၁၂ နာရီကျော်ကြာ အင်တာနက်ဖြတ်တောက်ခဲ့ရာ ဒေါ်အောင်ဆန်းစုကြည် ပြန်လွှတ်လာပြီဆိုသည့် သတင်းတုများ စတင်ဖြန့်လာသည်။
တပ်မတော်အာဏာသိမ်းမှုကို ယနေ့ (ဖေဖော်ဝါရီ ၆)ရက် တွင် မြန်မာနိုင်ငံတဝှမ်း ပြည်သူများ အရှိန်မြင့် လှုပ်ရှားလာကြပြီး၊ နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ပြန်လည် လွှတ်ပေးရန် တောင်းဆိုမှုတွေ ကို ပြုလုပ်ခဲ့သည်။ အဆိုပါသတင်းသည် မဟုတ်မှန်ကြောင်း NLD ပါတီ အတွင်းစည်းက တခြားသတင်းဌာနများသို့ အတည်ပြုထားသည်။
ထို့နောက် လွန်ခဲ့သည့်အချိန်အနည်းငယ်တွင် မြန်မာပြည်တဝှမ်း တွင် ဒေါ်အောင်ဆန်းစုကြည် ပြန်လည်လွှတ်လာကြောင်း သတင်းတုများမြန်ဆန်စွာ ပြန့်နှံ့လာခဲ့သည်။
“ ကျနော်တို့ အင်တာနက်မရဘူး။ ဘာသတင်းမှ မသိရဘူး။ သတင်းတွေ လည်း ဘာဆိုတာ မသိတော့ ဒေါ်စုလွှတ်လာတာ တကယ်လား” ဟု သျှမ်းပြည်တောင်ပိုင်း တောင်ကြီး တွင်နေထိုင်သည့် အမျိုးသားတဦး က သျှမ်းသံတော်ဆင့်ကိုပြောသည်။
ရန်ကုန်၊မန္တလေး၊ တောင်ကြီးမြို့တွင် ဒေါ်အောင်ဆန်းစုကြည် ပြန်လည်လွှတ်မြောက်လာသည့် သတင်းကြောင့် လမ်းပေါ်ထွက်ပြီး လက်ခုပ်တီး ပျော်ရွှင်နေကြသည်။
“ အိမ်ရှေ့မှာတော့ ဒေါ်စုလွှတ်ပြီးဆိုပြီး လက်ခုပ်တွေတီးနေတယ်။ သူတို့ပြောတာကတော့ RFAသတင်း မှာပါတယ်တဲ့။ သတင်းက အစစ်လား။ အတုလား” ဟု ရန်ကုန်မြို့ ဒဂုံမြို့နယ်တွင် နေထိုင်သည့် အမျိုးသမီး တဦးက ပြောသည်။
