ကျားခေါင်းပါတီနှင့် ကြံ့ခိုင်ရေးပါတီ တို့မဟာမိတ်အဖြစ် ပူးပေါင်းစာချုပ်ချုပ်ဆို ဆိုသည့် သတင်းမှား၊ သတင်းတု သည် ရွေးကောက်ပွဲ မတိုင်ခင် တရက်အလို တွင် လူမှုကွန်ရက်စာမျက်နှာ ပျံ့နှံလာသည်ကိုတွေ့ရသည်။

နိုဝင်ဘာ ၇ ရက် ယနေ့ နံနက်ပိုင်းကစပြီး ပျံ့နှံနေသော အဆိုပါ သတင်းတု၊သတင်းမှားသည် ကျားခေါင်းပါတီ ဟုလူသိများသည် ရှမ်းတိုင်းရင်းသားများဒီမိုကရေစီ အဖွဲ့ချုပ် (SNLD )နှင့် ပြည်ထောင်စု ကြံ့ခိုင်ရေး ပါတီ (USDP)တို့ အောက်တိုဘာ ၂၅ ရက်တွင် ချုပ်ဆိုခဲ့သည် ပူးပေါင်းရေးကတိစာချုပ်ဖြစ်ပြီး၊ SNLD ပါတီ ဒုဥက္ကဌ ဦးစိုင်းညွန့်လွင် နှင့် USDP ပါတီ ဥက္ကဌ ဦးသန်းဌေး လက်မှတ်တို့ ကလက်မှတ်ရေးထိုးထားသည်။

စာချုပ်တွင် ကြံ့ခိုင်ရေးပါတီနှင့် ကျားခေါင်းပါတီတို့ ရွေးကောက်ပွဲ အနိုင်ရပါက လွှတ်တော်နေရာခွဲဝေမှု၊ အချင်းချင်းပြိုင်ဆိုင်မှုမလုပ် ဟူသော သဘောတူညီမှုများ ပါရှိပါသည်။

ထို သတင်းတု၊သတင်းမှားသည် မနက်ဖန် (နိုဝင်ဘာ ၈)ရက် တွင် ကျင်းပမည့် ရွေးကောက်ပွဲ ၁ရက် အလိုဖြန့်ဝေးထားပြီး၊ မဲပေးမည့် ပြည်သူများကို ထင်ယောင်ထင်မှား ဖြစ်စေရန် ပြုလုပ်နေသည့် သဘောဖြစ်ကြောင်း လည်း သျှမ်းလူထုအသိုင်းအဝိုင်း ကပြောဆိုလိုက်သည်။

အဆိုပါ သတင်းတု၊သတင်းမှား ထွက်လာသည့်အပေါ် SNLD အထွေထွေအတွင်းရေးမှူး စိုင်းလိတ် က “အဲဒါတွေက အောက်တန်းကျတဲ့လုပ်ကြံမှုဖြစ်တယ်။ အဲတာကို သတင်းမှန်စီစစ်ရေးလုပ်နေတဲ့အဖွဲ့တွေလည်း ဒီဥစ္စာဟာသတင်းမှားပါ ဆိုတာ ထုတ်ပြန်ပါလိမ့်မယ်။ အဲတော့ အဲလိုမျိုး အောက်လုံးထိုးတဲ့ သတင်းမှားတွေ အပေါ်မှာတော့ ကျနော်တို့ သတိထားပြီးတော့မှာ မယုံကြည်မိဖို့ လိုအပ်တာပေါ့” ဟု သျှမ်းသံတော်ဆင့် ကိုပြောသည်။

လက်ရှိ SNLDနှင့် USDPစာချုပ်ချုပ်ဆိုသည့် သတင်းသည် အဓိကအားဖြင့် သျှမ်းပြည်သူအများစု စောင့်ကြည့်နေသည့် လူမှုကွန်ရက် စာမျက်နှာတွင် (Page)နှင့် ဂရုများတွင် ဖြန့်ဝေနေသည်ကိုတွေ့ရသည်။

ထိုကိစ္စနှင့်ပတ်သက်ပြီး SNLD မှလည်း လူမှုကွန်ရက်စာမျက်နှာ ၏ သတင်းတု စိစစ်ရေး အဖွဲ့ကို ပြောဆိုထားပြီးဖြစ်ကြောင်းသိရသည်။

ထို့ကြောင့် နိုဝင်ဘာ(၈)ရက် အတွက် မဲပေးသည့် မဲဆန္ဒရှင်ပြည်သူများအနေဖြင့် သတင်းတု၊သတင်းမှားများကို စိစစ်ပေးကြရန်လိုအပ်သည်။