ထိုင်းနိုင်ငံမှ ပြန်လာသည့် သျှမ်းပြည်တောင်ပိုင်း ရွှေ့ပြောင်းအလုပ်သမား (၁၀၀) ကျော် ၏ ဓာတ်ခွဲနမူနာများကို ယူဆောင် စစ်ဆေးထားကြောင်း စုံစမ်းသိရသည်။

အဆိုပါ ရွှေ့ပြောင်းအလုပ်သမား ၁၀၀ ကျော်သည် ထိုင်းနိုင်ငံ မဲဆောက်မှ မြဝတီနယ်စပ်ဂိတ်သို့ဝင်လာပြီး ထိုမှ တဆင့် သျှမ်းပြည်သို့ပြန်လာသည်သူများဖြစ်ကြောင်း သိရသည်။

ထိုနေရပ်ပြန် ရွှေ့ပြောင်းအလုပ်သမား ၁၁၂ ဦးသည် ယနေ့ ဇူလိုင် ၁၃ ရက်က တောင်ကြီးမြို့ ကွန်ပျူတာ တက္ကသိုလ်တွင် တည်းခိုနေထိုင်ပြီး၊ ထိုရွှေ့ပြောင်းအလုပ်သမားများ၏ နှာခေါင်းတို့ပတ် Nasopharyngeal Swab နှင့် အာခေါင်တို့ပတ် Oropharyngeal Swab တို့အား ဓာတ်ခွဲနမူနာ စစ်ဆေးရန် ပို့ဆောင်ထားပြီးဖြစ်ကြောင်း သိရသည်။

ယနေ့ အချိန်ထိ မြဝတီနယ်စပ်ဂိတ်မှ တဆင့် သျှမ်းပြည်သို့ ပြန်လည်ဝင်ရောက်လာသည့် မြန်မာရွှေ့ပြောင်းအလုပ်သမား ၂၂၁၂ ဦး ရှိပြီး တို့ပတ်များယူဆောင် စစ်ဆေးထားသူ ၁၇၅၉ ဦး ရှိကြောင်း စုံစမ်းသိရှိရသည်။

Swab ယူပြီး စစ်ဆေးသူထဲများထဲမှ ကိုဗစ် – ၁၉ ရောဂါ ပိုးမတွေ့ရှိသူ (၁၆၃၀) ဦး ရှိပြီး ကျန်သည့်သူတွင် အဖြေစောင့်ဆိုင်းနေဆဲ ဖြစ်ကြောင်း သျှမ်းပြည်နယ် အစိုးရအဖွဲ့ဝင် မှသိရသည်။

၄င်းတို့အနက် Swab ယူရန် ကျန်ရှိသူ (၄၅၃) ဦးရှိကြောင်း သျှမ်းပြည်နယ် အစိုးရ အဖွဲ့ ဝင် လူမှုရေးဝန်ကြီး ဒေါက်တာမျိုးထွန်း ထံမှ သိရသည်။

သျှမ်းပြည်နယ်တွင် ကိုဗစ် – ၁၉ အတည်ပြု လူနာ (၁၀) ဦးရှိပြီး ( ၉ ) ဦးမှာ ဆေးရုံမှ ဆင်းခွင့်ရပြီဖြစ်ကြောင်း သိရသည်။

မြန်မာနိုင်ငံတွင် ကိုဗစ် -၁၉ အတည်ပြု လူနာ (၃၃၁) ဦးရှိပြီး၊ ပြန်လည်သက်သာလာသူ (၂၆၁)၊ သေဆုံး (၆) ဦး နှင့် ဆေးရုံမှ ဆေးကုသမှု ခံယူသူ (၇၀) ဦး ကျန်ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။