှိသူများအနေဖြင့် ချောင်းများကို ပုံမှန်ရှင်းလင်းပေးသင့်ကြောင်း၊ အမှိုက်များကိုလည်း စနစ်တကျ စွန့်ပစ်သင့်ကြောင်း ဒေသခံတစ်ဦးက ဆိုသည်။
“ချောင်းရေတွေ ပုံမှန်စီးဆင်းနိုင်ဖို့၊ အမှိုက်တွေ ပိတ်မနေဖို့ မြို့နယ်စည်ပင်သာယာရေးအနေနဲ့ ပိုမိုစည်းကမ်းတင်းကျပ်ပြီး လုပ်ဆောင်သင့်တယ်၊ နောက်ပြီး တစ်ခြားမြို့ကြီးတွေလို အမှိုက်သိမ်းယူမှုတွေကို တင်ဒါခေါ်ပြီး လုပ်ခွင့်ပေးလိုက်ရင်လည်း ပိုကောင်းမယ်လို့ ထင်တယ်” ဟု လူမှုရေးအသင်းတွင် ပါဝင်ဆောင်ရွက်နေသူ အမျိုးသားတစ်ဦးက ပြောသည်။
ကျောက်မဲမြို့တွင် ယခင်နှစ်များတွင်လည်း ရေကြီးရေလျှံမှု ဖြစ်ပေါ်လေ့ရှိသော်လည်း ယမန်နေ့ ရေကြီးမှုမှာ ပိုမိုဆိုးရွားလာသည့်အတွက် အမှိုက်များကို စနစ်တကျ စွန့်ပစ်ကျရန်နှင့် မြို့နယ် စည်ပင်သာယာရေးဌာနလည်း အမှိုက် သိမ်းယူမှု၊ စွန့်ပစ်နေမှုများအား စည်းကမ်းပိုမိုတင်းကျပ်ရန် ဒေသခံများက လိုလားနေကြကြောင်း သိရှိရသည်။
