သျှမ်းပြည် မြောက်ပိုင်း ကွတ်ခိုင်မြို့နယ် တွင် အရပ်သားနေအိမ် တလုံးဖောက်ထွင်းမွှေနှောက် ပစ္စည်းများခိုးယူခံရသည့်အပေါ် နောက်နောင်ထပ်မဖြစ်စေရဟု စစ်ကြောင်းမှူးက ဝန်ခံခဲ့ကြောင်းသိရသည်။
ကွတ်ခိုင်မြို့နယ် လွယ်ကန်ကျေးရွာအုပ်စု မန်ထမ်ကျေးရွာ တွင် ယမန်နေ့( ဧပြီ ၅)ရက် ညနေပိုင်းက အိမ်ရှင်များ မရှိသည့်အချိန် အစိုးရ တပ်မတော်က နေအိမ် တံခါးများကို ရိုက်ကာ ဝင်ရောက်ပြီး အိမ်တွင်းရှိ အခြေခံ စားသောက်ကုန်များ၊ ဆေးများ ယူဆောင်သွားသည် ဟု အိမ်ရှင် နန်ထန် က သျှမ်းသံတော်ဆင့် သို့ ပြောသည်။
“ ကျမ ကလေးကို ဆေးခန်းပြပြီး အပြန်မှာ တံခါးတွေ ဖျက်ထားတယ်။ အိမ်ထဲမှာလည်း ပွနေတာပဲ။ ကလေးဆေးတွေ၊ ဓာတ်ဆားတွေအားလုံးယူသွားတယ်။ မီးဖိုချောင်ထဲမှာ ဆန်၊ဆီ၊ဆား ဘာတခုမှ မကျန်ဘူး ယူသွားကြတာ” ဟု နန်ထန် က ပြောသည်။
မန်ထမ်ကျေးရွာရှိ နေအိမ်အား သော့ဖျက်ကာ စားသောက်ကုန်ပစ္စည်းများဝင်ရောက် ယူဆောင်သွားသည့် ကိစ္စ စစ်ကြောင်းမှူးက နောက်နောင် ထိုကဲ့သို့ မဖြစ်ရဟု ဝန်ခံပြောဆိုကြောင်း လွယ်ကန် ကျေးရွာအုပ်စု မှ အုပ်ချုပ်ရေးမှူး ဦးဟောင်းခေါင် က သျှမ်းသံတော်ဆင့် သို့ပြောသည်။
“ တပ်ကလည်း သူလာဝန်ခံထားပါတယ်။ ဆေးဖိုးတော့ ပြန်ပေးမယ်လို့ပြောပါတယ်။ နောက်ထပ် ဒီလိုမဖြစ်ဖို့ အတွက်လည်း ကျနော် က ပြောထားပါတယ်” ဟု ဦးဟောင်းခေါင် က ဆိုသည်။
အစိုးရ တပ်မတော်မှ ယူဆောင်သွားသည့် စားသောက်ကုန်ပစ္စည်းများသည် COVID-19 ကာလအတွင်း သုံးစွဲရန် စုဆောင်းထားသည့် ပစ္စည်းများ ဖြစ်ကြောင်း နန်ထန် က ပြောပြသည်။
Photo by နန်ထန်၊ အိပ်ခန်းထဲ ဝင်ရောက်မွှေနောက်ထားပုံ
“ ယူသွားတာ တန်ဖိုးငွေ ၅ သောင်းလောက်ပဲရှိပေမယ့် ကျမတို့ တနေ့လုပ်တနေ့စား မိသားစုတွေအတွက် ၂ ပတ်စာ ရှိတယ်” ဟု နန်ထန်က ဆိုသည်။
မန်ထမ်ရွာတွင် အိမ်ရှင် မရှိသည့်အချိန်ထိုသို့ မကြာခဏ အိမ်ဖောက်မွှေနှောက်ခံရပြီး အိမ်ရှင်ရှိပါက အစားအသောက်များ တောင်းရမ်းစားသောက်လေ့ရှိကြောင်း မန်ထမ်ကျေးရွာဒေသခံများက ပြောသည်။
“ ကျမ အနေနဲ့ကတော့ ယူသွားတဲ့ စားသောက်ကုန် ပစ္စည်းတွေ ကလေးဆေးတွေကို ပြန်ပြီး ပေးစေချင်တယ်” ဟု နန်ထန်က ထပ်လောင်းပြောသည်။
ကွတ်ခိုင်မြို့နယ် လွယ်ကန်ကျေးရွာ အုပ်စု မန်ထမ်ကျေးရွာသည် အိမ်ခြေ ၁၅ အိမ်ကျော်သာရှိပြီး၊ ကွတ်ခိုင်မြို့ မှသွားပါက မိနစ် ၂၀သာကြာကြောင်း သိရသည်။
ကွတ်ခိုင်မြို့နယ်တွင် တိုင်းရင်းသားလက်နက်ကိုင်များ၊ အစိုးရ တပ်မတော်နှင့် ပြည်သူ့စစ်များ လှုပ်ရှား ကြသဖြင့် မကြာခဏ တိုက်ပွဲဖြစ်ပွားသည့်နေရာလည်း ဖြစ်သည်။
