သျှမ်းပြည် မြောက်ပိုင်း ကွတ်ခိုင်မြို့နယ် တာမိုးညဲမြို့တွင် အသက် ၆၀ နှင့် အထက် ကြိုတင်မဲပေးရာ၌ မိမိဆန္ဒအလျောက် မပေးခဲ့ရဘဲ ဖိအားပေးခြင်းခံနေရကြောင်း စုံစမ်းသိရသည်။
တာမိုးညဲမြို့ ရပ်ကွက် (၂) တွင် ယမန်နေ့ နိုဝင်ဘာ ၂ ရက်က သက်ကြီးများ ကြိုတင်မဲသွားပေးရာတွင် မိမိဆန္ဒ မဟုတ်သည့် ပါတီကို မဲထည့်ပေးရန် ဖိအားပေးမှုများရှိခဲ့ကြောင်း၊ ထိုသို့ ဖိအားပေးခံရခြင်းသည် တဦးတယောက်တည်း မဟုတ်ကြောင်း သျှမ်းပြည်မြောက်ပိုင်း မူဆယ်ခရိုင် မဲဆန္ဒနယ် အမှတ်(၅) အမျိုးသားလွှတ်တော် ကိုယ်စားလှယ်လောင်း SNLD ကိုယ်စားပြု ဝင်ရောက်ယှဉ်ပြိုင်မည့် မော်ထွန်းအောင် က သျှမ်းသံတော်ဆင့်ကို ပြောသည်။
“ တာမိုးညဲက မိတ်ဆွေတွေ ဖုန်းဆက်လာပြီး သူတို့ရဲ မိဘတွေကြုံရတဲ့ဟာတွေပြောပြတယ်။ ဒီပါတီကို မဲပေးပါဆိုပြီး ဖိအားပေးတယ်။ မဲရုံထဲမှာရှိနေတဲ့ ကော်မရှင်အဖွဲ့ဝင် (မဟုတ်ရင်) တစ်ခြားပါတီ အဖွဲ့ဝင်တွေလားတော့ မသိဘူး” မော်ထွန်းအောင် က ဆိုသည်။
တာမိုးညဲမြို့ နယ်ရှိ ဒေသခံပြည်သူများသည် အစိုးရ အဖွဲ့ဝင်များ၊ ရပ်ကွက်အုပ်ချုပ်ရေးမှူးများကို ကြောက်ရသည့် ဒေသတခုဖြစ်သကဲ့သို့ လက်နက်ကိုင်များ လှုပ်ရှားသည့် နေရာတခုလည်းဖြစ်ကြောင်း သိရသည်။
“ ကျနော်တို့ဖက်ကတော့ အုပ်ချုပ်ရေးမှူးတွေကို ကြောက်ရတဲ့နေရာလေ။ ဒီလိုပြောလာရင်လဲ ကိုယ်ဆန္ဒနဲ့ မဲပေးမယ့် သက်ကြီးရွယ်အိုတွေက တွန့်သွားတယ်။ သူတို့ပြောတဲ့အတိုင်း တံဆိပ်ထုခဲ့ပေးရတာမျိုးတွေရှိတယ် ”ဟု မော်ထွန်းအောင်က ဆိုသည်။
အဆိုပါ လုပ်ရပ်နှင့် ပတ်သက်ပြီး ပြည်ထောင်စု ရွေးကောက်ပွဲ ကော်မရှင်ကို နှုတ်ဖြင့် တိုင်ကြားထားကြောင်း မော်ထွန်းအောင် က ပြောသည်။
လွန်ခဲ့သည့် ၂၀၁၅ ရွေးကောက်ပွဲကလည်း တာမိုးညဲမြို့တွင် ထိုကဲ့သို့ဖြစ်ရပ်မျိုးကြုံခဲ့ကြောင်း သိရသည်။
သျှမ်းပြည်တောင်ပိုင်း တောင်ကြီးမြို့နယ် နှင့် လားရှိုးမြို့နယ်တွင်လည်း ကြိုတင်မဲပေးသည့် အသက် (၆၀) အထက် မဲဆန္ဒရှင်များ ဖိအားပေးကာ မိမိဆန္ဒမဟုတ်သည့်ပါတီအား မဲပေးခိုင်းသည့်ဖြစ်ရပ်မျိုးရှိခဲ့ကြောင်းသိရသည်။
Leave a Comments