သျှမ်းပြည်မြောက်ပိုင်း ကျောက်မဲမြို့နယ် တော့ဆန်ဘက်တွင် တိုင်းရင်းသားလက်နက်ကိုင် တိုက်ပွဲ တင်းမာမှုကြောင့် စစ်ရှောင်များ ထပ်မံ ရောက်ရှိလာကြောင်း စုံစမ်းသိရှိရသည်။

ကျောက်မဲခရိုင် မိုင်းငေ့ါမြို့နယ်ခွဲ ချုံးအုပ်စုရှိ ချုံးဟောင်းရွာ နှင့် ချုံးသစ်ရွာ တို့အနီးပတ်ဝန်းကျင်မှာ တိုက်ပွဲတင်းမာမှုရှိသောကြောင့် ရွာသား (၁၀၀) ကျော် ဇူလိုင် (၈) ရက်နေ့က မိုင်းငေါ့မြို့နယ်ခွဲရှိ စစ်ရှောင်စခန်းသို့ ရောက်ရှိလာကြောင်း သတင်းရရှိသည်။

“လက်ရှိ မိုင်းငေါ့က စစ်ရှောင် စခန်း (၇) ခုလောက်ရှိသွားပြီ။ ခုလောလောဆယ် စစ်ရှောင် (၇၀၀) ကျော် ရှိသွားပြီ။ ဒီနေ့ ထပ်ရောက်ရင်တော့ ထပ်တိုးလာမယ်” ဟု စစ်ရှောင်များကို ကူညီပေးနေသည့် အသက် (၃၀) ကျော်အမျိုးသား တစ်ဦး ကပြောသည်။

ဇူလိုင် (၁) ရက်နေ့မှ စတင်ပြီး ကျောက်မဲမြို့နယ် တော့ဆန်ကျေးရွာအုပ်စု အတွင်း RCSS/SSA နှင့် SSPP/SSA ၊ TNLA တို့ ပူးပေါင်းတိုက်ပွဲဖြစ်ပွားကာ ဒေသခံများ မိုင်းငေါ့မြို့နယ်ခွဲသို့ ဒေသခံ (၆၅၀) ကျော် ထွက်ပြေးတိမ်းရှောင်လာခဲ့ရသည်။

“ဒီနေ့ ထပ်ရောက်ဖို့ ရှိသေးတယ်။ မနေ့ နဲ့ ဒီနေ့ ရောက်မှာက (၃၀၀) ကျော်လောက် ရှိတယ်လို့ သိရတယ်။ တိုက်ပွဲက တင်းမာမှုတွေရှိနေသေးတော့ ရွာမှာမနေရဲတော့လို့ ထွက်ပြေးလာကြတာ” ဟု စစ်ရှောင်များကို ကူညီပေးနေသည့် အသက် (၃၀) ကျော် အမျိုးသား တစ်ဦး ကပြောသည်။

လက်ရှိတွင် ကူးစက်မြန် ကိုဗစ်-၁၉ ရောဂါများလည်း ဂရုစိုက်ရန် လိုအပ်သဖြင့် စစ်ရှောင်များထံ သွားရောက်လှူတန်းရာတွင် လည်း နှာခေါင်းစည်းများ၊ face shield များတပ်သွားရန် လိုအပ်ကြောင်း ကျောက်မဲစစ်ရှောင်ကော်မတီဝင် တစ်ဦးကပြောသည်။

“ကျနော်တို့ ကြိုတင်ကာကွယ်ထားတဲ့အနေနဲ့ စစ်ရှောင်တွေဆီ အားပေးစကားပြောရင်လည်း လက်တွေ မကိုင်မိစေနဲ့ ပြီးတော့ မဖက်မိစေနဲ့ပေါ့နော်။ ပြီးတော့ အလှူရှင်တွေလည်း နှာခေါင်းစည်းတွေ တပ်ရမှာပေါ့နော်” ဟု စစ်ရှောင်ကော်မတီဝင် တစ်ဦးကပြောသည်။

လက်ရှိတွင် စစ်ရှောင်များအတွက် စားနပ်ရိကာနှင့် အမျိုးသမီး အသုံးအဆာင် လုံလောက်မှုရှိပေမယ့် ဒီထက်ရက်ကြာသွားလျှင် အခက်ခဲဖြစ်လာနိုင်ကြောင်း ကော်မတီ ကပြောသည်။

တိုင်းရင်းသားလက်နက်ကိုင် အချင်းချင်းတိုက်ပွဲကြောင့် သျှမ်းပြည်တောင်ပိုင်း ကျေးသီးမြို့နယ်မှာ စစ်ရှောင် (၃၀၀၀) ကျော်၊ မိုင်းကိုင်မြို့နယ် (၃၇၀) ကျော် နှင့် သျှမ်းပြည်မြောက်ပိုင်း မိုင်းငေါ့မြို့နယ်ခွဲမှာ (၇၀၀) ကျော် တို့သည် စစ်ဘေးတိမ်းရှောင်နေရကြောင်း သိရသည်။

သျှမ်းပြည်မြောက်ပိုင်း နမ္မတူမြို့နယ် ကျောက်မဲမြို့နယ် နှင့် သီပေါမြို့နယ် အတွင်း ဖြစ်ပွားနေသည့် တိုင်းရင်းသားလက်နက်ကိုင်အချင်းချင်းကြား စားပွဲပေါ် တွေ့ဆုံပြီး စစ်ရေး ပဋိပက္ခပြဿနာ ကို ဖြေရှင်းရန် RCSS/SSAက ယမန်နေ့ (ဇူလိုင် ၈)ရက်စွဲဖြင့် ထုတ်ပြန်ချက် ထုတ်ခဲ့သည်။