၀ ပြည်သွေးစည်းညီညွတ်ရေးပါတီ ၀ ပြည်သွေးစည်းညီညွတ်ရေးတပ်မတော် UWSP/UWSA ၏ ငြိမ်းချမ်းရေးခရီး နှစ် ၃၀ ပြည့်အခမ်းအနားကို သျှမ်းပြည်အရှေ့ပိုင်း ၀ ကိုယ်ပိုင်အုပ်ချုပ်ခွင့်ရဒေသ ပန်ဆန်းမြို့နှင့် သျှမ်းပြည်တောင်ပိုင်း ထိုင်းနယ်စပ် မိုင်းတုံမြို့နယ်အတွင်းရှိ အမှတ် ၁၇၁ စစ်ဒေသအခြေချရာ ဟွေ့အော့ရွာတွင် ပြုလုပ်ကျင်းပသွားမည်ဖြစ်ကြောင်းသိရသည်။

ပွဲကျင်းပမည့် ၂ နေရာစလုံးအတွက် အခမ်းအနားကို ဧပြီလ ၁၅ မှ ၁၇ ရက်နေ့အထိ ၃ ရက်ကျင်းပမည်ဖြစ်ပြီး စစ်ရေးပြအခန်းအနားနှင့် ၀ ရိုးရာအက တခြားတိုင်းရင်းသားရိုးရာအက များဖြင့်လည်း ဖျော်ဖြေသွား မည်ဖြစ်ကြောင်း ၊ လက်ရှိတွင် အခမ်းအနားအတွက် ပြင်ဆင်နေကြဆဲဖြစ်ကြောင်း သိရသည်။

မိုင်းတုံဒေသခံတဦးက -“ သူတို့ သွားလာပြင်ဆင်နေတာတော့တွေ့တယ်။ ပန်ဆန်းလောက်တော့ ကြီးကြီးကျယ်ကျယ်ကြီးဖြစ်ပုံမရဘူး။ ဒါမယ့် ဒီဘက်ကလည်း သူတို့နေရာဆိုတော့ သူတို့ပွဲ ကျင်းပမှာလို့တော့ပြောနေတယ် ”- ဟု သျှမ်းသံတော်ဆင့်အားပြောသည်။

အလားတူ ကမ္ဘောဇတိုင်း သတင်းဌာနကလည်း တောင်ပိုင်း ၀ တပ်ဖွဲ့ စစ်ဒေသ ဆက်ဆံရေးရုံးအဖွဲ့ဝင် ဦးအိုက်ပလိပ် နှင့်ဆက်သွယ်မေးမြန်းပြီး သတင်းဖော်ပြထားရာတွင် – “အားလုံးကိုဖိတ်ပါတယ်။ မီဒီယာတွေရောပါ။ ဒီမှာ နေ့လည်စာနဲ့ဧည့်ခံပါမယ်” ဟု ပြောဆိုကြောင်း ပါရှိပါသည်။

သျှမ်းပြည်မြောက်ပိုင်း လားရှိုးမြို့နေ ဒေသခံတဦးကလည်း – “ပန်ဆန်း ၀ ငြိမ်းချမ်းရေးနှစ် ၃၀ ပြည့်ပွဲတော် သွားဖို့ ကျနော်တို့ပြင်ဆင်ထားပါတယ်။ အမည်စာရင်းတောင်ပေးထားပြီးပါပြီ။ ”- ဟု သျှမ်းသံတော်ဆင့်အားပြောသည်။

၀ တပ်ဖွဲ့သည် ဗမာပြည်ကွန်မြူနစ်ပါတီမှ ခွဲထွက်ပြီး ၁၉၈၉ ခုနှစ် ဧပြီ ၁၇ ရက်နေ့ တွင် အာဏာ သိမ်း စစ်အစိုးရ နှင့် ငြိမ်းချမ်းရေးလက်မှတ်ထိုးခဲ့သည်။ လက်မှတ်ထိုးစဉ်ကတည်းက အာဏာရ လာမည့် လူထု ဒီမိုကရေစီ အစိုးရ နှင့်နိုင်ငံရေးဆွေးနွေးကြ မည်ဟု သဘောတူထားကြသည်။

၂၀ဝ၈ ဖွဲ့စည်းပုံအခြေခံဥပဒေ အား အတည်ပြုပြီးနောက် ထိုစဉ်စစ်အစိုးရက တိုင်းရင်းသားလက်နက်ကိုင်တပ်ဖွဲ့များအား နယ်ခြားစောင့်တပ် သို့မဟုတ် ပြည်သူ့စစ်အသွင်ပြောင်းရန် ဖိအားပေးရာ ၀ တပ်ဖွဲ့က နယ်ခြားစောင့်တပ်အသွင်ပြောင်းရေး လက်မခံခဲ့ပေ။

၀ တပ်ဖွဲ့သည် ၂၀၁၁ ခု စက်တင်ဘာ ၆ ရက်နေ့ တွင် ဦးသိန်းစိန် အစိုးရ နှင့် ပြည်နယ်အဆင့် ပြည်ထောင်စုအဆင့် ငြိမ်းချမ်းရေးလက်မှတ် ထပ်မံရေးထိုးခဲ့သည်။ သို့သော် ဦးသိန်းစိန် ဦးဆောင်ခင်းကျင်းလာသည့် NCA လမ်းစဉ်ကို လက်မခံပဲ ဒီမိုကရေစီအစိုးရနှင့် နိုင်ငံရေး တိုက်ရိုက်ဆွေးနွေးရန်နည်းလမ်းရှာကြိုးပမ်းနေသည့် တပ်ဖွဲ့တဖွဲ့ဖြစ်ပါသည်။

တဖက်တွင်လည်း ၂၀၀၈ ဖွဲ့စည်းပုံအခြေခံဥပဒေ အရ ထိုစဉ်စစ်အစိုးရက သျှမ်းပြည်မြောက်ပိုင်း ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်းနှင့် ပန်ဆန်း (ပန်ခမ်း) ၆ မြို့နယ် အား ၀ ကိုယ်ပိုင်အုပ်ချုပ်ခွင့်ရဒေသ အဖြစ် ပေးထားသည်။ မိုင်းဆတ်ခရိုင် ထိုင်းနယ်စပ်တစ်လျှောက်တွင်မူ အမှတ် (၁၇၁) စစ်ဒေသ တောင်ပိုင်းအနေဖြင့် ၁၉၉၁ ခုနှစ်ကတည်းက ရောက်ရှိခြေကုတ်နေရာယူထားပြီး တပ်မဟာ ၂၄၈၊ ၅၁၈၊ ၇၇၂၊ ၇၇၅၊ ၇၇၈ တို့ဖြင့် ထိုင်းနယ်စပ် တွင် စခန်းချနေရာယူထားပါသည်။