သျှမ်းပြည် မြောက်ပိုင်း ကွတ်ခိုင်မြို့နယ် လွယ်ကျော့ဘုန်းကြီးကျောင်းတွင် ဆရာတော် တပါး ရိုက်နှက်ခံရကြောင်း သတင်းရရှိသည်။
ဖြစ်စဉ်မှာ အောက်တိုဘာ ၂၈ ရက် မနက်ပိုင်းက မြန်မာ့ တပ်မတော် မှ ကွတ်ခိုင်မြို့နယ် ကာလိုင်ကျေးရွာ အုပ်စု လွယ်ကျော့ ဘုန်းကြီးကျောင်းအား ဝင်ရောက်ရှာဖွေ စစ်ဆေးရာ တိုင်းရင်းသား စစ်ဝတ်စုံ နှင့် စကားပြောစက် တလုံးတွေ့ရှိသည်ဟု ဆိုကာ ဆရာတော် အရှင်ဝဏ္ဏိတ အား ရိုက်နှက်ခဲ့ကြောင်း ဆရာတော် က သျှမ်းသံတော်ဆင့်ကို ပြန်လည် မိန့်ကြားခဲ့သည်။
ရိုက်နှက်ခံရသော ဆရာတော် အရှင်ဝဏ္ဏိတ သည် သက်တော် ၃၇ နှစ် ဝါတော် ၁၇ ဝါ ရှိကာ၊ အဆိုပါကျောင်းတွင် သီတင်းသုံး ကျောင်းထိုင်ခဲ့သည်မှာ ၁၄ ဝါ ရှိပြီဖြစ်ကြောင်း သိရသည်။
လွယ်ကျော့ဘုန်းကြီးကျောင်းအတွင်း မြန်မာ့တပ်မတော် ၀င်ရောက်စစ်ဆေးချိန်တွင် ဆရာတော်သည် မန်မိုင်ဘက် သို့ ခေတ္တရောက်နေကြောင်း၊ ကျောင်းအတွင်း စစ်တပ်မှ ၀င်ရောက်ရှာဖွေနေသည်ဟုသတင်းကြားသဖြင့်ကျောင်းသို့ပြန်လာရာ ကျောင်းပေါ် တက်နေစဉ် စစ်သားများက ဆရာတော်အားဆွဲရမ်းကာ သင်္ဃန်း ဆွဲချွတ် ကြောင်း ဆရာတော် အရှင် ဝဏ္ဏိတက မိန့်ကြားသည်။
“ ကျောင်းမှာ ပွဲလုပ်တော့ ပွဲခင်းမှာ စစ်ဝတ်စုံနဲ့ စကားပြောစက် ဘယ်သူ့ဟာလဲမသိဘူး မေ့ကျန်နေခဲ့တယ်။ အဲတာကိုကောက်သိမ်းထားပေးတာ။ ဦးဇင်းကမသိလို့ မသိဘူးလို့ပြောလိုက်တယ်။ အဲတာကို စစ်သားတွေက ဦးဇင်းကိုသင်္ဃန်း ဆွဲချွတ်တယ်။ လက်ကို ကြိုးနဲ့ချည်လိုက်တယ်။ ရင်ဘတ်ကို ခြေထောက်တွေနဲ့ ကန်တယ်။ ကျောကို ခါးပတ်နဲ့ ရိုက်တယ်။ ဗိုက်ကို လက်သီးနဲ့ ထိုးတယ်။ ဦးခေါင်းကို လည်း တုတ်နဲ့ ရိုက်တယ်” ဟု ဆရာတော် အရှင်ဝဏ္ဏိတ က မိန့်သည်။
အောက်တိုဘာလ ၂၈ ရက် မနက် ၁၀ နာရီကစပြီး တရက်လုံးရိုက်နှက်စစ်ဆေးခံရသဖြင့် ဆရာတော်မှာ တကိုယ်လုံး ဒဏ်ရာ ဒဏ်ချက်များဖြင့် ရရှိကာ ကွတ်ခိုင် ပြည်သူ့ ဆေးရုံသို့ သွားရောက် ဆေးကုသမှုခံယူနေရကြောင်း သိရသည်။
“ ဦးဇင်းကို အောက်တိုဘာ ၂၉ ရက် မနက် ရ နာရီ မှ ကြိုးဖြည်ပေးတယ်။ အဲ့ဒါနဲ့ ဆေးရုံရောက်လာတယ်။ အခုတော့ မျက်လုံးတွေ ယောင်နေတယ်။ ရင်ဘတ် ကတော့နာတယ်။ နည်းနည်း လှုပ်ရင် နာတာပဲ” ဟု ဦးဇင်း က ထပ်မံမိန့်တော်မူသည်။
မြန်မာ့ တပ်မတော် သည် ဆရာတော် အရှင်ဝဏ္ဏိတ ကို တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ဝင်၊ ဘုန်းကြီး အတုဟုလည်း စွပ််စွဲကာ ရိုက် နှက်ခဲ့သည့်အပြင် ဆရာတော်အား သင်္ဃန်းချွတ်ပြီး စစ်ဝတ်စုံ ၀တ်စေကာ ဓာတ်ပုံပါ ရိုက်ယူသွားကြောင်း ဆရာတော်က ဆိုပါသည်။
ထို့ပြင်မြန်မာ့တပ်မတော်က ယာဘဆေးပြား၊ စစ်ဝတ်စုံ နှင့် စကားပြောစက်များကိုလည်း ဆရာတော်၏ ပစ္စည်းဟု ဝန်ခံခိုင်းကြောင်း၊ ဆရာတော် မဝန်ခံမှုကြောင့် ရိုက်နှက် ခြိမ်းခြောက်မှု များ ပြုလုပ်ခြင်းဖြစ်ကြောင်း ဆရာတော် အရှင် ဝဏ္ဏိတ ကဖြည့်စွက်ပြောကြားသည်။
“ စစ်တပ်ကတော့ ဦးဇင်းကို ဆေးဖိုးလာပေးတာ မရှိဘူး။ ဗျူဟာမှူးကတော့ တောင်တန်း သာသာနာပြု ကွတ်ခိုင် သံဃာနာယကနဲ့ သွားတွေ့တယ်လို့ ပြောတယ်။ ဦးဇင်း ဆေးရုံဆင်းရင်တော့ ဆရာတော်နဲ့ တွေ့ပြီး ဆရာတော် လမ်းညွှန်တဲ့ အတိုင်း ပဲ ဆက်လုပ်သွားမယ်” ဟု ရိုက်နှက် ခံရသည့် ဦးဇင်း က ထပ်လောင်းပြောသည်။
သျှမ်းမြောက် ကျေးရွာ အများစုတွင် တိုင်းရင်းသားလက်နက်ကိုင် တပ်ဖွဲ့များ များပြား ကြောင်း၊ ထိုဒေသအတွင်းတွင် တိုင်းရင်းသားလက်နက်ကိုင် အဖွဲ့ နှင့် မကင်းနိုင်ကြောင်းလည်း ကွတ်ခိုင်မြို့ လူ့အခွင့်အရေး တက်ကြွလှုပ်ရှားသူ မိုင်းမိုင် ကပြောသည်။
“ ဒီဒေသမှာ က လက်နက်ကိုင် တပ်ဖွဲ့တွေများတယ်။ ဘုန်းကြီးကျောင်းကို မလာနဲ့ လို့ ပြောလို့မှ မရတာ။ ဆရာတော်ကို မြင်တော့ တော်တော်လှန့်သွားတယ်။ ဆရာတော် ခန္ဓာကိုယ် တခုလုံးမှာ ဒဏ်ရာက တော်တော်များတယ်။ ဓာတ်မှန်အခြေအနေ အရတော့ အခြေအနေမစိုးရိမ်ရဘူးလို့ပြောတယ် ” ဟု မိုင်းမိုင် ကပြောသည်။
အောက်တိုဘာ ၂၀ ရက်နေ့ကလည်း သျှမ်းပြည် မြောက်ပိုင်း လားရှိုးမြို့ ခေးနင်းကျောင်း တိုက်မှ ကျောင်းထိုင်ဆရာတော် ဦးပညာဇောတ အားလည်း အမည်မသိ လက်နက်ကိုင် အဖွဲ့ က ၀င်ရောက် ပစ်ခတ်မှုကြောင့် ဆရာတော်ပွဲချင်းပြီး ပျံလွန်တော်မူခဲ့သည်။
သျှမ်းပြည် မြောက်ပိုင်းတွင် လတ်တလော သံဃာတော်များအား ရည်ရွယ်ချက်ရှိရှိ ပစ်ခတ်သတ်ဖြတ်ခြင်း၊ ရိုက်နှက်ခြင်းများရှိလာသည့်အပေါ် သျှမ်းမြောက် လူထု တရပ်လုံးကို ခြိမ်းခြောက်နေသည့် ပုံစံ ဖြစ်နေသည် ဟု သျှမ်းမြောက် ဒေသခံများက ပြောဆိုနေကြသည်။
Leave a Comments