သျှမ်းပြည်မြောက်ပိုင်း လားရှိုးမြို့နယ် နမ့်ပေါင်အုပ်စုတွင် ဒေသတွင်းလူငယ်ထုနှင့် အုပ်စုအုပ်ချုပ်ရေးမှူးများ ရပ်မိရပ်ဖများပူးပေါင်းကာ ကိုယ်ထူကိုယ်ထမူးယစ်ဆေးဝါးတိုက်ဖျက်ရေးလှုပ်ရှားမှုတခုပြုခဲ့ကြောင်းသိရသည်။

မတ်လ ၆ ရက်နေ့ ည ၉ နာရီက နမ့်ပေါင်ဒေသခံလူငယ်များနှင့်ရပ်မိရပ်ဖများစုပေါင်းကာ မူးယစ်ဆေးဝါးနှင့်ပတ်သက်ဆက်နွယ်သည်ဟု သင်္ကာမကင်းရှိသူများအား စောင့်ကြပ်စစ်ဆေးကာ မိုင်းရယ်မြို့မှ စိုင်းဆန်လ ဆိုသူထံမှ ယာဘ မူးယစ်ဆေးဝါးများ ဖမ်းဆီးရမိပြီး ၄င်းနှင့်ဆက်နွယ်နေသူ နမ့်ပေါင်ရွာသား ဦးလုံးမောင်အေးကိုပါ မူးယစ်ဆေးဝါးများနှင့်ဖမ်းဆီးရမိခဲ့ကြောင်းသိရသည်။

“ဒေသတွင်းလူထုရဲ့သတင်းပေးမှုက အရမ်းအရေးကြီးပါတယ်။ မိုင်းရယ်သား စိုင်းဆန်လ က နမ့်ပေါင်ရွာသား ဦးလုံးမောင်အေးနဲ့ အမျိုးတော်တယ်။ မကြာခဏဝင်ထွက်သွားလာတယ်။ မူးယစ်ဆေးတွေယူလာဖြန့်တယ်လို့ သတင်းတွေရထားလို့ စောင့်စစ်ရာကနေ မိသွားတာပါ။ အခု သူတို့ ၂ ယောက်ကို ပြည်သူ့ရဲလက် အပ်လိုက်ပါပြီ ” – ဟု နမ့်ပေါင်ရွာမှ လူငယ်ခေါင်းဆောင်စိုင်းဆန်လူက သျှမ်းသံတော်ဆင့်အားပြောသည်။

လက်ရှိတွင် ၄င်းတို့ ၂ ဦးအား လားရှိးရဲစခန်းသို့ပို့ဆောင်ချုပ်နှောင်ထားသည်ဟုသိရသည်။

“ကျနော်တို့ဒေသမှာ ယာဘ ကတအားများနေပါပြီ။ ဒီဒေသမှာယာဘလုပ်တဲ့စက်မရှိသေးတာတောင်မှ အဲလောက်များနေပါပြီ။တကယ်လို့လူငယ်တွေ ဒီကိစ္စကိုအရေးတယူတိုက်ဖျက်တာမရှိရင်တော့ အနာဂတ်လူငယ်အရေး လုံးဝ မတွေးရဲတော့ပါဘူး” – ဟု ကိုယ့်အားကိုယ်ကိုးမူးယစ်တိုက်ဖျက်ရေး များပြုလုပ်နေသည့် လူငယ်များအဖွဲ့က စိုင်းဆန်လူက ဆက်လက်ပြောပြသည်။

သျှမ်းပြည်မူးယစ်ဆေးဝါး စောင့်ကြည့်ရေးအဖွဲ့က – သျှမ်းပြည်အနှံ့ ယာဘ မူးယစ်ဆေးဝါးများပျ့ံနှံ့လျက်ရှိပြီး အသက် ၁၂ နှစ်ခလေးများမကျန်သုံးစွဲနေကြကြောင်း၊ ယာဘစျေးမှာလည်းအည့ံဆုံးအမျိုးအစားမှာ တပြား ၁၀၀ ကျပ်သာရှိကြောင်း -ပြောဆိုပါသည်။