သျှမ်းပြည်မြောက်ပိုင်း နမ္မတူမြို့နယ် ပန်ချင်ကျေးရွာအုပ်စုအတွင်း ယနေ့ (ဇန်နဝါရီ ၅)ရက် မနက်ပိုင်းတွင် တိုင်းရင်းသားလက်နက်ကိုင် တပ်ဖွဲ့ ၂ဖွဲ့ တိုက်ပွဲဖြစ်ပွားရာ ရွာသား တဦး လက်နက်ထိမှန်သေဆုံးခဲ့ပြီး၊ တဦးဒဏ်ရာရရှိကြောင်း စုံစမ်းသိရှိရသည်။
နမ္မတူမြို့နယ် ပန်ချင်ကျေးရွာ အုပ်စု ညောင်ဆွယ်ကျေးရွာ နှင့် မိုင်းဟုန်းရွာကြား သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသား လွတ်မြောက်ရေး တပ်မတော်(TNLA )တို့ တိုက်ပွဲဖြစ်ပွားရာ ဒေသခံ ရွာသား တဦး၊ လက်နက်ထိမှန် သေဆုံးပြီး တဦး ဒဏ်ရာ ရရှိခဲ့ကြောင်း မန်စံစစ်ဘေးရှောင်စခန်းမှာ ကူညီသည့် အမျိုးသား တဦး က သျှမ်းသံတော်ဆင့် ကိုပြောသည်။
“လက်နက်ကျလို့ ညောင်ဆွယ်ဒေသခံက တဦးသေဆုံးပြီး။ တဦး ဒဏ်ရာရပါတယ်။ နေအိမ်တလုံး မီးလောင်သွားတယ်။ အသေးစိတ် အချက်လက်ကို ကျနော်တို့လည်း မသိရသေးဘူး” ဟု ၎င်းအမျိုးသား တဦး က ပြောသည်။
နှစ်ဖက် တိုက်ပွဲကြောင့် ညောင်ဆွယ်ကျေးရွာမှာ နေအိမ်တလုံးပေါ် လက်နက်ကြီးကျခဲ့ကြောင်း နမ္မတူမြို့နယ် စစ်ဘေးရှောင်များကို ကူညီသည့် ကော်မတီ လုံးဘဉာဏ် က သျှမ်းသံတော်ဆင့် ကိုပြောသည်။
“ဒီနေ့ ညောင်ဆွယ်ကျေးရွာမှာ လက်နက်ကြီးတစ်လုံး ဒေသခံ ရွာသား အိမ်တအိမ်မှာ ကျသွားတယ်။ လက်ရှိမှာတော့ အသေးစိတ်အချက်လက်တွေ စစ်ဆေးနေတုန်းပဲ” ဟု နမ္မတူမြို့နယ် စစ်ဘေးရှောင်များကို ကူညီပေးသည့် ကော်မတီ လုံးဘဉာဏ် က သျှမ်းသံတော်ဆင့် ကိုပြောသည်။
အဆိုပါ ကိစ္စကို တိုင်းရင်းသားလက်နက်ကိုင် တပ်၂ဖွဲ့ဖြစ်သည့် RCSS/SSA နှင့် TNLA ကို သျှမ်းသံတော်ဆင့် မှ ဆက်သွယ်မေးမြန်းသော်လည်း ဖုန်းကိုင်ဖြေဆိုခြင်းမရှိပေ။
ယနေ့ နှစ်ဘက် တိုက်ပွဲကြောင့် စစ်ဘေးရှောင်များ မန်စံဘုန်းကြီးကျောင်းတို့ (၂၀၀) ကျော် ရောက်ရှိခဲ့ကြောင်း သိရသည်။
ကျောက်မဲခရိုင်အတွင်း ဒီဇင်ဘာ(၂၅)ရက်မှ စတင်ကာ RCSS နှင့် TNLA တို့တိုက်ပွဲဖြစ်ပွားမှုကြောင့် စစ်ဘေးရှောင် (၁၀၀၀) ကျော် ထွက်ပြေးတိမ်းရှောင်နေရကြောင်း သိရသည်။
Leave a Comments