သျှမ်းပြည်တောင်ပိုင်း နမ့်စန်မြို့နယ်တွင် ဆရာဝန်တစ်ဦး မောင်းနှင်းလာသည့် ဆေးရုံပိုင် အရေးပေါ်တင်ယာဉ်၌ တရားမဝင် ကျွန်းသစ်တံခါးများ သိမ်းဆည်းရကြောင်း စုံစမ်းသိရသည်။
အဆိုပါ ဆရာဝန်သည် သျှမ်းပြည်အရှေ့ပိုင်း မိုင်းပျဉ်းမြို့နယ်တွင် တာဝန်ကျ ဆရာဝန် ဒေါက်တာစိုင်းစိုးဟိန်း ဖြစ်ကြောင်း သိရသည်။
“ဆေးရုံကား နဲ့ ကျွန်းတံခါးရွက် ၉ ရွက် သယ်လာတယ်။ နမ့်စန် ကိုဗစ် တားဆီး ကာကွယ်ရေး ဂိတ် မှာ ဖမ်းဆီးရမိတယ်” ဟုလွိုင်လင်မြို့နယ် သစ်တောဦးစီးအရာရှိ ဦးပြည့်ဟိန်း က သျှမ်းသံတော်ဆင့် ကိုပြောသည်။
ထိုကျွန်းသစ်တံခါးများကို သယ်ဆောင်သည် ဆရာဝန် ကို သစ်တော ဦးစီးဌာန အနေဖြင့် သစ်တော ဥပဒေ ပုဒ်မ ၂၀၀၈ ဥပဒေ ပုဒ်မ ၃၃ ၊ က ၊ ၁ အရ အရေးယူထားကြောင်း ဦးပြည့်ဟိန်း က ဆိုသည်။
ဖြစ်စဉ်မှာ ယမန်နေ့ (မေ ၂၆ ) ည ၁၁ နာရီ ဝန်းကျင်တွင် ခိုလမ် မှ နမ့်စန်မြို့သို့အဝင်ဂိတ်၌ တာဝန်ရှိသူများမှ ဆေးရုံကား တစ်စီးကို ရပ်တန့် စစ်ဆေးရန် တားခဲ့သော်လည်း ရပ်မပေးဘဲ အရှိန်မြှင့် မောင်းပြေးခဲ့သည်။
ထို့နောက် တာဝန်ရှိသူများမှ လွိုင်လင်ဘက် အထွက်ဂိတ်ကို ဖုန်းဆက်ပြီး တားမြစ်ခိုင်းရာ ထို အရေးပေါ်ကား ရောက်လာသည့် အချိန်တွင် စစ်ဆေးရာ မြို့နယ် ဆေးရုံကားဖြင့် တရားမဝင် ကျွန်းတံခါးချပ်များ တင်ဆောင်လာခြင်းဖြစ်ကြောင်း ကိုဗစ် တားဆီးကာကွယ်ရေး စစ်ဆေးရေးဂိတ်မှ တာဝန်ကျ အမျိုးသား တဦး က ပြောသည်။
“ ၀ ဒသမ ၅၄၆၀ တန် ဖမ်းဆီးရမိတယ်။ ကားပေါ်မှာ တစ်ယောက်တည်း ကိုယ်တိုင်မောင်းလာတယ်။ ကျိုင်းတောင်း ကနေ ပင်လုံ ကို သွားမယ်လို့ သိရတယ်” ဟု လွိုင်လင်မြို့နယ် သစ်တောဦးစီးအရာရှိ ဦးပြည့်ဟိန်း က သျှမ်းသံတော်ဆင့် ကိုပြောသည်။
၂၀၀၈ ခုနှစ် သစ်တော ဥပဒေ အခန်း (၁၀) ပုဒ်မ ၃၃ ၊ ပုဒ်မခွဲ (က) ၊ ပုဒ်မခွဲငယ် (၁) တွင် တစ်တန်ထက် မပိုသော ကျွန်းသစ်ကို ဖြစ်စေ၊ တားမြစ်သစ်ပင်မှ ထွက်ရှိသည့် တစ်တန်ထက် မပိုသော သစ်ကိုဖြစ်စေ ဖမ်းဆီးရမိလျှင် အနည်းဆုံး ကျပ်တစ်သိန်းမှ ကျပ်ငါးသိန်း အထိ ဒဏ်ကြေးငွေကို ပေးဆောင်စေပြီး သစ်များကို ပြည်သူ့ဘဏ္ဍအဖြစ် သိမ်းဆည်းရမည်ဟု ပြဋ္ဌာန်းဖော်ပြထားသည်။
.
Leave a Comments