သျှမ်းပြည် မြောက်ပိုင်း ကွတ်ခိုင်မြို့နယ် ဟွေခုတ်ရွာ မူလတန်းပြ ကျောင်းဆရာမ ကို တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) တပ်သား သေနတ်ဖြင့် ပစ်သတ်ခံကြောင်း သတင်းရရှိသည်။

လွန်ခဲ့သည့် ဇန်နဝါရီ ၂၄ရက် ည ၇နာရီ ဝန်းကျင်တွင် TNLA တပ်သား မိုင်းဖိုးစိန်သည် ဟွေခုတ်ကျေးရွာ မူလတန်းပြ ကျောင်းဆရာမ လွေးမြမွှေးအောင်ကို သေနတ်ဖြင့် ပစ်သတ်ခဲ့ကြောင်း TNLA ၏ ဇန်နဝါရီ ၂၇ ရက်စွဲဖြင့် ထုတ်ပြန်ခဲ့သည်။

ကျောင်းဆရာမ ကို သေနတ်ပစ်သတ်ခဲ့သည့် မိုင်းဖိုးစိန် ကို လက်ရှိမှာ TNLA က ဖမ်းဆီးထားပြီး ဥပဒေ အရ အရေးယူ ဆောင်ရွက်သွားမည် ဖြစ်ကြောင်း ထုတ်ပြန်ချက်တွင် ရေးသားထားသည်။

ထိုပြစ်မှုကျူးလွန်သည့် မိုင်းဖိုးစိန်ကို TNLA တရားရေး ဌာန မှ အများပြည်သူ ရှေ့မှောက်တွင် တရားစီရင်ပြီးပါက ပြည်သူလူထုထံသို့ ထပ်မံချပြီး ရှင်းလင်းပေးသွားမည် ဟုလည်း ထုတ်ပြန်ချက်တွင် ဖော်ပြထားသည်။

မူလတန်းပြ ကျောင်းဆရာမကို သေနတ်ပစ်သတ်ခဲ့သည့် မိုင်းဖိုးစိန် ကို TNLA ဥပဒေ အရ မည်ကဲ့သို့ တရားစီရင်ချက် ချမည်ကို TNLA ပြောရေးဆိုခွင့်ရ မိုင်းအိုက်ကျော် ကို သျှမ်းသံတော်ဆင့် က ဆက်သွယ်မေးမြန်းရာ ပြန်လည်ဖြေကြားခြင်း မရှိခဲ့ပေ။

ထို့ပြင် TNLA ထုတ်ပြန်ချက် နှင့် ပတ်သက်ပြီး ကျောင်းဆရာမ လွေးမြမွှေးအောင် ၏ ဦးလေး ဦးအောင်ဝင်း က “ လက်နက်ကိုင်ဘက်ကတော့ သူတို့လူဆိုတာ ဝန်ခံလိုက်တာတွေ့တယ်။ သူတို့ ဘယ်လိုစီရင်ချက်ချမယ်ဆိုတာတော့ ကျနော်တို့လည်း မသိသေးဘူး” ဟု သျှမ်းသံတော်ဆင့် သို့ ပြောသည်။

လက်ရှိမှာ တရားခံကို TNLA က ဖမ်းဆီးထားပြီး၊ TNLA ဥပဒေ လုပ်ထုံးလုပ်နည်း အရ ပြုလုပ်သွားမည်ဟု သိရှိထားကြောင်း ဦးအောင်ဝင်း က ပြောပြသည်။

ဆက်လက်ပြီး ဦးအောင်ဝင်း က “ နောက်နောင် ဒီလို ကိစ္စတွေမဖြစ်အောင်၊ အဖွဲ့အစည်းနဲ့ ပုဂ္ဂိုလ်ရေး နဲ့ နားလည်မှု လွဲနေတာ ကွဲပြားအောင် လုပ်ပေးဖို့ ပြောချင်ပါတယ်။မျှမျှတတ စီရင်ချဖို့ ပြောချင်ပါတယ်” ဟု တောင်းဆိုလိုက်သည်။

TNLA တပ်သား အနေဖြင့် ပြဿနာကို ဖြေရှင်းသည့် အခါ လက်နက်ဖြင့် မဖြေရှင်းရန်၊ နောက်နောင် ထပ်မံ မပြုလုပ်ရန် စံပြ အနေဖြင့် ပြစ်ဒဏ်ပေးသင့်ကြောင်းလည်း ဦးအောင်ဝင်း က ပြောသည်။

“ နောက် ဘယ်သူမှ မလုပ်ရဲအောင်၊ ပြဿနာကို ဒေါနဲ့ မောနဲ့ မဖြေရှင်အောင် စံပြ အနေနဲ့ တခုခု လုပ်သင့်တယ်” ဟု လည်း လွေးမြမွှေးအောင်ရဲ့ ဦးလေး က ပြောသည်။

ကလေးပညာရေး ကိုသာအဓိကထားသင်ပြပေးနေသည့် ကျောင်းဆရာမ တဦး ဆုံးရှုံးရသလို စိတ်ထားကောင်းပြီး အေးဆေးနေတက်သည့် တူမလည်း ဆုံးရှုံးရခြင်းသည် အတိုင်းမသိ ဝမ်းနည်းကြောင်းလည်း ဦးအောင်ဝင်း က ပြောသည်။

ဟွေခုတ်ကျေးရွာ မူလတန်း ကျောင်းဆရာမသည် ဇန်နဝါရီ ၂၄ရက် ည ၇နာရီ တွင် ဆရာမများနေသည့် အဆောင်တွင် TNLA တပ်သား မိုင်းဖိုးစိန် က လာရောက် ပစ်သတ်ခဲ့သည်။