သျှမ်းအမျိုးသမီးရေးရာဆက်သွယ်လှုပ်ရှားဆောင်ရွက်ရေးအသင်း SWAN တည်ထောင်ခြင်း နှစ် ၂၀ ပြည့်အခမ်းအနားတွင်ဖွင့်လှစ်သော ကံစမ်းမဲများအားလုံး ကံထူးရှင်များက လက်ခံရရှိသွားသည်ဟုသိရသည်။
SWAN ၏ နှစ် ၂၀ ပြည့်အထိမ်းအမှတ်အခမ်းအနားအား သျှမ်းပြည်တောင်ပိုင်း တောင်ကြီးမြို့နယ် သျှမ်းစာပေနှင့်ယဉ်ကျေးမှုခန်းမတွင် မတ်လ ၂၈ ရက်နေ့က ကျင်းပခဲ့ပြီး ကံစမ်းမဲများကိုလည်း ဖွင့်လှစ်ပေးခဲ့ကြောင်း၊ SWAN မှပေးသော ပေါက်ဆူး ၄၉ ခုစလုံး ကံထူးရှင်များကရရှိသွားကြောင်း ကံစမ်းမဲလက်မှတ်များစီစဉ်ခဲ့သည့်တာဝန်ရှိပုဂ္ဂိုလ်နန်းခမ်းယတ်က သျှမ်းသံတော်ဆင့်အားပြောသည်။
“ဆုတွေအကုန်ပေါက်သွားကြတယ်။ ကျမတို့ကံစမ်းမဲစာရွက်ရောင်းလို့ရတဲ့ပိုက်ဆံတွေကို ကျမတို့တောင်ကြီးမှာဆောက်ထားတဲ့ ရုံးမှာ သင်တန်းသားတွေအတွက် ချက်စားဖို့မီးဖိုချောင် လုပ်မယ်။ ပိုရင် ရုံးဝန်ထမ်းတွေအတွက်နေရာမလုံလောက်သေးတာကိုဆက်လုပ်သွားဖို့စီစဉ်ထားပါတယ် “ – ဟု နန်းခမ်းယတ် က ပြောသည်။
ကံစမ်းမဲ ၄၉ ခုမှာ ပထမဆု Toyota Wish ကားတစီးအား သီပေါမြို့နယ်မှ မအေးမီးကဆုမဲပေါက်ပြီး ဒုတိယဆုဖြစ်သော Hi Jet ကားကိုမူ တောင်ကြီးမြို့မှ မခိုင်ဖူး က ပေါက်ကြောင်း၊ တတိယဆုနှင့် စတုတ္ထဆုဖြစ်သော လယ်ထွန်စက်ကိုလည်း နမ့်ခမ်းနှင့် စယ်လန့်မှ ကံထူးရှင်များကလက်ခံရရှိကြောင်းသိရသည်။
နန်းခမ်းယတ်က – “ကျမတို့ SWAN ကံစမ်းမဲကို အားပေးကြတဲ့ ပြည်တွင်းပြည်ပမှ ပရိသတ်များကိုကျေးဇူးအထူးတင်ရှိကြောင်း ပြောကြားလိုပါတယ်။ ကံစမ်းမဲမပေါက်တဲ့သူတွေအားလုံး ကျမတို့ SWAN ရုံးတည်ဆောက်ဖို့ ကူညီထောက်ပံ့တာဘဲဖြစ်တဲ့အတွက် ဂုဏ်ယူဝမ်းမြောက်ပါတယ်ရှင့် “- ဟု ပြောသည်။
ကျန်ရှိသော ဆုမဲပေါင်း ၄၀ ကျော်မှာ မော်တော်ဆိုင်ကယ်၊ ကွန်ပြူတာ၊ လက်ကိုင်ဖုန်း၊ တီဝီ၊ မြက်ရိတ်စက်၊ ဆိုလာပြား စသည်တို့ဖြစ်ကြောင်းသိရပါသည်။
