ထိုင်းနိုင်ငံ မှ သျှမ်းပြည် တောင်ပိုင်း တောင်ကြီးခရိုင် သို့ ၂လ အတွင်း မြန်မာရွှေ့ပြောင်းအလုပ်သမား ၂၅၀၀ ခန့်ပြန်လာကြောင်း စုံစမ်းသိရသည်။
ထိုမြန်မာရွှေ့ပြောင်းအလုပ်သမားများသည် ထိုင်းနိုင်ငံ မဲဆောက် မှ ကရင်ပြည်နယ် မြဝတီသို့ ပြန်လည်ဝင်လာပြီး၊ ထိုမှတဆင့် သျှမ်းပြည်တောင်ပိုင်း တောင်ကြီးသို့ ပြန်လာသည့်သူများဖြစ်ကြသည်။
ထိုသူများသည် မေ (၂၇) ရက်နေ့မှ ဇူလိုင် (၂၄ ) ရက်နေ့ အထိ မြန်မာ ရွှေ့ပြောင်းအလုပ်သမား ( ၂၄၇၈) ဦးရှိကြောင်း လူမှုရေးဝန်ကြီး ဒေါက်တာမျိုးထွန်း က ပြောသည်။
ထို (၂၄၇၈) ဦးထဲမှ Swap ဓါတ်ခွဲနမူနာ ယူထားသည့် ရွှေ့ပြောင်းအလုပ်သမား (၂၀၁၆) ဦး ရှိကြောင်း၊ ဓါတ်ခွဲနမူနာ စစ်ဆေးရာမှာ ကိုဗစ်-၁၉ ပိုးမတွေ့ ရှိသူ (၁၉၈၁) ဦးရှိပြီး ကျန်သည့် (၃၅) ဦးမှာ အဖြေစောင့်ဆိုင်းနေဆဲ ဟု ဒေါက်တာမျိုးထွန်း က ပြောသည်။
“ဓါတ်ခွဲ နမူနာ ယူရန် ကျန်ရှိသူ (၄၆၂) ဦး ရှိပါတယ်” ဟု ဒေါက်တာမျိုးထွန်း ကပြောသည်။
ယနေ့ အချိန်ထိ သျှမ်းပြည်တဝှမ်းတွင် ကိုဗစ် စောင့်ကြည့်လူနာ စုစုပေါင်း (၄၈၇)ဦး ရှိခဲ့ကြောင်း သျှမ်းပြည်နယ် အစိုးရအဖွဲ့ထံ စုံစမ်းသိရှိရသည်။
သျှမ်းပြည်တောင်ပိုင်းရှိ Quarantine Center တွင် ဇူလိုင် ၂၂ရက် ၌ မြန်မာရွှေ့ပြောင်းအလုပ်သမား (၁၄၄) ဦး ကိုဗစ် -၁၉ ရှိ၊ မရှိ စစ်ဆေးရာ တွင် ၁၄၂ ဦး မှာ ပိုးမတွေ့ရှိကြောင်း ပြည်နယ် အထူးရောဂါနှိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို ကပြောသည်။
“၁၄၂ ယောက်မှာ ပိုးမတွေ့ပါ။ ကျန်တဲ့ ၂ ယောက်ကတော့ အဖြေစောင့်နေတုန်းပါ” ဒေါက်တာဇဝနကို ကပြောသည်။
သျှမ်းပြည်နယ်တွင် ကိုဗစ်-၁၉ အတည်ပြု လူနာ (၁၀) ဦး ရှိပြီး လူနာ အားလုံး ဆေးရုံမှ ဆင်းခွင့်ရပြီဖြစ်ကြောင်း သိရသည်။
မြန်မာနိုင်ငံတွင် ကိုဗစ် -၁၉ အတည်ပြု လူနာ ၃၄၃ ဦး ၊ ပြန်လည်သက်သာလာသူ ၂၈၂ ဦး ၊ သေဆုံးသူ ၆ ဦး နှင့် လက်ရှိ ကုသဆဲလူနာ (၅၅ ) ဦး ရှိကြောင်း ကျန်းမာရေး ဝန်ကြီးဌာန ကထုတ်ပြန်ထားသည်။
