သျှမ်းပြည်တောင်ပိုင်း မိုးနဲမြို့နယ်၏ အထင်ကရ သမိုင်းဝင် အထိမ်းအမှတ် တခု ဖြစ်သည့် ဘဲဟင်္သာရုပ်ကြီး ယာဉ်မတော်တဆ တိုက်မှုကြောင့် ပျက်စီးသွားကြောင်း သိရသည်။
နမ့်ဟူးပိတ်ဟု အများသိကြသော အဆိုပါ သမိုင်းဝင် ဘဲဟင်္သာရုပ်တုကြီးသည် မိုးနဲမြို့ တောင်ဘက် (လင်းခေးအထွက်လမ်း) အမြောက်တပ် ၃၆၃ အနီးတွင်တည်ရှိပြီး မေလ ၁၁ ရက်နေ့ က ထိခိုက်မှု ဖြစ်ပွား ခဲ့ခြင်းဖြစ်သည်။
“သူတို့ကို ပြန်လျော်ခိုင်းမယ် နဂိုမူလအတိုင်း ပြန်ဖြစ်အောင် ပြီးရင် ပွဲတော်ပြန်တင်ပေးရမှာပေါ့ ။အဲ့လို လုပ်ပေးရင်တော့ ကျနော်တို့လည်း ကျေနပ်မှာပါ။ အဲ့လို မဟုတ်ရင်တော့ မကျေနပ်ဘူးပေါ့နော်။” မိုးနဲမြို့နယ် မဲဆန္ဒနယ်အမှတ်(၁) ပြည်နယ်လွှတ်တော်အမတ် စိုင်းမွန်းလိန် ကပြောသည်။
လက်ရှိတွင် ဘဲရုပ်အားတိုက်မိသူအားရဲများက သိနေကြောင်း ရဲလုပ်ထုံးလုပ်နည်းအရ ဆောင်ရွက်သွားမည်ဖြစ်ကြောင်း ပြောဆိုသော်လည်း တိုက်မည်သူမှာ မည်သူဖြစ်သည်ကို တရားဝင်ကြေငြာထားခြင်းမရှိသဖြင့် မိုးနဲမြို့ခံများက မကျေမချမ်းဖြစ်နေကြသည်။
သို့သော် ယာဉ်မောင်းနှင်သူမှာ အသက်မပြည့်သေးသူဖြစ်ပြီး အဆိုပါ ဘဲရုပ်ထုနှင့် ကွက်တိပုံစံတူသော ဘဲရုပ်ကို အတတ်နိုင်ဆုံးပြန်လည်တည်ဆောက်ပေးမည်ဟုလည်း သဘောတူညီမှုရထားကြောင်း၊ ထိုအတွက် ယနေ့တရက် ၂ ရက်အတွင်းဆရာတော် သံဃာတော်နှင့်ရပ်မိရပ်ဖများနှင့်အတူ သွားရောက်ကြည့်ရှုကြမည်ဖြစ်ကြောင်းလည်း မိုးနဲဒေသခံတချို့ကပြောဆိုနေကြသည်။
မိုးနဲမြို့နယ် အုပ်ချုပ်ရေးမှူး ဦးစိုးထွဋ် ကမူ ယခုဖြစ်ပွါးသော သမိုင်းဝင်ဘဲရုပ် ယာဉ်တိုက်မှုတွင် ယာဉ်မဆင်မခြင်မောင်းနှင်မှု ယာဉ်မောင်း၏ပေါ့ဆမှုကြောင့်ဖြစ်ကြောင်း သျှမ်းသံတော်ဆင့်အား ပြောသည်။
“ ဘဲ ရုပ်ပေ့ါနော် တိုက်တဲ့သူ နဲ့ သံဃာ့နာယက ဆရာတော်တွေနဲ့ ရပ်မိရပ်ဖ တွေနဲ့ တိုင်ပင်မယ်။ ဘဲ ရုပ်ကို နဂိုမူလအတိုင်း လုပ်ပေးနိုင်ခြင်း ရှိ မရှိပေ့ါနော်။ သူတို့က လုပ်ပေးနိုင်တဲ့ အတိုင်းအတာ ရှိတယ်ဆိုလို့ရှိရင် မြို့နယ်မှာ ရှေးဟောင်းနဲ့ ပတ်သက်လို့ ကျွမ်းကျင်တဲ့ ပညာရှင်နဲ့ ပြန်ပြီး နဂို အတိုင်းနေရာမှာပဲ ဆောင်ရွက်မှာပေါ့ ပြန်လည်တည်ဆောက်မယ်ပေါ့” မိုးနဲမြို့နယ် အုပ်ချုပ်ရေးမှူး ဦးစိုးထွဋ် က သျှမ်းသံတော်ဆင့် ကိုပြောသည်။
သဘာဝရေအမြဲစိမ့်ထွက်နေသော ရေကန်တွင်ရှိသော အဆိုပါ ဘဲဟင်္သာရုပ်တုသည် စော်ဘွားခေတ်ကတည်းကပင်ရှိနေသော ရုပ်ထုဖြစ်သည်ဟု မိုးနဲမြို့မှ သက်ကြီးမိဘများက ပြောဆိုကြသည်။
၄င်းနှင့်ပတ်သက်ပြီး မိုးနဲဒေသခံ ရှေးဟောင်းသမိုင်းဝင်အမွေအနှစ်များအား ကိုယ်ထူကိုယ်ထစနစ်ဖြင့် ထိန်းသိမ်းစောင့်ရှောက်မှုပြုလုပ်နေသော လူငယ်များအဖွဲ့မှ စိုင်းမောင်ကြီး က – “ကျနော်တို့ စာအုပ်စာပေမှာဖတ်ပြီးမှတ်ဖူးတာကတော့ ဒီဘဲဟင်္သာရုပ်ကို ဒုတိယမိုးနဲကနေ တတိယမိုးနဲ (ယခုမိုးနဲတည်နေရာ) ကို စတင်တည်ထောင်ကတည်းက ရှိခဲ့တယ်လို့ ဖတ်မိပါတယ်။ တတိယမိုးနဲကို အင်းဝမြို့ စတင်တည်ထောင်တဲ့နှစ်ဆိုတော့ အေဒီ ၁၃၆၄ လောက်မှာ ကျပါမယ်။အဲလောက်ကတည်းကရှိခဲ့တယ်လို့ခန့်မှန်းလို ့ရပါတယ်။ အဲ့ကတည်းကရှိခဲ့တဲ့ ဒီဘဲရုပ်ကို
သျှမ်းပြည်နယ် မြန်မာ့ဆိုရှယ်လစ်လမ်း စဉ်ပါတီဥက္ကဌ ဦးထွန်းရင်လောမှ ပြန်လည် မွမ်းမံလှူဒါန်းထားသည်လို့လည်း သိရပါတယ်။ ” – ဟု သျှမ်းသံတော်ဆင့်အား ရှင်းပြသည်။
ကြေမွပျက်စီးသွားသော ဘဲဟင်္သာရုပ်အားလည်း နဂိုမူလ အတိုင်း ပြန်လည် လုပ်ပေးနိုင်မှသာ ကျေနပ် မည်ဖြစ်ကြောင်း မိုးနဲဒေသခံများကပြောကြသည်။
“မိုးနဲမြို့ရဲ့အထင်ကရအမှတ်အသားတခြုဖစ်နေတော့ ကျနော်တို့ ဒေသခံ အနေနဲ့ နှမျောမိတယ်။ ဘာလို့လဲဆိုတော့ မိုးနဲမြို့ရဲ့သမိုင်းဝင်နေရာ ဖြစ်သလို ပုံစံတူ ပြန်လုပ်ရင်လည်း ရှေးဟောင်း ပုံစံ အတိုင်းတော့ မဖြစ်နိုင်ဘူး” ဟု ဒေသခံ စိုင်းဆိုင်လှိုင်း ကပြောသည်။
မိုးနဲမြို့တွင်သမိုင်းဝင် အမွေအနှစ်ကို ယခု အပါအဝင် ၂ ကြိမ် ကားတိုက်ခြင်း ခံခဲ့ရပြီး ဖြစ်သည်။ ယမန်နှစ်က မိုးနဲမြို့အဝင် စော်ဘွားခေတ်ကတည်းက တည်ရှိထားသော မြို့ဝင် ကြာဖူးကိုလည်း နမ့်စန်မှ စစ်တပ်ကကားတစီး ၀င်တိုက်သဖြင့် ထိုကြာဖူးနဲ့ပုံစံတူ အသစ်ပြန်လည်ပြုလုပ်ခဲ့ရသည်။
