သျှမ်းပြည်နယ် မြောက်ပိုင်း ကွတ်ခိုင်မြို့နယ် ဟိုနောင် ကျေးရွာ အနီးတွင် အရပ်သား ကားသမားကို သေနတ်ပစ်ခံရကြောင်း သတင်းရရှိသည်။

ဖြစ်စဉ်မှာ စက်တင်ဘာ ၈ရက် တွင် မူဆယ်မြို့ ဘက်မှ လာသည့် အသက် ၄၂နှစ် အရွယ် ယာဉ်မောင်း အားတီ ကားကို မြန်မာ့တပ်မတော် က ည ၇နာရီခွဲ ဝန်းကျင်တွင် ဟိုနောင် ကျေးရွာအနီး ၌ သေနတ်ဖြင့် ပစ်ခတ်ခဲ့ပြီး အားတီ လက် ကို ကျည်ထိမှန်ခဲ့ကြောင်း သိရသည်။

“ မြန်မာ စစ်သားက ကားရပ် ပြောတော့ ကျနော် အရှိန်လျော့ ရပ်ဖို့လုပ်နေချိန်မှာ သေနတ်နဲ့ ၄၊၅ ချက်ပစ်တယ်။ ကျနော့် လက်နဲ့ ကားမှန်တွေ ထိတယ်။ ကားမှာလည်း ကျည်ဆံ ရာတွေပဲ” ဟု ကျည်ထိမှန်သည့် ကားသမား အားတီ က ပြောသည်။

စက်တင်ဘာ ၈ ရက်နေ့တွင် ကွတ်ခိုင်မြို့နယ် နမ့်ခိုင်တံတား ခေတ္တပိတ်ထားပြီး ည ၇နာရီ ဝန်းကျင်မှ ကားများပြန်လွှတ်ပေးရာ နောက်ဆုံးမှ ထွက်လာသည့် ယာဉ်မောင်း အားတီ ကား သေနတ်ပစ်ခံခဲ့ရခြင်းဖြစ်သည် ဟု သိရသည်။

သေနတ်ဖြင့် ပစ်မှုကြောင့် အားတီ ၏ လက်ဖျံထိခိုက်ရာ ကွတ်ခိုင်ဆေးရုံတွင် ဆေးကုသခံခဲ့ရကြောင်း အားတီ က ပြောပြသည်။

ကားကို သေနတ်ပစ်ပြီးနောက် ကားသမား အားတီ ကို မြေကြီးပေါ်တွင် မှောက်ခိုင်းပြီး ကားထဲတွင် စစ်ဆေးမှု ပြုလုပ်ပြီးကြောင်း သိရသည်။

“ ကျနော် ရိုးရိုးသားသား ကားသမား သူပုန်လည်း မဟုတ်ဘူး။ ဓားပြ လည်း မဟုတ်ဘူး။ လက်မှန်သွားပြီး ဘယ်လို လုပ်မလဲမေးတော့ ဆေးမှူးမဟုတ်ဘူး ဆေးမရှိဘူးလို့ ပြောတယ်။ ကျနော် ကွတ်ခိုင်ရောက်တော့ ဆေးထည့်လိုက်တယ်” ဟု အားတီ က ဆက်လက်ပြောသည်။

ကွတ်ခိုင်ဆေးရုံ သို့ ရောက်သွားသည့်အခါ မြန်မာ့တပ်မတော်မှ ယာဉ်မောင်း အားတီ ကို လာရောက်တောင်းပန်ခဲ့ကြောင်း၊ သေနတ်ပစ်သည့်အပေါ် ဗွေမယူရန်လည်း ပြောကြားခဲ့ကြောင်း အားတီက သျှမ်းသံတော်ဆင့် သို့ပြန်လည် ပြောပြသည်။

မြန်မာ့တပ်မတော်အနေဖြင့် ဆေးကုသပေးမှု မရှိသည့်အပြင် လျော်ကြေးငွေလည်း မပေးကြောင်း သိရသည်။

“ပြည်သူလူထု ကို သေနတ်ပစ်တာတော့ မကောင်းဘူး။ ဘာမှ မဆိုင်ဘဲ သေနတ်နဲ့ပစ်တာတော့ မကောင်းဘူး” ဟု လားရှိုးမြို့နယ် အမျိုးသားလွှတ်တော် ကိုယ်စားလှယ် စိုင်းဝမ်းလျန်းခမ်း က သျှမ်းသံတော်ဆင့် သို့ ပြောသည်။

ပြည်သူများအနေဖြင့် ဝမ်းရေး ရှာစားရခက်ခဲနေချိန်တွင် မည်သည့် လက်နက်ကိုင် မဆို ယခုကဲ့သို့ အရပ်သားပြည်သူများကို သေနတ်ပစ်ပြီး ဖြေရှင်းသည့်ကိစ္စ မပြုလုပ်စေချင်ကြောင်း စိုင်းဝမ်းလျန်းခမ်း က ပြောသည်။

“ပြည်သူတွေက ဖြစ်လာရင် ဘယ်မှ တိုင်လို့မရဘူး။ မြန်မာ့ တပ်မတော် အနေနဲ့လည်း အောက်ခြေက လူတွေကို သေချာ စိစစ်ပေးသင့်ပါတယ်” ဟု စိုင်းဝမ်းလျန်းခမ်းက  ပြောဆိုလိုက်သည်။

လက်ရှိ ယာဉ်မောင်း အားတီ သေနတ်ပစ်ခတ်ခံ ရသည့် နေရာသည် ညီနောင်မဟာမိတ် (၃)ဖွဲ့ နှင့် မြန်မာ့တပ်မတော် တိုက်ပွဲဖြစ်ပွားခဲ့သည့် နေရာ ဖြစ်ပြီး၊၊ ကား(၇) စီး မီးရှို့ခံရသည့်နေရာလည်းဖြစ်သည်။

အရပ်သားများ ထိခိုက်ရခြင်းမှ ကင်းဝေးရန် အတွက် ပဋိပက္ခ တွင် ပါဝင်နေသည့် လက်နက်ကိုင် အဖွဲ့များ အနေဖြင့် ပြည်သူ၏ လုံခြုံရေး ဘေးကင်း ရေးကို အစွမ်းကုန် အလေးထားကာ ကာကွယ်ပေးသင့်ကြောင်း ကုလသမဂ္ဂ က စက်တင်ဘာ ၄ရက် ထုတ်ပြန်ချက်တွင် ရေးသားထားသည်။