သျှမ်းမြောက် နောင်ချိုမြို့နယ်တွင် ကိုဗစ် − ၁၉ ရောဂါ ကူးစက်မှု ပိုမိုမြင့်တက်လာကြောင်း စုံစမ်းသိရသည်။
အဆိုပါ မြို့တွင် သြဂုတ်လ ၂၇ ရက်နေ့မှ စတင်ပြီး Pilot Project ဖြင့် ကျေးရွာများအထိ ကွင်းဆင်းစစ်ဆေးမှုများ ဆောင်ရွက်ရာတွင် ကိုဗစ်ပိုး ကူးစက်ခံရသူ ပိုမိုတွေ့ရှိခဲ့ကြောင်း သိရသည်။
“Pilot Project အရ ကျေးရွာတွေအထိ သွားပြီး Task Kit နဲ့ စစ်ဆေးပေးတာပါ၊ ကျန်းမာရေးမကောင်းတဲ့ သူတွေကို ဦးစားပေးစစ်ဆေးတယ်၊ အဲ့မှာ ကူးစက်နေမှုတွေက တော်တော်ကို များနေတယ်” ဟု နောင်ချိုမှ ပရဟိတအသင်းဝင် တစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ်တွင် မြို့ပေါ်နှင့် ကျေးရွာအုပ်စုများအား ဇုန် (၄)ဇုန် ခွဲခြားသတ်မှတ်ပြီး ကိုဗစ် စစ်ဆေးမှုများ ဆောင်ရွက်ပေးနေတာဖြစ်ကြောင်း၊ စစ်ဆေးသူဦးရေနည်းသော်လည်း ကိုဗစ်ပိုး တွေ့ရှိမှုနှုန်းက စစ်ဆေးသူဦးရေ၏ တဝက်ခန့်ပင် ရှိနေကြောင်း သိရသည်။
“ကျေးရွာအားလုံးတော့ မဟုတ်ဘူးပေါ့၊ ကျွန်တော်တို့ သွားစစ်ရတဲ့ ကျေးရွာတွေမှာ စစ်တဲ့ ဦးရေဆယ်ဂဏန်းလောက်ပဲ ရှိတာကို ပိုးတွေ့နှုန်းက တစ်ဝက်လောက်နီးနီးကို ရှိနေတယ်” ဟု အဆိုပါ ပရဟိတအသင်းဝင်တစ်ဦးက ဆိုသည်။
အဆိုပါ Pilot Project အစီအစဉ်ဖြင့် သြဂုတ်လ (၂၈)ရက် ယနေ့တွင် ပြည်သူ(၃၆၉)ဦးကို စစ်ဆေးရာ ကိုဗစ်ရောဂါပိုး ကူးစက်ခံရသူ (၁၂၄)ဦးထိ တွေ့ရှိခဲ့တာဖြစ်ကြောင်း သိရသည်။
ထို့အပြင် ဇုန်အလိုက် သတ်မှတ်ပြီး Tast Kit ထုတ်ပေးရာမှာ လုံလောက်မှုမရှိကြောင်း၊ ကျေးရွာများထိ ကွင်းဆင်းစစ်ဆေးမှု ပိုမိုထိရောက်စေရန်အတွက် Tast Kit များကို ထပ်မံထုတ်ပေးစေချင်ကြောင်း ဒေသခံတစ်ဦးက ပြောသည်။
“ခုက အကန့်အသတ်နဲ့ပဲ စစ်ဆေးပေးနေရတယ်၊ Tast Kit တွေကို လုံလောက်အောင် ထုတ်ပေးနိုင်မယ်ဆိုရင် စစ်ဆေးတာလည်း ပိုပြီးထိရောက်မယ်၊ ကျေးရွာမှာ ကိုဗစ်ပိုးကူးစက်မှုတွေလည်း လျော့ကျသွားနိုင်တယ်” ဟု ဒေသခံ အမျိုးသားတစ်ဦးက ပြောသည်။
နိုင်ငံတော်အဆင့် ကိုဗစ်ထိန်းချုပ်ရေးနှင့်အရေးပေါ်တုံ့ပြန်ရေးကော်မတီက သျှမ်းပြည်တွင်းရှိ နောင်ချိုမြို့နယ် အပါအဝင် လားရှိုး၊ တာချီလိတ်၊ ညောင်ရွှေ၊ တောင်ကြီး၊ ကျိုင်းတုံနှင့် ရပ်စောက် မြို့နယ်တို့ကို ကိုဗစ်ရောဂါကူးစက်မှုနှင့်ပတ်သက်ပြီး အထူးစစ်ဆေးမှုဆောင်ရွက်မည့်မြို့နယ်များအဖြစ် သြဂုတ်လ (၂၆)ရက်နေ့က သတ်မှတ်ထားကြောင်း သိရသည်။
နောင်ချိုမြို့နယ်တွင် သြဂုတ်လ (၂၈)ရက် ယနေ့ မွန်းလွဲပိုင်းအထိ ကိုဗစ်ပိုးကူးစက်ခံရသူ (၁၆၄၁)ဦးရှိပြီး ဆေးရုံဆင်းခွင့်ရသူ (၁၀၇၆)ဦးနှင့် သေဆုံးသူ (၄၂)ဦး ရှိကြောင်း သိရသည်။
